«ХIАЦАЦХЪРАГIУЗТЫН, ХIЫЛШАРАКВА ЩАРДАЗЛУШТI»

Къарча-Черкес Республика згвы цхIауа, цхърагIара йазыбжу цIагылагIвта йырзалырныс йхIазыру уагIа гвымчIвала йбайапI. СквшыкI айхIа цIуата адуней шабгу забакIуа коронавирус ашIашIкIгIара дрыдзра ахъазла абзазагIвчва тшадыркIылта уыста йдырхъйауа ауи йагIарбагапI. Россияла йакIвшауа «Мы Вместе» ацацхърагIара акция хIреспублика апны йгIаныршу ажвлара, аволонтерква, агвчIагIвра адкIылараква джьгарта йалалтI. Арат амшква Черкесск йаныргIалу акультура Тдзы апны Къарча-Черкес Республика а-Хъада ТЕМРЕЗОВ Рашид «Мы Вместе» акция йалата апандемия агIан хIреспублика абзазагIвчва цхърагIара дызрадзаз аволонтерква аразыра сальамшвъаква рквнайыргатI. КЧР а-Хъада йгIаликIгIаз йрыуапI «Единая Россия» штаб аволонтерква, Россия УагIахъа фронт (ОНФ), Къарча-Черкес къральыгIва университет аволонтер мгIвайсра йалакву, датшагьи щардагIвы. Темрезов Рашид йшихIвазла, аволонтерква цхърагIара здрадзаз Абашта айсра Ду аветеранквагьи рылан. – Пандемия хIызтанаргылыз аъаща баргвы апны хIреспублика абзазагIвчва гвчIагIври гвбайари рылата, хIхаквлагIвчва цхърагIара ддрадзарныс йхIазырта тшгIадырбатI. ДзачIвызлакIгьи йылшуз йчпун. Йапхъахауата ауагIа рхъа злархчуш амаскIаква рдзахуамцара хвыдъа абзазагIвчва йрыларшауа йъалагаз хIреспублика апны акIвпI. Аволонтерква зныбыжьла йнаскIьахьаз ахIбачва, коронавирус гIазахвта зунагIваква рпны йзайъазуз ачымазагIвква йыртахъыз зымгIвала йшадгалазлушыз йащтан. Ауат хъвшвы, фачIвы рзыргун, йапшым рахIвараква дырхъйун. Саби щардагIв ъагIадзынгылуа, зхъахIара накъву атгIачваква йалкIгIата гватра рзалырхтI. АгвчIагIвра фондква, ахIаракьатчпагIвчва ралацIара хвы аквцIауачвапI. ЗымгIва рапхъа йгылата, зызгIвадара йазымхъвыцуата абзазагIвчва рынцIра йазабакIуаз амедицина нхагIвчва фырра рылата тшгIадырбатI. ЗымгIвагьи аразыра ажваква швзынасырхитI. АзгIва тIакIв йтхъазтынгьи, ужвыгьи хIгьамайгIайдзастI, хIбальарыгъ гьауашым. ХIреспублика абзазагIвчва зымгIва хIацацхърагIузтын, хIацзакIызтын, хIылшараквагьи щардазлуштI, – йрыбагъьатI ауи. Асквш 2020, мартI а 18 агIан Темрезов Рашид йунашвала «Мы Вместе» россияла акция апкъ йтата абзазагIвчва цхърагIара ддрадзара ахъазла КЧР-ла ЙазакIу волонтер штаб гIандыршатI. ЗаманкI анагIвс агвчIагIвра йгьи аволонтер адкIылараква ргIаджвыквцIарала хIреспубликала Оперштаб апны йазалху агвып анхара джвыквнацIатI. Аволонтер йгьи агвчIагIвра мгIвайсраква хIреспублика йауата уагIата зыкьпхьадзара аднакIылтI – ажвлара йгьи агвчIагIвра мгIвайсраква рщтийыгIвчва, астудентква, ахвитнагIахчагIвчва, аполитика партияква йрылу, ахIаракьатчпагIвчва, абзазагIвчва йрызгвалымсым хIхаквлагIвчва, датшагьи щардагIвы. ХIреспублика а-Хъада йшихIвазла, уыс бзи зхаз хIреспублика аволонтерква рпхьадзара швабыжта йщардапI. Ауат рызбжа ракIвпI ари атшын дызшIашварныс йылшаз, ауаса дзачIвызлакIгьи бзирата йхаз зымгIва дшрыхагIвазу гIаликIгIатI. – СквшигIадза аволонтерква рымгIвайсра тшауацIнахитI, рылшараква йрылахIитI. АвластьнкъвгагIвчва, ажвлара адкIылараква, аволонтерква рымгIвайсраква йабаркIыта йацацхърагIауа йынхарыквын, адахIвраква хIырзынадзуштI. УахьчIва коронавирус йгIаннаршаз аъаща баргвы агIан дзачIвызлакIгьи хIреспублика ахъазла сабап щарда йчпарныс йылшуштI. ДзачIвызлакIгьи сшвзыразпI, – йхIватI Темрезов Рашид. Къарча-Черкес Республика а-Хъада Темрезов Рашид йразыра сальамшвъаква зквнайыргаз йрыуапI: Байрамыкъва Нурсийат Назир йпхIа, Быджь Бэла Ращид йпхIа, Квырджь Дана Руслан йпхIа, ПатI Лиана Усыф йпхIа, датшагьи щардагIвы. «Магнит» ткван апны йынхауа Быджь Бэла йшылхIвазла, йгIалквнадыргаз артшхъвага швабыжта дайгвыргъьатI. – Коронавирус зхьуаз ачымазагIвква рыцIа йанщардаз азаман агIан абзазагIвчва зымгIва ауи йапшIагылуата нхара щарда акIвдыршатI. Съанхауа «Магнит» тквангьи гIвынакIла йыгьгIанымхатI, йшхIылшузла ауи ауыс йацхIкIтI. Аткван апны зхъахIара накъву рыхъазла афачIвква ъаквхIцIуз акIьарышвтаква анхIыргIалтI. Ауаъа йыквыз ачIахъва, йапшым арызкъква ауагIа хвыдъа йнарахвырныс рылшун, – лхIватI ауи. Темрезов Рашид аволонтерква разцIгIаракви йапшым рахIваракви дрыздзыргIвытI. Ауи атшазынархараква гватрадъа йшгIанымхушла йыргвыгъатI, аволонтерква рынхара ащтацауата йщаквгылра ахъазла йчпачIву йъ