ЛБЖЬАГАЖВА ХВДУ АКВХIЦIИТI

АпхъанчІви заман йгІашІарышвта ащхъагІвчва рыхъазла ахІба йажва акІвын йапхъаз. Ауи хвы азызымбаз заджв дгІаншазарквын, ддрымарачвун, йрымбжьаз гІвычІвгІвыста дырпхьадзун. ХIызтагылу азаман телебарала, ахабарргагаквала щардала йыгIгIитI атгIачваква рпны амакIыраква шгIаншауа, амлыкв ахъазла агIариква ранрабачва ахIаквымхарта йшартуа, апшIагылраква анцIолахара агIвщраква шгIарылцIуа. КIавкIаз апны ари йапшу рыцIа ймачIпI, хIуагIахъа рпны атгIачва цIасква багъьаркIвапI, намыси ъадаби хIымаркIвапI. Асабиква рыгIзара йшхвыцу уалагата йрыбагъьара атахъыпI. Ани аби йъадзанхауа асабиква андучви абадучви йрыцпI, ахIбачва ъадзахIыму асабиква хIхабзаква рзырдыруаш хIымазлуштI. Сара сан ланду Гвым йауу ХВБИ (КIьыча) Назыкь ХIамид йпхIа сквш 98 дыртапI, ауи хIкытла зымгIва драхIбапI. Лысквшква йрыквымшвауата швабыжта дласыпI, уысдъа зынгьи дыгьчIвам, йанакIвызлакIгьи лнапIы здылцIуш гIалауитI. ДанчкIвыныз лыквлагIвчва зымгIва дрыцта сквшщарда асовхоз дынхатI, зынгьи заджвгьи уысхарала дгьгIайхьымшватI. СквшквакI анцIы хIабаду Николайи лари тгIачва гIандыршатI, хвгIвысабичва гIадзындыргылтI. ХIнана йанакIвызлакIгьи лтгIачва апхъа йлыргылитI.АйцIбачвагьи ауи лахIбара хвду аквырцIауата зымгIвалагьи йшвапху гIвычIвгIвыс уасаражвта дырпхьадзитI. ЧкIвыныргIа ауи лщаласра гьырзыджьащум. Щымтадза дгIагылитIта лунагIва закIыла йшылрыпшдзуш дащтапI, дмацIауитI, сквш 98 дшыртугьи лпещква йанакIвызлакIгьи йалыргата, цкьата дыгIвнапI. Ауи лгIариква рпны даныргара закIыгIвба мшы ахIа даъамкIва лпныла дгIахъхитI, луатра, лыпшцIа, лыгвлачва, лкыт гIалгвалашвитIта тынчта дыгьзаъазлум Ужвы лгIариква дара рсабиквагьи гIарыцIагылхтI, ауатгьи ахвыцква раухтI. ХIара хIан дхIыцта нана дыгIбарныс, закIыла хIылцхърагIарныс хIлызцалитI, ауи лунагIва уышнашылуа айшва хъылгIвата ушлырчуш ацIыхъва дтагылапI. Агазджьара фачIв хъагIа сфахьатI, ауаса сара сыхъазла снана лапш хъагIата заджвгьи дгьмацIауам. Бзидздза йызбитI слыдзхъачIвата апхъанчIви хабарква срыздзыргIвырныс, лара дансабийыз угIалагата лбзазара апны джьащахъварата йгIаншаз шабгу гIахIалхIвитI, мгIва тамам уыквызцIуш гвыбзыгъара щарда лхIвитI, лбжьагажваква хIылахIлыркIитI. Сквш 98 ухІварыквын, тлахан дукІ гІацІанакІитІ. ХІанду совет власть анщаквгылуаз ауагІа баргвырата йгІазлысыз, Абашта айсра Ду лдзгІарата йрызгІанагыз, ауи аналга амщтахьгьи мла шаъаз, ауаса ауагІа швабыжта йшабаркІыз, ршІацІахъвы шацагІвыршуз, ацІагылра акъару шдуу дашІамсуа хІазылрыдзыргІвитІ. ХIанду АлахI ужвыгьи сквшщарда гIалитыргIатI. Асабиква зымгIва андуи абадуи рымазлара бзира щарда алапI, ауат рбжьаща рыцIа йбагъьата, хIхабзаква рдыруа йгIадзынгылитI. Андучви абадучви аунагIва рахIматла, баракьатла, пхарала, тынчрала йшдырчвуа кьангьаш азгIазгуаш дгьаъамзапI.