ХIХАКВЛАГIВЧВА РХЪМАШТЫЛРА КВЫРМЫШ АЗЫРЧПАТI

Асквш 2018, сентябрь а 5 Санкт-Петербург, Пискаревска нышвынтара йаныргIалу «Мать–Родина» чвахъабага адзхъа Абашта айсра Ду агIан Ленинград агIархвитхра йалаз хIхаквлагIвчва рхъмаштылра плита гIахъыртIытI. Ауи йану атдзыхьызква 101 йнадзитI. Ужвы алагъь столица йбзазауа хIхаквлагIвчва ачвахъабага йазцумца Къарча-Черкес йауата зхъа щтIазцIаз рхъмаштылра квырмыш азырчпарныс лшара рымапI. Ленинград агIархвитхра йахъыцIыз асквш 75 йадахIвуата Санкт-Петербургла Къарча-Черкес ащтийыгIвчва, абаза-абхаз Дуней конгресс, «Эльбрусоид на Неве» уагIахъа-автономия йрылу йгьи Санкт-Петербург йбзазауа хIхаквлагIвчва Пискаревска нышвынтара адзхъа митинг акIвдыршатI, Абашта айсра Ду агIан зхъа щтIазцIаз хIхаквлагIвчви Апсны Республика йауата йаладзызи рчвахъабагаква рпны ахIврапшдзаква щтIарцIатI. Амитинг апны апхьахьа, «Алашара» адкIылара апрезидент, абазаабхаз Дуней конгресс апредседатель ЭГЬЗАКЬ Мусса йагIвсыз ат урых хвы азыбара, хI-Псадгьыл амамыр бзазара гIазхчаз рхъмаштылра магIныта йаму гIаликIгIатI. Ауи йапшу ауысква йгIадзынгылуа абанпараква рыхъазла швапхата йшалуа, рпатриот бжьара йшацхърагIауа кьангьашра гьалам.