ХIЦРИ АПХЬАРТА, ХIУЫЗГIАЙХТI!

Йапшым агIаншара джьащахъваквала йырчвыз апхын алгатI. РахIа йгвыргъьахъв дуу, асабиква зызпшуа, йгвлахIару, рнашх гIащтIызхуа сентябрь а 1 – адыррраква ры-Мш – гIаталтI. ЙзызхIаз, чIарачIата йгIвычу асабиква, ан-абачва, ададаква, ананаква, арыпхьагIвчва рнашхква щтIыхта, йгвыргъьауа апхьартала йцитI. ЦIабыргыта, сынчIва апхьара сквшы шджвыквлыз анахьанат асквшква йыгьрапшым. Ансисквша апхьагIвчва йрыцта апхьарта апшцIа зырчвуаз ан-абачва, асасчва гьщардагIвымызтI, йгьымгатI амакъымква, ашваква, йгьауырамызтI агIачважвараква. Ауи йашвхIаусыгIвахаз адунейла йгIаншаз акоронавирус згIва ауагIа, йалкIгIата асабиква, ачвыхчара акIвпI. Кълыч Рауф йыхьыз нкъвызгауа Красна Восток кыт аквтанай апхьарта апшцIа йакIвшаз агвыргъьахъв йгIазшIыртыз йапхъахауа акласс йгIацIалыз а 14-гIв йгьи ауат ран-рабачва, й-11-хауа акласс йцуш ахгIвычкIвынчва, арыпхьагIвчва ракIвпI. Йапхъахауа акласс йнашылуаш асабиква ранчви рабачви йрыцта, ахIврапшдзаква рнапIыцIакIта, ргьагьара йгIаншауа гIаргвнымгIвуа йалагылан. Апхьарта апшцIа апны лпа Азамат йпхIа хвыц Амия длыцта сызпшIашваз Кълыч Зарема йшгIасалхIвызла, лпи лтаца Аминати пщгIвысабичва рымапI. Ауат йрахIбу сынчIва апхьарта йыцIалуа Амия лакIвпI. Ауи йлыщтагIайуа Камила – хвысквша, Ренат – пщысквша, Медина хвыцгьи хымызкI йыртапI. – Асабиква ракIвпI хIыззбзазауа, АлахI йгIайхчарагIатI. ГвыргIвара дута йхIыму азгIва хъатакIла йхIыгIвсыргIатI, – лхIвитI анду. – АрыпхьагIви анабачви абагвынгIвыра, ацацхърагIара рызбжьазтын, асабиква дыррадъа йшгIанымхуш чакь гьазгIазгуам. Йхъаду – йызгIвадазтI, ргвыргъьахъв апызкъьуш гвыгIвмыгIвракIгьи йашIамшварагIатI. Ауатыкв йгIаталыз арыпхьарала апхьарта адиректор лцхърагIагIв Аджьбакь Инга ХIамидби йпхIи Нагай Зурида Амин йпхIи йгIайззаз апхьара сквш шIыцла пхата йрайхIвахIвтI йгьи напIасрала йгIадрайгватI йапхъахауа ачIвырхъаква атызпуаш апхьагIвчва хвыцква. Ауат рарыпхьагIв Аджьбакь ФатIима МухIамад йпхIа дрыцта йгIалагылтI. Россия Федерацияла ЧIахIра зму арыпхьара анхагIвы, апхьарта адиректор Джьмакъвыл Басира Лиуан йпхIа агвыргъьахъв йалаз тшырзыналырхатI. – УахьчIва хIызтагылу азаман йаквыргIапста агвыргъьахъв акIвхIыршитI, хIгIачважвараква гьауыразлушым. Йапхъахауа акласс йгIацIалуа асабиква тшырзынасырхара стахъыпI – швара араъа щардагIвы шврабадыруаштI, адырраква рымгIва швыквызцIуш йапхъахауа шварыпхьагIв швлынйуштI. Дырра шшвауаш хIащтата, швызгIвадара шхчахуш хIазхъвыцуата, йхIылшуз зымгIва хIчпатI. ЙтынчызтI швдуней, хIхъа зладухуш сабита швалыргIатI. Апхьарта ашвква швзытIпI, хайырла швнашылтI. Арат асабиква гIаздыз ан-абачва, андучва-абадучва ажва пхаква швзынасырхара стахъыпI. Асабиква щардала швырхъарпазтI, швгIапсара рдыруа швбзазаргIатI. Йжвизхауа акласс йапхьуш мачIыгIвпI, 3-гIвы ракIвпI йнадзауа. Ауаса ахыгIвгьи йжвабахауа акласс бзидздзата йгIалгатI, йапшым аспорт квпшыраквала апхьарта ахьыз дыргатI. ЙхъасцIитI апхьагIвчва зымгIва швапха бзи шшвдырбуш, – лхIватI Джьмакъвыл Басира. Агвыргъьахъв йалаз зымгIва хI-Псадгьыл ахъазла зхъа щтIазцIаз афырква гIаргвалашвахуата хъмаштылра дакъикъа йгылтI. Йжвизхауа акласс апхьагIвчва Лачвыш Алим йгьи Быджь Шамиль апхьарта йгIвбахауа аэтаж йаныргIалу Абашта айсра Ду йаладзыз рыхьызква зну абльын ащапIы ахIврапшдзаква щтIарцIатI. Йапхъахауа акласс йгIацIалыз ахвыцква рарыпхьагIв Аджьбакь ФатIима МухIамад йпхIа дырцхърагIумца ауыса хвыцква кьазула йгIарыпхьатI. АхIбачва ахвыцква йрыздрыхIазырыз асогIаква анрыртуаз ауат ргвыргъьара гIвына гьамамызтI. Дара ахвыцквагьи й-11-хауа акласс апхьагIвчва гьырхъмаштылтI, ахIврапшдзаква рырттI. Йапхъахауа акласс йгIацIалыз, адырра амгIва йтагылуаш ахвыцква уыса сатырла тшырзынайырхатI й-11-хауа акласс апхьагIв Быджь Шамиль. Ауи «адырра ашв гIазтIуа» ацIапха Джьаней Адмир хвыц йнапIыцIайцIатI. АпхьагIвчва йрайхIвахIвтI акыт администрация ахъада ХвытI Игорь, ан-абачва рыхьызла Лачвыш Надира, арыпхьагIв Аджьбакь ФатIима. Йжвизхауа акласс апхьагIв Нагай Радмир йыжвгIвахъа дыквчIвата ауадгьына лрыхIвачвитI йапхъахауа акласс йыцIалыз Аджьбакь Амина. Йапхъахауа акласс йыцIалыз асабиква рарыпхьагIв Аджьбакь ФатIима МухIамад йпхIа рапхъа дгыла апхьарта йхпахауа этаж йаныргIалу акласс йазцатI. Ауат рцIыхъвала й-11-хауа акласс апхьагIвчвагьи йырзалырхыз акласс йнашылтI. Сквш 28 раъара апычIв классква азрыпхьауа, быжьгвыпкI гIацIызщтхьу, швапха пшдза зырхIахьу арыпхьагIв гвымчIва Аджьбакь ФатIима МухIамад йпхIа ахвыцква, ажва тIатIаква рзыналырхауа астол йадзхъалырчIватI. Ауи йшгIасалхIвызла, ахвыцква райхIарагIв асабигIзартала йгIайыз йрыуапI. АрыпхьагIв асабиква аргваныта драбадыртI, апхьара сахIатква шадылгалуаш йахалыргIвазатI, тшъарджвджвуш, йъахъвмаруаш, йъачуш длырбатI, апхьарта атурых ралхIвтI. ЙырзымшрахатI асабиква, ауат хIзыргвыргъьуш, хIызладухуш уагIа пшдзахарагIатI.