Фитнес бла кюрешгенлеге налогларындан къайтарыудан башлаб тыш къралчы адамлагъа виза бериуге дери къыркъар (август) айда талай джангы закон кючюне киреди. Газет окъуучуларыбызны ала бла шагъырей этейик.
Къыркъар айны 1-ден
Спорт бла кюрешгенлеге налогдан къайтарыу
Санларын чыныкъдырыр ючюн спорт бла кюрешген адамла джылны ичинде тёлеген налогларын къайтарыргъа боллукъдула. Алай а ол ачханы ёлчеми бир джылгъа, башха социал налог тёлеулени да санаб, 120 минг сомдан кёб болмазгъа керекди. Ол ачханы адам къуру кеси ючюн болуб къалмай, сабийлери ючюн да алыргъа боллукъду.
Бу ачханы 2022-чи джылны башил (январь) айыны 1-ден тёлениб башлагъан налогдан алыргъа мадар боллукъду.
Кърал Думаны Председатели Вячеслав Володин чертгенден, бюгюнлюкде саулугъун ачха тёлеб бакъдыргъанланы, билим алыугъа ачха джойгъанланы, сууаблыкъ бла кюрешгенлени, мекям, фатар сатыб алгъанланы, энчи табышлылыкъ бла кюрешгенлени къралгъа тёлеген налогларыны бир кесегин къайтарыр мадарлары барды. Ол ишле бары да экономиканы айнытыугъа да, адамланы джашау дараджаларын игилендириуге да уллу себеблик этедиле.
«Физкультура эмда саулукъну игилендириу ишле ючюн налогдан ачха къайтарыу къралны адамларыны саулукъларына къайгъырыуун кёргюзеди. Спортха джоюлгъан ачха социал магъанасы болгъан джоюмлагъа тенг этилгенди», - деб джазгъанды Володин Телеграмда.
Уучулукъну эмда джаныуарланы юслеринден законлада тюрлениуле
Бу законлада алгъын бир-бирине къаршчы баргъан затла бар эдиле да, энди ала тюзетилгендиле. Сёз ючюн, уучуланы эркинликлери, ала тутаргъа керекли джорукъла джазылгъандыла. Уучулукъну къайсы тюрлюсюне эркинлик бериллигин, къаллай бир барыргъа кереклисин, ууда къаллай сауут джюрютюрге боллугъун дагъыда башха сорууланы хар регионну башчылары кеслери оноу этерге керекдиле. Алай а, ол оноула алгъы бурун РФ-ны Экология эмда табигъат хазналарыны министерствосунда къабыл этилирге керекдиле.
Ол-бу джаныуарланы саны арт 3 джылда азайыб, аланы саны 50 процентден аз болгъан эсе, алагъа уучулукъ этерге джарарыкъ тюлдю.
Аны кибик, джаныуарлагъа кърал кадастр этиуню юсюнден бегим чыгъарылады.
Къыркъар айны 2-ден
Налоглада тюрлениуле
Маданият ишле бла кюрешген организацияланы налог тёлеу болджаллары кёчюрюлгенди. Ол къауумгъа библиотекала, архивле, музейле эмда башха учреждениеле киредиле. Ала 2020-чы эмда 2021-чи джылла ючюн налогларын 2022-чи джылны алтотур (март) айыны 28-ден кечге къалмай тёлерге керекдиле. Аны тышында да, бу учреждениеле 2020-чы эмда 2021-чи джыллада тюшген хайырлары ючюн налог авансны тёлеуден башларына бош этиледиле.
Къыркъар айны 22-ден
ОСАГО-ну джарашдырыуда тюрлениуле
Машиналарына ОСАГО джарашдыргъан адамла мындан ары техосмотрдан ётгенлерине шагъатлыкъ этген къагъытланы амалсыз халда берирге борчлары джокъду.
Къыркъар айны 24-ден
Гражданлыкълары болмагъан адамлагъа удостоверениеле бериу
РФ-ны джеринде гражданлыкълары болмагъанлай джашагъан адамлагъа 10 джыл болджаллары болгъан кёзюулю удостоверениеле берилликдиле. Бу къагъытны алгъанындан сора хар бир адам 7 кюнню сакълаб, андан сора джашагъан джеринде эсебге тюшерге керекди.
Кёзюулю удостоверениеси болгъан адам бир башха къралны гражданлыгъын неда анда джашаргъа эркинлик алса, бу къагъыт кючюн тас этеди, адам кеси да Эресейни джеринден 15 кюнню ичинде кетерге керекди.
Къыркъар айны 25-ден
Тауушу болгъан рекламаны аз этиу
Къыркъар (август) айны 25-ден тауушу болгъан рекламаны юйлени къабыргъаларында эмда юй башлада къурургъа эркинлик боллукъ тюлдю. Бу закон адамланы керексиз, уллу тауушлу рекламадан сакълар ючюн чыгъарылгъанды.
Нотариусланы борчларын кенгертиу
Адамны юрист кючю эмда ИП болгъанын билдирген кърал къагъытланы кертиликлерине шагъатлыкъ этген нотариус аллай заявлениени эмда башха керекли къагъытланы ол адамны эсебге саллыкъ органнга иерге борчлуду.
Ол джумушну электрон халда шагъатлыкъ этилген кюн огъуна тындырыргъа керекди.
Тыш къралчы туристлеге визаны джарашдырыуну тынчыракъ этиуню юсюнден
Энди тыш къралдан бизге солургъа келирге излеген туристле эресейчи визаны джыл джарым болджалгъа джарашдырыргъа боллукъдула. Аны алыр ючюн Эресейни джеринде джашарыкъ джерлерин белгилеб, сайлагъан къонакъ юйлеринде кеслерине орун алыргъа керекдиле. Аллай къонакъ юйлени тизимлери джарашдырыллыкъды. Неда туристге иш этиб туроператорлагъа деб къуралгъан реестрде эсебде болгъан туроператордан чакъырыу келирге керекди.
Комментарии