Бу кюнледе Зеленчук районда джашагъан адамланы тилеклери бла Къарачай-Черкес Республиканы Табигъат байлыгъы бла экологиясыны хакъындан министерствосу тау кёлню багушдан ариулагъанды.
«Бизни ведомствону башчылыгъы социал сетле бла билдирилген джарсыулагъа эс бёлгенлей турады. Джердешлерибизни кёбюсю адамла багушларын белгиленнгенден башха джерлеге атыб кетгенлерини тарыгъыуун этедиле. Социал сетледе суу керекли инджилген, табигъат байлыкъ бла байламлы башха джарсыулары болгъан адамла да джазадыла бизге. Кёб болмай Зеленчук районда кёлню джагъалары багушдан толуб тургъаныны хапары келген эди. Ол тёгерекде джашагъан адамла аны тазаларгъа болушлукъ излеген эдиле. Къарачай-Черкес Республиканы Табигъат байлыкъ бла экологиясыны хакъындан министерствосуну къуллукъчулары кёлню тёгерегин тазалаб чыкъгъандыла», - дейди Къарачай-Черкес Республиканы табигъат байлыкъ бла экологиясыны хакъындан министрни кенгешчиси Боташланы Медина.
Министерствону къуллукъчусу чертгенден, Зеленчук районну администрациясына джер бла хайырланнган адамлагъа суу объектлени къатларында мал кютмезге кереклисин айтыб ангылартыргъа борч салыннганды.
«Джергили администрация салыннган борчну къалай толтургъанына барыб къараллыкъды», - дейди Медина.
Табигъат байлыкъны сакълаугъа, хауа болумну игилендириуге аталгъан тазалау ишле мындан ары да тири бардырылгъанлай турлукъдула.
Кёб болмай Къарачай-Черкес Республиканы табигъат байлыгъы бла экологиясыны хакъындан министри Ёзденланы Джашарбекни кёлтюргючлюгю бла къуралгъан «Джашил десант» деген волонтёр экология отряд да ол ишлени баджарыугъа тири къошуллукъду.
Комментарии