ХЪМАШТЫЛРА ТУРНИР АКIВШАТI

Апрель а 20 АлбыргIан йаныргIалу астадион апны Абаза муниципальна район администрация йгьи «Алашара» жвлара организация ргIаджвыквцIарала йцIасхаз айсыгIв-интернационалист НакIвахв ХIасин Къарабит йпа йхъмаштылра йазынарху футболла анкъвакъвра акIвшатI. Ауи йалан асквшква 2003–2006 ййыз абаза кытква йгIартыцIыз апхьагIвчва. Аспортсменква рапшIагылра апны Къарапагва кыт йгIатыцIыз апхьагIвчва апхъагылара гIатыргатI, йгIвбахауа – ЙынджьыгьчкIвын афутболасыгIвчва, йхпахауа АлбыргIан ачкIвынчва йыргатI. СынчIва анкъвакъвра Абаза муниципальна район йаланакIуа акытква ракIвымкIвагьи Къазма йгьи Хъвыжвду агIащтийыгIвчвагьи алан. Анкъвакъвра апны рахIа бзита тшгIазырбаз афутболасыгIвчва гIалыркIгIатI. РахIа йагъьу хчагIвыта тшгIайырбатI Къвач Мхвтар (АлбыргIан кыт), йагъьу вратарьта гIвыджь гIалыркIгIатI – КIЬЫЩМАХВА Ислам (Къарапагва кыт) йгьи ЦЕКЪВА Малик (ЙынджьыгьчкIвын кыт), ХВЫНА Амиран (Къарапагва кыт) зымгIва йрагъьу дбомбардирхатI, зымгIва рацкIыс йласу футболасыгIвта ЦЕКЪВА ХIарун (ЙынджьыгьчкIвын кыт) дгIалыркIгIатI. «Алашара ркубок» футболла анкъвакъвра апны йапхъагылагIвхаз Къарапагва ргIащтийыгIвчва йрыцыргатI. АлбыргIан кыт гIаныршара адепутатква йгIалыркIгIаз афутболасыгIвчва согIата ахча рквнадыргатI. Анкъвакъвра апны йапхъагылагIвхаз агвыпква амедальквала, акубокквала йгьи аграмотаквала рыхьыз рхIватI.