Къарачай районну Ташкёпюр элинде уллулугъу 60 квадрат метр болгъан джангы фельдшер-акушер пункт кёб турмай эшиклерин ачарыкъды.
- Ташкёпюрде бюгюнлюкде юч мингден аслам адам джашайды. Социал магъаналы объектни ишлеген заманда элни къайсы джанына да таб болуруну сагъышын этерге керекди. Алайды да, джангы ишленнген, заманны излемине толу джууаб этген бу фельдшер-акушер пункт да элни ара сюреминдеди. Элде эски ФАП-да барды, ол элни тёбен джанындады – ары джюрюгенле энтда ары барлыкъдыла. Элни баш джанындагъыла джангыгъа джюрюрюкдюле, - деб хапар айтханды Къарачай районда архитектура бёлюмню тамадасы Алботланы Казбек.
Элде эки фельдшер-акушер пункт джамагъатны кереклисин толу эмда асыулу баджарыргъа боллугъуна ийнаныбдыла элчиле. Аны бла бирге болушлукъ излеб келгенле кёб да сакъларыкъ тюлдюле. Медицинаны бу джангы учреждениесинде кёб тюрлю кабинет барды - тиш докторну кабинети да аланы бириди.
Бу объект «Эллени айнытыу» деген федерал нюзюрлю программаны тамалында ишленеди.
Комментарии