Комсомол гIаншищтара сквш 95 цIитI.

Акоммунист адкIылара нхарата йакIвнаршаз гIаргвалашвахтI Октябрь а 29 ареспублика Драмтеатр апны Комсомол (ВЛКСМ) йахъыцIыз асквш 95 йазынархата айззара акIвшатI. Ауи йалан акомсомол йалата йгIадзынгылыз, йынхаз акъральыгIва, политика йгьи ажвлара уысынкъвгагIвчва, КЧР а-Хъада йгьи а-Правительства р-Администация, КЧР а-Правительства, йапшым анхартаква рынхагIвчва, амуниципальна районква рхъадаква, ашIыпIа политика партияква, ажвлара организацияква ргIащтийыгIвчва. Асквш I918, октябрь а 29 йакIвшаз анхагIвчва йгьи чкIвыныргIа рсоюз йапхъахуз Россия асъзд апны чкIвыныргIа ркоммунист союз гIандыршатI. Асквш 1924 агIан Ленин Владимир Илья йпа адуней анихIваджь акомсомол «ленинский» хIва йапхьун. Асквш 1926 йгIашIарышвта Всесоюзный Ленинский Коммунистичекий Союз Молодежи (ВЛКСМ) хьзы нкъвнагитI. Драмтеатр апны ари аорганизация нхарата йакIвнаршаз, чкIвыныргIа рпатриот бжьара йшацхърагIуз гIазгвалашвахыз щардагIвын. Пост №I чкIвыныргIа рпатриот бжьарала аквта апны йыздынхалуа асабиква ВЛКСМ абаракъ азал йангIаргыл айззара гIахъыртIытI. Ажва зыртыз КЧР а-Правительства а-Председатель Къардан Мурат КЧР а-Хъада Темрезов Рашид, АуагIа Айззара (а-Парламент) рыхьызла аюбилей гвыргъьахъвла йгIайззаз драйхIвахIвтI, комсомол акъраль атурых, чкIвыныргIа патриотра рылата йгIадзныргылра, аинтернационализм уысква рпны мгIан ду амата штшауацIнахыз гIаликIгIатI. -Комсомол аршIыйагIвчва, з-Псадгьыл ахъазла згвы зхьуа, йджьгару, йынхагIву ауагIа аднакIылтI. Ауи йалаз ачкIвынчви ахIвсси рдунейпшыща щаквзыргылыз, рабабара, ращтаныкъвара, рацынхара зрыбагъьуз апхьартата йырзалтI, ацIабырг йазнабжьатI. Ауи азаман хIкъраль апны агородква гIанзыршуз чкIвыныргIа ркомсомол уыхвараква тшанауацIырхуаз тлаханын. Ауаса йынхуз чкIвыныргIа рынхараква уагIахъа щарда ъабзазауа хIкъраль айгIайра амшгIвыра хьапщь хIарыфла йаныпI. ЙалкIгIата, анамыца-фашистква йырпшIагылата айгIайра гIатызгаз Абашта айсра Ду аветеранква, акомсомол йалаз ахIбачва рфырра зшIуырпшуаш гьаъам,-йхIватI Къардан Мурат. Айззара апны «Карачаево-Черкесия» ГТРК ажурналист Къвапсыргьан Зарема йылрыхIазырыз «Комсомол асквш 95» видеофильм гIадырбатI. Ажурналист лынхара апны Совет заман агIан хIреспублика ажвлара уысынкъвгагIвчва шынхуз, хIышта апны акомсомол атурых, чкIвыныргIа шацынхуз, хIкъраль атшауацIыхра къарута йаларцIуз даквчважвитI. КЧР АуагIа Айззара (а-Парламент) адепутат, Байрамыкъва Халимат лыхьыз зхьзу ареспублика уагIахъа библиотека адиректор, Прикубань ВЛКСМ арайком йапхъахауа секретарьта йынхаз Хапчаев СальыхI комсомол ашвапха амагIны шдуу, атурых уызшIпшы ауаш уыс бзи щарда шгIалахаз гIаликIгIатI. -Жвасквша пхьадзарала тшауацIызхыз акомсомол йгIахIрысабап ауаш швапха пшдза апщылапI. Совет Союз апны унашвахъцIара, ауагIа рдуней пшыща щаквзыргылуаз апхьартата абзазара йалаз акомсомол акъральыгIва ахачIв хъадаква йрылапхьадзаз ауысква рырхъйара апны йанакIвызлакIгьи йджьгарын, атшауацIыхра мгIва йтагылан. Йшбергьльу апшта, Къарча-Черкес аобласть комсомол организациягьи ахачIвква йаназаману йархъйауа, ауагIа йрыхъвуз, йджьащахъваз нхара акIвнаршауа ВЛКСМ йалан. ЧкIвыныргIа рыгIзара-бжьара хIхачIв хъадаква йрылан. Насыпта йыгIбуз ари анархарала ауысква райхIара ъагIахIдахIвуаз акIвпI. УахьчIва хIреспублика апны уыс бзи щарда акIвшитI, ауаса акомсомол ашвапха гIахIрысабапыргьи йгьчIыдахушым ,-йгIаликIгIатI Хапчаев СальыхI. Айззара апны йгIачважваз Чекркесск горком а-ВЛКСМ йапхъахауа секретарьта йынхаз Татаршвауа Рем акомсомол атурых даквчважвауата данстудентыз угIалагата нхарата йакIвйыршаз ауагIа йгIарылайхIватI, дызцынхаз рыхьызква гIайхIватI. Ауи йшгIаликIгIазла, акомсомол йахъвдаквыз ахачIвква йаназаману йамырхъйауата йгьгIанымхузтI, аунашвачпагIвчва анхагIвчва хачIвы рыхъвдаквырцIазарквын тащахIаракIгьи гIанымшауата ауысква ракIвыршара зынла йджвыквылуан. -Акомсомол йапщылаз, ауыс бзиква гIаузыргвалашвауа анхараква щардапI. Ауат йрыуапI Черкесск апны сабигIзарта ауыхварагьи. Ауи ззысхIвауа, акомсомол аунашвачпагIвчва йдыргылуаз ахачIвква заджвгьи дырмапшIагылуа йацацхърагIауа анхараква акIвдыршун. Йапшым ауысква йрыдкIылаз чкIвыныргIа гIащара рымдыруата йынхун, ауыхвагIвчва йырцхърагIун. Аинститутква рпны йгIандыршуз ауыхвара отрядква шпанхуз? Сара Ставрополь санапхьуз ауаса чкIвыныргIа адскIылырныс сылшатI. Агвып йапшым ауыхвара нхараква акIвхIыршун, агородква ртшауацIыхра хIацхърагIун. Акомсомол уысква ъадзакIвсыршаз азаман ауацIа уагIа гвыбзыгъа срабадыртI, срыцынхатI,-йгIайгвалашвахтI Татаршвауа Рем. Айззара апны датшагьи йгIачважватI Къарча-Черкес обком ВЛКСМ йыгIвбахауа секретарьта йынхаз Уаз Анатолий, КПРФ Къарча-Черкес арайком йапхъахауа асекретарь Быджь Исмель, Къарча горком ВЛКСМ йапхъахауа секретарьта йынхаз Перепелица Николай, чкIвыныргIа руысквала КЧР а-УнашвахъцIарта аунашвачпагIв Эркенов Анзор дотшагьи щардагIвы. Ауат ВЛКСМ йаднакIылыз ачкIвынчви ахIвсси аколхозква, азаводква шгIандыршуз, агородква шыруыхвуз. Абашта айсра Ду йалата йшайсыз гIаргвалашвахтI. ГIачважварипхьадза ауатыкв йгIаталуаз аршIыйагIвчва, агIахIвыгIвчва гвыпква айззара йалаз рыла дырпшытI. «Любава» къазакъ ансамбль, «Эльбрус» къральыгIва гIахIвра ансамбль, ареспублика филармония къральыгIва гIахIвра театр, КЧР-ла гIатгара зму артист Напщ Аминат, ашвахIвагIвчва Дауров Марат, Булатуков Муслим, Вечера Татьяна пшдзата йгIахIвытI, унашх гIащтIызхуа ашваква рхIватI. Кълыч Руслан