ХIТУРЫХИ ХIЦIАСКВИ ЙЫРХЧАГIВЫПI

«Россия – моя история» музей-гIарбарта комплекс (Ставрополь) апны «Абаза» Ставрополь край абазаква руагIахъа-культура автономия (НКА) агIаджвыквцIарала йхъырхыз, ашвъаквала йалу «Абазины Ставрополья» фильм апрезентация акIвшатI. Ауи йалан Ставрополь край администрация ауагIахъа уысквали казачествали акомитет ахъвшара знапIыцIу ЗИНЕВ Сергей, Ставрополь город администрация ажвлара шварагIварадарала акомитет ауагIахъа-культура тшауацIыхра уысквала ахъвшара анхагIвы ТКАЧЕНКО Геннадий, Ставрополь край культурала а-Министерства агIащтийыгIв ОДРИНСКАЯ Ирина, «Абаза» Ставрополь край абазаква руагIахъа-культура автономия аунашвачпагIв ЧАГВА Армида, Кисловодск, Невинномысск городква, Подкумок, КочубеевскIа кытква йгIартыцIыз асасчва, ауагIахъа уысквала, ажвлара коммуникацияквала йгьи печатьла КЧР а-Министерства, ажвлара организацияква рщтийыгIвчва, Ставрополь йбзазауа абазаква. Ставрополь абазаква йгIарыквчважвауа афильм йапхъахауата йхъырхыз нхарапI. Ауыс майрата йыгьрылымшатI, абаза тгIачваква шбзазауа, йшынхауа ахъырхра йахъазымкIва, хIуагIахъа ртурыхгьи гIадырбара атахъын. Ауи рчпара ахъазла архив швъаква тшырзынадырхатI, апхьахьаква рынхараква гIадрысабаптI. – Ставрополь край йту абазаква йгIарыквчважвауа фильм ахъыхIхырныс анхIтахъха ауыс зынла хIзаламгазтынгьи хIмурад хIмырхъйакIва хIгьымтынчтI. Аргваныта хIызцынхауа ауагIахъа уысквали казачествали акомитет анхагIвчва ари ауыс хIшащту андхIырдыр афильм ахъыхра йшацхърагIуш гIархIватI. ХIъаныз агородкви акыткви рпны хIынхара йаквыдзыз ахъвыкI администрация йгIаунащттI. ЙгIаджвыквхIцIаз ауыс хIацацхърагIумца ацIыхъвадза йнахIырдзатI. ЖванзкьыгIв райхIа афильм йапшхьатI, ауи шыргвапхаз рхIвауата ансимшгьи йхIагIитI, – лхIватI айззара гIахъылтIуата Чагва Армида. Ауи абазаква йгIарыквчважвауа афильм ахъыхра йацхърагIаз дшырзыразу гIалылкIгIатI. Афильм йапхъахауа ахъвы анхIазырха «АТВ» Ставрополь телеканал апны сынчIва январь агIан йгIадырбатI. Ауи амщтахь Къарча-Черкес йгьи Абхазия Республика абзазагIвчва йырбатI. УадыргIвана «Ставрополь 26», «KAVKAZ MUSIС» «Youtube» каналква йгIатарцIатI. Ауи йапшыз афильм шыргвапхаз гIалыркIгIатI. Абхаз-абаза Дуней конгресс ЙхIаракIу асовет апредседатель Эгьзакь Мусса айззара апны йгIазпхьаз йтшазынархара апны афильм ахъазла араса йхIвитI: «Абазаква хIтурых, хIуагIаква йгIарыквчважвауа афильм пхарала йырчвыпI. Ауи йалу афырква бзазарала рыхьыз дрыпшдзара йахъазымкIва нхаралагьи йшвапхапI. Ауат дзачIвызлакIгьи хIуагIахъа рхабзаква, рцIасква, ркультура рхчауата йынхитI, йынцIитI. ХIтурыхи хIыбызшви рхчара хIуагIахъа рпахь йгылу ахачIв хъадаква йрыуапI. Ауи акIвпI йаргьи Абазара амагIын хъада узырдыруа. «Абазины Ставрополья» фильм йапшу апроектква абазаква йъабзазалакIгьи руагIахъа цIасква, ркультура, рыбызшва рхча шауаш удырдыруата абзазара йаларжьитI. Ауи гIахIдахIвра ахъазла хIыгвлачвагьи хIрангIалуа хIбзазара атахъыпI. Ставрополь йбзазауа абазакви арахьарат ауагIахъаква йгIарылцIыз ахIбачвагьи чкIвыныргIагьи айгвара пха рызбжьата йшащтаныкъвауа, йшацацхърагIауа ари афильм йхъаунарцIитI. Ауи ахъызхыз гвыргъьарамкIва, хайырымкIва закIгьи швумырбан». Зинев Сергей Ставрополь йту абазаква йацзакIыта руагIахъа уысква апхъала йшнадрыскIьауа гIаликIгIатI. – Араъа йбзазауа абазаква рпроект ауагIахъа уысквали казачествали акомитет йакIвнаршаз анкъвакъвра апны йгIадырбатI. Ауи йазалырхыз асубсидия афильм анхъырхуаз йгIарыхъвахтI. Абазаква йгIарыквчважвауа афильм схъатала йызнымкIва сапшытI. Ауи шхъырхыз сгвапхатI. Абазаква нхагIвымзарквын, ауи гьгIарыдамхIвуашызтI. ХIкомитет апхъахьылагьи абазаква магIны ззырбауа ауысква радгалри ракIвыршари йацнакIуаштI, – йгIаликIгIатI Зинев Сергей. Айззара йалаз Ставрополь край абазаква йгIарыквчважвауа афильм ужвыгьи зны йадырпшытI. Асасчва ауыс гIаджвыквызцIаз, абзазара йалазжьыз Чагва Армида, ауи йлыцынхауа агвып йшырзыразу рхIватI. Кисловодск йауу амузыкант шIа Хъабльахь Рустам йгьи Невинномысск йгIатыцIыз «Баракьат» гIахIвыгIвчва гвып рыршIыйарала айззара дрыпшдзатI. Афильм хъызхыз ачкIвынчва йъаныз абаза унагIваква, йзачважваз ауагIаква шыргвапхаз гьцIарымкIытI. Арежиссер-оператор Жимаев Иван абазаква дъарабадырыз шигвапахаз гIаликIгIатI. – Абаза унагIва уантшкIаралра йапхъахауата асас пхата дшдрайгвуш, айшва шизыхъыргIвуш йазыгвжважвитI. Ауи ацIасква швабыжта йсгвапхатI. Датшагьи абазаква рпхьадзарала ймачIызтынгьи, хвду ззырбауа, йгвыбзыгъу уагIа джьащахъва рщардапI. Ауат йъабзазауа акрай агородкви акыткви руыс бзиквала йдрыпшдзитI, йдыркъагIитI, – йгIаликIгIатI Жимаев Иван. Афильм асценарий зрыхIазырыз, «Алашара» АНО ахабар-аналитика хъвшара аунашвачпагIв ЧкIала Георгий йгIайззаз тшырзынайырхауата йгIаликIгIатI: «Афильм йалу афырква нхаралагьи бзазаралагьи бзирата йырзухIвуш щардапI. Ауат дзачIвызлакIгьи йгIарыквчважвауа фильм ахъухыргьи йгIауырбуш, йгIаухIвуш уауаштI. Афильм анхъыхIхуаз йгIахIырчважваз ауагIаква рбзирала ауыс гIахIдахIвтI, – йгIаликIгIатI ЧкIала Георгий. Айззара адгалагIвчва афильм ахъыхра йацхърагIаз ахIбачвагьи ачкIвынчвагьи аразыра ажваква рзынадырхатI, ачвахъабага согIаква рырттI. Афильм йалаз йрыуата ауи анхъырх амщтахь дута уаквчважвушта закI гIаздахIвызгьи ргIатгараквала йрайхIвахIвтI. Ауаса, змакъымла афильм гIалагауа Хъабльахь Рустам «Кавказ – Наш общий дом» проект далашватI йгьи «Красота народа» ахьызта фильм ауи йыхъазла йхъырхитI. КочубеевскIа абзазагIв Гумба Михаил Россия Федерация аправосудия атшауацIыхра, акъральгIвчва рхвитнагIаква хчара къару ду ъалайцIаз ахъазла «Ветеран судебной системы» ЧIахIра гвплацIа гIайквнадыргатI. Чагва Армида Ставрополь йбзазауа абазаква рыхьызла ауат кIьыдата драйхIвахIвтI, ачвахъабага согIаква рылттI. «Абазины Ставрополья» фильм акрай агородкви акыткви рпны абаза тгIачваква датша уагIахъа йрылата йбзазаузтынгьи рхабзаква, рцIасква, ркультура, рыбызшва шдымрыдзуа, айгвара пха рызбжьата йшащтаныкъвауа йгIаквчважвитI. «А