ХIУАЧIВЫМШ ЗРЫПШДЗУШ АДЫРКIЫЛИТI

КЧР а-Хъада йпроект «Кадровый резерв» афинал йалашваз агIважви жвежвыгIв йрыуата жвипщыгIв йагъьта йгIалыркIгIатI. Анкъвакъвра йапхъагылагIвхаз йапшым анархараквала рдырраква гIадырбара йахъазымкIва, рхъатала йлырхыз апроектквагьи рхчатI, ауат абзазара йшаларжьуаш, ауагIа йызларыхъвуш гIархIватI. КЧР а-Хъада ТЕМРЕЗОВ Рашид «Кадровый резерв» анкъвакъвра апхъагылагIвчва дрынйатI, пхата драйхIвахIвтI, рхъатачIв проектква тшрыхайыргIвазатI. – ХIреспублика ахъазла магIны зму апроект дырра цIола зму, зышта акъагIара йазынхауа, ауагIа рбзазара агъьчIвра йацхърагIарныс йхIазыру аъачIвагIагIвчва аднакIылтI. Швари хIари абзазара йгIалалуа ашIыцраква тшрыквхIыргIапсуамцара апхъала хIчIвырхъара ахъазла зуыс йазъазу аъачIвагIагIвчва адхIкIылра атахъыпI. «Кадровый резерв» проект а-Устав йшгIанахIвауа апшта, йапхъагылагIвхаз зымгIва нхарала йадгалчIвпI. УахьчIвала, ауат рызджьакI унашвахъцIара ъанатIата йрыхIтуаш хIазхъвыцитI, – йхIватI Темрезов Рашид. Ауи «Кадровый резерв» проект йапхъагылагIвхаз ачкIвынчви ахIвсси рынхараква тшрыхайыргIвазара йахъазымкIва, аргваныта драбадырра ахъазла ужвыгьи дшрынйуш гIаликIгIатI. Анйара йалаз аъачIвагIагIвчва «Кадровый резерв» проект сабапра шалу рхIватI, ауи апкъ йтата йырхчаз анхараква йгIарыквчважватI. Ауат анхараква йрыуапI атуризм, арыпхьара, апсабара хчара, аинвестиция политика, астрономия, цифровизация, физкультура йгьи спорт нархараквала апроектква. «Кадровый резерв» проект йапхъагылагIвхаз БОКАРЕВА Анастасия Александр йпхIа лынхара зылшараква ахъарысу акъральгIвчва йрыцкIра йазынархапI. АпхIвыспа йшылхIвазла, лпроект апкъ йтата аныкъвадыкъваква рыхъазла йгIахъыртIуаш аршIыйара мастерскойква рпны йапшым анапIлачпара пкъыгIваква ргIаныршара йазырбжьуштI. Ауат хIреспублика акурортква рпны йгIадырбуштI йгьи йызгвапхауа йырхвгIарныс рылшуштI. Апроект апхъагылагIв КАНАМАТОВ Аслан йлихыз агвчIагIвра проект Черкесск город асанитар аъаща йазынархапI. Ауи йшипхьадзауала, агород апны йазыркIкIуа анышвкъвара атехника йтнагитI. Ауаса дара ауагIагьи йъабзазауа ацкьара рхчара атахъыпI. АчкIвын йпроект Черкесск апны атехника йтнагауа акIвымкIва, йгIанхауа анышвкъвара кIьыдата йшазыркIкIуаш йгIаквчважвитI. Зеленчук станица йапхъахауа аквтанай апхьарта математикала йгьи алгебрала арыпхьагIв КАПАЛКИНА Юлия Александр йпхIа ари йашIырпшу анкъвакъвраква рпны йгьызным айгIайраква ъадзагIатылгахьу. Асквш 2018 агIан Россия апны йагъьу ажвыхв арыпхьагIвчва рпхьадзара далашватI. Ауи КЧР а-Хъада Темрезов Рашид дызхалыргIвазаз апроект арыпхьара нхараква рагъьчIвра, ршIыйара талант злу арыпхьагIвчва йрыцкIра йырзынархапI. ХIреспублика аунашвачпагIв ауи лпроектгьи арахьарат йгIачважваз рынхараквагьи йгвапхатI.
  ТЕМРЕЗОВ Рашид щ ард а мцIуата КЧР а-Правительства йрайгваз апроект йалауреатхаз ужвыгьи пщгIвы – НАЗАРОВА Лилия, МЕДОВЫЙ Валерий, ГРИБКИН Андрей, БАЙРАМУКОВ Науруз хIреспублика апхъаламгIвайсра йазынарху апроектква рлыхра йъазычпу шигвапу райхIвтI. Ауи аъачIвагIагIвчва ргвгIанаграква дрыздзыргIвытI, ауат нхарала йадыргалра йахъазымкIва, йапшым апроектква рлыхра апны йшрыцыркIуаш йхIватI. – Швара йапхъахауата шванызба дырра бзи шшвыму, йапшым ауысква швшырзычпу, швъачIвагIаква швшрызцIабыргу гIасгвынгIвытI, апроект джьащахъваква ъалышвхыз уыс ду швчпата йспхьадзитI, – йгIаликIгIатI Темрезов Рашид. Назарова Лилия «Цифровая трансформация систем госуправления на территории Карачаево-Черкесской Республики» проект лылхтI, Медовый Валерий йпроект афизкультури аспорти ртшауацIыхра йазынархапI, Грибкин Андрей «Внедрение единой заявки на подключение к сетям инженерно-технического обеспечения в электронном виде» проект дахIврала йхчатI. Байрамуков Науруз йпроект хIреспублика апны аинвестиция нхараква рагъьчIвра йазынархапI.  КЧР а-Хъада Темрезов Рашид йащтагIайуаз атшын ужвыгьи пщыгIв лауреаткI рынхараква тшрыхайыргIвазатI. Анйара йалан йджьгару чкIвыныргIа апроект нхараква йырзыбжьара йазалху апроект лызхыз Аджиев Мухаммат, Черкесск апны кIьыдата анышвкъвара азкIкIра йазынарху апроект зрыхIазырыз Канаматов Аслан, КЧР апны зуыс йазъазу, ршIыйара злу арыпхьагIвчва ррыхIазырра йазынарху апроект зчIву Капалкина Юлия, ршIыйара злу чкIвыныргIа ртшауацIыхра знархару хIреспублика апны КВН мгIвайсра йацкIрала апроект лызхыз Эдиев Руслан ргIаджвыквцIараква джьащахъвапI. Темрезов Рашид йгьи КЧР а-Правительства анхагIвчва аъачIвагIагIвчва шIаква рпроектква сабапра гIаргуата абзазара йалажь шауаш гIархIватI, ауат ареспублика йахъвуш нхарата йгIалыркIгIатI. ХIреспублика аунашвачпагIв «Кадровый резерв» проект апхъагылагIвчва рдырраква, рылшараква ъагIадырбуш нхара тыпла йадгалра шатахъу йрыбагъьатI