«ХIШIЫПIА АУАГIАХЪА ЦIАСКВА ШВЫРХЧАГIВЫПI»

Апечать а-Тдзы апны йакIвшаз апечать а-Мш артлапIара йалан ауагIахъа уысквала, ажвлара коммуникацияквала йгьи апечатьла КЧР аминистр ХАПИШТОВ Мурат, ауи йзаместительква ХВБИ Ислам, ГУЗКО Сергей, а-Министерства ахъвшара аунашвачпагIв КОРКМАЗОВ Артур, «Русгидро», «Роспотребнадзор», «Росгвардия», асуд приставква, КЧР АуагIа Айззара (а-Парламент) рпресскъвырльыкъвхартаква рунашвачпагIвчва, хIреспубликала йгIацIцIуа агазетква, ареспублика книга гIацIщтырта рынхагIвчва. КЧР ажурналистква радкIылара апредседатель ТхIагъапса Уывжыкъва агвыргъьахъв гIахъитIуата ауи йалаз а-Печать а-Мшла пхата драйхIвахIвтI йгьи йгIадгылыз аунашвачпагIвчва дшырзыразу йхIватI. – Ажурналистква йанакIвызлакIгьи ажвлара ауацIала йыншауа швахагIвазапI, ахабарква ауагIа йырзынашвырдзауата хIшIыпIала йыншауа апсахра бзиква, ашIыцраква дшвырдыритI, швгIвыраквала ауагIахъаква рацзакIыри райгвари шврыбагъьитI, авластьи абзазагIвчви хIапызщылуа цхIата швалитI. Апечать уысквала аъачIвагIагIвчва зымгIвагьи швуыснкъвгаща хIарыразитI, – йгIаликIгIатI Хапиштов Мурат. Ауи ареспублика газетква йгьи акнига гIацIщтырта рынхагIвчва йрыуата асквш 2018 апны йгIалыркIгIаз ауагIахъа уысквала, ажвлара коммуникацияквала йгьи апечатьла КЧР а-Министерства ачIахIра грамотаква риттI. Ртшхъвагала йгIалыркIгIаз йрыуапI «Абазашта» газет аоператорква ГIАШОКЪВА Рита йгьи БИДЖИЕВА Асйат. Хвби Ислам йгIачважвара апны ауагIахъа газетква дасугьи рцри бызшва, ркультури рцIаскви ргIащаквыжьрала йгьи рхчарала рхачIв хъада дахIврала йшдырхъйауа гIаликIгIатI. Къарча-Черкес АуагIахъа библиотека анхагIвы Боюнсузова Роза йадылгалыз агIарбара йаланакIтI рынхара йгIаквчважвауа агIвыраква гIазнылыз «День Республики», «Абазашта», «Къарачай», «Черкес Хэку», «Ногай давысы» газетква. – ХIбиблиотека йакIвнаршауа агвыргъьахъвква, аконференцияква, акцияква, астол гьагьаква, аршIыйара анйараква, шIыцта йгIацIцIуа акнигаква рпрезентацияква, агIарбараква, КЧР ауагIахъаква рлитератури разъазари рдекадаква рагIан хIреспублика хабарргагаква аламкIва йыгьцум. Ауат рымщтахь агазетква йгIарнылхуа агIвыраквала хIынхара ауагIа йрылалитI. Ауи ахъазла ажурналистква швабыжта хIырзыразпI. ЙтыцIыз асквш 2018 ауацIала ахвреспублика газеткI АуагIахъа библиотека йазынарху гIвырата йгIаквырцIаз 104 йнадзитI. Ауат йрыуата «День республики» – 31, «Абазашта» –18, «Къарачай» – 22, «Ногай давысы» – 19, «Черкес хэку» – 14 раъара гIарыншвалтI. Интернет йаназаману агIангьи абзазагIвчва рщардагIв рыхъазла агазетква рмагIны гьнакъвуам, йауа ухIварыквын, ауат йызщцаз, рыцIа йыргвапхауа хабарргагапI. Ареспублика газетква Къарча-Черкес адахIвраква зымгIва агIвыга апшта йгIартпшитI. ХIгIарбарагьи «Зеркало прессы»-хIва захьхIцIаз ауи акIвпI, – йгIалылкIгIатI абиблиотека анхагIвы Боюнсузова Роза. Асквш 2018 агIан «День республики» – сквшы 100, «Абазашта» йгьи «Ногай давысы» газетква – сквш 80 рхъыцIтI. Ауат рюбилейква рыртлапIара гвыргъьахъв пшдзата йакIвшатI. «День республики» газет аредактор хъада Кратов Евгений Владимир йпа айззара йалаз йшгIарылайхIвазла, ргвыргъьахъв адгалра апны хIреспублика ахабарргагаква зымгIвагьи гIарыцIагылтI. Ауи йалкIгIата тшылзынайырхатI йгьи разыра швъа литтI «День республики» газет атурыхи амшгIвыри йгIарыквчважвауа фильм зрыхIазырыз «КарачаевоЧеркесия» ГТРК ажурналист ШЕНДРИК Светлана Борис йпхІа. Айззара йалаз ауи афильм азыгІальаматра ду азырбауата йапшытІ. Апечать гІацІщтраква рынхагІвчва ръачІвагІа гвыргъьахъвла пхата йрайхІвахІвуата йгІачважватІ ареспублика книга гІацІщтырта адиректор Тотуркулов Казий-Магомед, КЧР АуагIа Айззара (а-Парламент), «Роспотребнадзор», «Русгидро», «Росгвардия», асуд приставква рпресс-къвырльыкъвхартаква рунашвачпагІвчва Соколенко Наталья, Покровская Елена, Мягкова Ирина, Тлукашаова Диана йгьи Кипкеева Лаура. КЧР асуд приставква р-УнашвахъцІарта знапІыцІу Урусов Рамазан агазетква рынхагІвчва йырзынархата йгІадирыгыз аразыра швъаква йырныпІ: «А-Печать а-Мш дыртлапІауищтара щарда мцІуазтынгьи, ауи ащайдзаква сквш хышвла утхъахта йгІаджвыквлитІ. ХІзаман апны швара йшвхауа ауыс хІреспублика ауагІахъаква ркультура йгьи рыбызшва цІасква рхчара йгьи ртшауацІыхра йацхърагІитІ. АпхьагІвчва йаназаману йджьащахъву йгьи йрысабапхуш ахабарква радзара ахъазла зкъару йгьи зталант йырмайгьдзауа ауагІаква швъачІвагІа гвыргъьахъвла хІшвайхІвахІвитІ. ХачІвыта швпахь йшвыргылуа йгьи швмурадква зымгІва абзазара йшвзалажьыргІатІ. Къару шІыц гІашвылазцІуш йгьи адахІвраква швызгІазгуаш агІаншараква швщардазтІ». Асуд пристаква р-УнашвахъцІарта апресс-секретарь Кипкеева Лаура арат ажва пхаква зну аразыра сальамшвъаква рылттІ «День республики», «Абазашта», «Къарачай», «Черкес хэку», «Ногай давысы» газетква рредактор хъадаква КРАТОВ Евгений, КЪВЫЛ Фардауыс, Узденов Альберт, ТхІагъапса Уывжыкъва йгьи Атуова Алтынай. Пшдзата йакІвшаз агвыргъьахъв апечать анхагІвчва гвщтІыхра гІарыланацІатІ, ауи рыцзыртлапІаз асасчва рразыра ажваква рзынадырхатІ.