СКФО В Северной Осетии в 2024 году появятся прямые авиарейсы в Нижний Новгород СКФО Сельхозкооперативы в КБР набирают популярность Актуально Региональный этап Всероссийской олимпиады по истории российского предпринимательства прошел в КЧР на базе КЧГУ Актуально Глава КЧР Рашид Темрезов в Приэльбрусье встретился с активистами Общероссийского движения детей и молодежи «Движение Первых» Актуально Глава КЧР Рашид Темрезов в Тырныаузе КБР принял участие в открытии Дворца культуры им. Кайсына Кулиева

ХIАКЪВЫЗГАРА ЗТАХЪЫЗ АПХIВЫС ПШДЗА

28.01.2019 358
ХIАКЪВЫЗГАРА  ЗТАХЪЫЗ  АПХIВЫС ПШДЗА
ХIаба йгвы апны хвырта цIола гIанызжьыз гIаншаракI йхIвахлун: «ХIан рыцхIа йагIамкIва адуней анылхIваджь, хIйыбагьашвахатI, ари адуней ду апны йхIхъаздзахатI. ХIара йхIапшта ани аби змахмыз ахвыцква асаби йыбаква р-Тдзы апны йандыргIалуан, ъахIльы дызмаз рыцIа йрызшан, ауат йрыдыркIылхуан. РыцIа йтшытхахьаз аныла-арыла йтапхьатачвуан, йбжарыхъвашаз атыдзква рпны йпхьун, амла йамгара ахъазла йангъычуазгьи гIаншун. Ауи йгIалцIла, НКВД анхагIвчва асаби йыбаква хъпшылдъа йшгIанымхуш йащтата мчыта йырхъпшылуан. ГIапын мшыкI йхIхъацIакIыртаз ашIуна хIгIатыцIын, амарашIапхарта апны хIхъвмаруан. ЙхIымдырдзакIва хIыдзхъа машина хъахъгIвакI гIашIастI, лквпшырала дпшдзата пхIвыскI дгIатыцIын, дгвыргъьауа дгIахIыдзхъагылтI. Ауи урышвла йылхIвуз хIара йыгьхIгвнымгIвуазтI. АпхIвыс аргваныта сылзынаскIьатI, ларгьи схъа пшкадза йгIалщщын, хIызцбзазауа дзачIву датазцIгIахтI. УадыргIвана ауи къвакъвадза дгIачIвалын хIыхьызква ашвъабгъьы йанылцIауа далагатI. Сара ауи лажваква рызбжа гьсзалмыргузтI. Ага ауаса йаъазтынгьи, саща Хвсейи сахща хвыц Марйами йскъвыргата зджьара йшыргуш алскIгIатI. РыцIа йтшытыз сахща Мслимати сари хIанхща хIлыртуашын. Марйам лпсы закI адырзапI, сжьы гIасылрыхьуа дута дчIвыуа далагатI. АпхIвыс пшдза ауи дщтIылхын багьи лалхIвтI. Хвсейгьи йнапIы лкIын, дгIазкIныцIыз амашина ахьыла йлырхаутI. Ауаъа ныбыжьла йапшымыз саби щардагIв рчгIвычаква акъвыжвжвата снарыквпштI. Йызбаз снашх рыцIагьи йпнатшытI, швабыжтагьи сырхIатI, сыладзква гIахъххылын скIьазызуа салагатI. Сара санчмазагIвхара йанакIвызлакIгьи ауаса скIьазызуан. ТшгIащаквскIра стахъызтIхIва йыгьсылымшузтI. Сыладзква сырхъватшуан, сгIапхьнажвауа сагвынкьуан, сымчымхъара сарыгвжвайуан. Сащи сахщи скъвыргарыквын ауи ахIа йшсымбахуашыз зынла йгIасгвынгIвытI. УадыргIванагьи сцриква амашинала йзырцуз апхIвыс пшдза лгвчIагIвра сайгвгъун. СашIамсуата сцри къарча бызшвала араса слазцIгIун: «Арат джвыквбгарквын йабагIасаухуаш? АлахI йхIатырла араъа йгIаныжь, сара-сара сырхьпшыхуаштI. Ауи йъабырцауа ауат йырхъпшылуашда?» Сажваква лымгIауазшва йгьи дгIацампшуата дчIвырхъун. Сара уадыргIвана акIвпI йангIасгвынгIвых ауи амли ахьти хIрызгIанылжьта дджвыквылхырныс дшахвитмыз йгьи йжьыхьыдаз ауыс – йара ауасагьи ййыбахаз хIтгIачва чкIвын хъатамата рамцIыхра лырхъйун. АпхIвыс амашина акузов апхъапхъа Марйам, уадыргIвана Хвсей талырчIватI. РыцIа йтшытыз пхIвыспа чкIвынкI дгIаъабан Марйам лара дъачIваз аквтала длыхътI, Хвсей ащтахьла аргваныта дгIанхатI. Ашофер амашина алайыршван, саргьи напI гIасзичпан, йымгIва дапшыхтI. Акыт амгIва быркъвачыркъвала йажвыз амашина агIылахIва псайспадза йымгIвайсуан. Сара йыншаз ацIыхъвадза йазхъасымцIауата сдийын, йсчпуш сымдыруа сгылан. Ауат адакъикъаква рагIан адгьыл хъахьцIахьызшва йызбун. Сгвы гIатыпушма ухIвауата йтыртыруан, закIгьи ъасылымшуз ахъазла сбжьы ъанадзауа сцIырра стахъын, ауаса апхащара сгIашIанакIуан. ЙшпакIву сахщи сащи йыртахъыхым хIапчыпкI йагIвызата, йрылахьхушгьи сымдыруата, сыла шгIапшуамца зджьакIы йшрыстуаш»-хIва схъа йтахъванчуаз ажваква слакцIа дрыхъынхIвуан. Ахрат атшын сан рыцхIа запш напайа сызлалыдгылхуашыз? СангIацапа Мслимат лхъагьи лщамхъаква йрыквта, лнапIы чкIвынквалагьи ллакта хъылгIвауа дшчIвыуаз сналыквпштI. Ауи данызба сгвы рыцIагьи тшаднарбцIылтI, къарута йсзыгIанхаз адскIылын, йнагIбауа йымгIвайсуаз амашина сащталтI. Хвсей дгIаспшыпхьадза дчIвыуитI, саргьи сыгIвитI. Ауасамца амашина гьабакI йаназынадза снахьыдзан, сйымцIасын дгIакIынсхIватI. Ауи дкIахIан, саргьи ауи сйыквкIахIахтI. Хвсей акъамыш апны тшыкъайчIвахырныс йасхIвын, амашина сатащталхтI. Йыгьсыздырам, АлахI дгIасцхърагIама, момкIва амашина йаквчIваз ргвы гIасычIагIвма, йшаъазлакIгьи, сащи сахщи гIасыдскIылхырныс сылшатI. Ауи атшын хIара йгьи хIчIвыуан, насыплагьи хIырчвын». 
358 просмотров

Читайте также



Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный