ХIЫЖВЛАРА АПНЫ РТЫП РАУРА АТАХЪЫПI

«Абилимпикс» – зылшараква ахъарысу ачкIвынчви ахIвсси ръачIвагIа азъазара ъагIадырбауа анкъвакъврапI. Асквш 1953 агIан Япония апны йапхъахауата аныкъвадыкъваква анкъвакъвтI. Ауи амщтахь ари ачемпионат арахьарат акъральквагьи алалуа йалагатI. Абилимпикс Адуней федерация къраль 46 руацIала анкъвакъвраква акIвнаршитI. Россия асквш 2014 йгIашIарышвта ауи йалалтI. Арат амшква КъарчаЧеркес Республика ауацIала «Абилимпикс» чемпионат алхра тур жвплощадкIакI рпны 12 нархаракIла йакIвшатI. Черкесск йаныргIалу Индустриально-технология лицей апны «Сварочные технологии» йгьи «Ремонт и обслуживание автомобилей» нархараквала гIвплощадкIакI нхатI. ЙапхъагылагIвхаз ноябрь а 20 йгIашIарышвта ноябрь а 23- дза йакIвшуш Россия анкъвакъвраква йрыланакIуаштI. Ачемпионат хIреспублика йауата 62-джь райхIа студентти апхьагIвчвати йалалтI. Апрограмма апкъ йтата амастерклассква адыргалтI. «Абилимпикс» чемпионат Индустриально-технология лицей адиректор Байрамуков АхIмад йгIахъитIытI. – СынчIва йпщынхауата чемпионат акIвхIыршитI. Анкъвакъвра гвы швчпата швъагIалалыз швабыжта хъацIара дута йспхьадзитI, ачкIвынчва апхьара сахIатква рагIан дыррата йшвауызи швапхата йшвырхIази уахьчIва йшгIашвыхъвахуаш йазхъасцIитI, – йхIватI Байрамуков АхIмад. «Сара йсзычпитI!» - хIва ухъа йаухIвхырныс йанбаргву гIаншитI, ауаса анкъвакъвра йалалыз ачкIвынчва ага рызгIвадара лшараква ахъарысызтынгьи, хъацIара гIадырбауа зымгIва шырзычпауа гIадырцIабыргырныс ахъазла ачемпионат йалалтI. Ауат абзазара йгIахьымшвауа дасузлакIгьи ъачIвагIа йымата, ажвлара йрылата йшбзазуш тшаквдыргIапситI. ЙызгIвадам ачкIвынчви ахIвсси рхъа зларкIуаш ъачIвагIа гIацIыргара ахъазла цхърагIара драдзара магIын ду амапI. Ачемпионат йгIадгылыз арыпхьарали наукали КЧР а-Министерства ъачIвагIа арыпхьарала ахъвшара аунашвачпагIв Меремкъвыль Али анкъвакъвыгIвчва йразыра ажваква рзынайырхатI, рдырраква зымгIва абгата йшгIадрысабапуаш райхIвтI. «Абилимпикс» мгIвайсра мурад хъадата йаму арабоча ъачIвагIаква ауагIа йрылагара, ауат рыхв щтIыхра, анхартаква рпны аныкъвадыкъваква нхара тып рзалхра, ауат ъачIвагIадырра рымата нхара йаларгара, аныкъвадыкъваква рхъа ахъырымбгIауата ажвлара йшахъвыкIу рыладырхIвара акIвпI. Ари амш алицей йгIадгылыз хIреспублика аъачIвагIа гIацIгартаква ргIащтийыгIвчва апрыслыгIвчва йгьи амашина моторква зырчIаджьуа зылшараква ахъарысу астудентква анкъвакъвтI. Ачемпионат апны экспертта йаъан Ермоленко Сергей, Шаркова Светлана, Магадова Реджина, Карасов Темиржан, Айбазов Абубекир, Семенов Алик, Дзыуа Владимир, Ткаченко Игорь, ауат дырпредседательын квпшыра щардала йалу а-Квта аунашвачпагIв Рыковский Владимир. Ачемпионат йалаз ачкIвынчва атехника ашварагIварадара йанахагIваза амщтахь анкъвакъвраква йрылагатI. Рыковский Владимир йшихIвазла, анкъвакъвра апны ркъару абгата йгIадырбарныс гьрылшум, йатахъу аъамапсымаква зымгIва гьрызхъум, абжараква щардапI. Ага ауаса йаъазтынгьи, цIыпх «Абилимпикс» чемпионат апны Къарча-Черкес Республика ащтийыгIвчва Россияла йгIвбахауа гыларта гIатыргатI. Ауи швабыжта йгIатгара дупI. ХIапхъахьыла ауат абжараква дрыдзырныс йайгвгъитI. СынчIва «Абилимпикс» анкъвакъвра Къарча-Черкесла алхра тур апны «Ремонт и обслуживание автомобилей» нархарала ГОНЧАРОВ Иван – йапхъахауа, ЭРКЕНОВ Замир – йгIвбахауа, ХАПАЕВ Арсен йгьи БОСТАНОВ Алим – йхпахауа агылартаква ргатI; «Сварочные технологии» нархарала ХАПАЕВ Руслан – йапхъахауа, ЛЕПШОКОВ Шамиль – йгIвбахауа, ВЫКОВ Арсен – йхпахауа агылартаква рквнадыргатI. РъачIвагIа азъазарала анкъвакъвраква здырраква цIолу, зуыс йазъазу аъачIвагIагIвчва гIаурыбергьльырныс йацхърагIитI. «Абилимпикс» чемпионат зылшараква ахъарысу ауагIаква хIыжвлара апны ртып гIарауырныс йацхърагIитI, ауат нхарала йаднагалитI. Россияла анкъвакъвраква йрылалуаш хIреспублика ачкIвынчви ахIвсси апхъагылара гIатыргарныс рзыхIтахъпI.