КъЧР-ни Башчысы Темрезланы Рашид къралны джамагъатын Кърымны эмда Севастополь шахарны Эресейге къошулгъанларыны бешджыллыгъы бла алгъышлагъанды.
«Къралыбызны бютеу джамагъатын Кърымны эмда Севастополь шахарны Эресейге къошулгъанлары бла алгъышларгъа излейме. Беш джылны мындан алда Бютеукърым референдумда кърымчыла кеслери сайлаб, алай бла тарих тюзлюк орнуна тюшгенди - Кърым джарым айрымкан эски орнуна къайтханды. Ол джаз, Кърымны джазы, бютеу дуниягъа ачыкъ кёргюзгенди бир нюзюрню тутуб атлагъан халкъ джетишимлеге джетмей къалмазлыгъын. Бюгюнлюкде Кърым ёсюмню джолунда алгъа таукел атлаб баргъанын барыбыз да кёребиз. Бу джарыкъ иш бла Кърым Республиканы Башчысы Сергей Аксёновну, бютеу кърымчыланы, Севастополну губернатору Дмитрий Овсянниковну эмда ол Джигит шахарны адамларын алгъышлайма! Ол керти да бютеухалкъ байрамды!» - деб джазгъанды Инстаграмда кесини официал бетинде КъЧР-ни Башчысы.
Алтотур айны 18-де Черкесскеде анга аталгъан байрам ишле болгъандыла. Эресей Федерацияны, Къарачай-Черкесияны эмда Кърым Республиканы байракълары бла шахарны орамларында атлагъанлары ол джарыкъ ишлени бири эди.
Школланы сохталары, «Бирикген Эресейни Джаш Гвардиясы» деген Бютеуэресей джамагъат организациясыны членлери ол байракъланы ара шахарны Комсомол орамындан Халкъланы шохлугъуну стеласына дери, алайдан ары да «Джашил айрымканда» амфитеатргъа дери элтгендиле. Ызы бла Сабий чыгъармачылыкъны къаласыны тепсеу коллективи, «Кавказ» ансамбль, джаш аскерчиле кеслерини чемерликлерин кёргюзгендиле этгендиле. Аны бла къалмай, Къарачай-Черкесияны чыгъармачылыкъ коллективлери уллу байрам концерт кёргюзгендиле.
Комментарии