ХЪАЦІАРА ЗЛАЗ АКОМАНДИР

Белгород область, Березовка поселок апны дбзазитІ сквш 91 йырту Абашта айсра Ду аветеран Войкин Дмитрий Дмитрий йпа. Ауи «За взятие Вены», «За боевые заслуги», «За победу над Германией» медальква гІайквнадыргатІ. Войкин Дмитрий йгІвыраквала айсыгІвчва щарда рфырра гІащаквдыргылхтІ. Ауат дрыуа заджвыпІ «Совет Союз а-Фыр» хьзы гІазквнадыргаз ачеркес, Малый Зеленчук кыт йауаз ХАБЕКОВ Умар ХІамид йпа. ХІанйара апны Дмитрий Дмитрий йпа асквш хІатлаква йгІарылсыз, Абашта ахчара йазгылаз хІхаквлагІв фыр йыхъазла хабар щарда гІахІайхІвтІ. Хабеков Умар й-3-хуз УкраинскIа фронт й-9-хуз ар йаланакІуаз й-100-хауа хысыгІвчва дивизия й-301-хуз ахысыгIвчва рполк абатальон дакомандирын, капитан чын йыман. Войкин Дмитрий йшгІайгвалашвахуазла, Умар йуыртла дгьхІагІамызтІ, ауаса хъацІара злаз, аунашвачпара йазычпаз, зсолдатква йырхъгвыргІвуз дкомандирын. Хабеков Умар асквш 1921, сентябрь а 10 ХІабаз район, Малый Зеленчук кыт апны дйытІ. Черкесск педагогика училища дапхьауата асквш 1939 агІан Ар Къапщ дызшІырттІ. Асквш 1941 август агIан афронт дпшцІалтІ. Асквш 1942 агІан акоммунист партия днарахвтІ. Ауи БрянскI фронт дайсуата дгІархвытІ. Асквш 1944 июнь угІалагата агвардия акапитан й-100-хауа хысыгІвчва дивизия й-301-хауа ахысыгІвчва рполк абатальон дакомандирхатІ. Свирско-ПетрозаводскI йакІвшаз айбащра хІатлаква рпны хъамайгьдзара гІайырбауа дайсытІ. Асквш 1944, июнь а 22 агІан КарельскІ йгьи Пустошь шІыпІаква рпны йайсыгІвчва рапхъа дгыла ахква рхъыпссгІауа агъачва тшъандыргІалыз йагвыквсын, фин солдатта йгьи офицерта батальонкІ йнадзушыз ыквырчІвакьтІ. Июнь а 25 атшын йтхъуз агъачва рцІыхъва йтагылата Карелия, Самбатукса кыт апны йаныргІалыз аопорна пункт гІакІвдыршатІ. Агъа йсолдатта 60-гІв райхІа хъырщгІатІ, ахыхъвшвква ъагІвназ хвскладкІ, пщхысга хІатлакІ, 10 пулеметкІ гІарахвтІ. Агвардия акапитан Хабеков Умар асолдатква швапхата дырзалуа, швара ззырхІвауа йымдыруа афашистква дыргвыквсуан. Айбащраква рпны хъацІарата йгІадырбаз ахъазла й-100-хуз хысыгIвчва дивизия айсыгІвчви акомандири аорденкви амедалькви гІарквнадыргатІ, асержант Къардан Мурат Совет Союз да-ФырхатІ. «Совет Союз а-Фыр» хьзы гІайквнадыргарныс абатальон акомандир Хабеков Умар йшвъаквагьи рырттІ, адивизия угІалагата афронт аштабдза ауат йрылапштІ, ауаса КарельскІа фронт архъвква йрызцауа аунашвала агвардия акапитан Невский Александр йорден гІайырттІ. Финляндия айсра йалцІхта КарельскІа фронт апны айбащраква анашІасх, Хабеков Умар дызлаз адивизиягьи резерв йырщтитІ. Асквш 1945 агІан ауи адивизия зланакІуаз й-3-хуз УкраинскІа фронт Венгрия аштадза йнаскІьатІ, ауаъа йгІатахаз афашистква рыквчІвакьрала рхачІвы дырхъйатІ. Апрель а 2 рымгІвайсра джвыквырцІан, апрель а 6 агІан зымгІва рапхъа Австрия астолица – Вена йталтІ. Ауаъа айбащраква рпынгьи акапитан Хабеков Умар хъацІара ду гІайырбатІ. Асквш 1945, апрель а 3 Вена ахъазла айбащраква рпны хІхаквлагІв йунашва йацІаз абатальон гъарта йыркІыз совет йгьи француз айсыгІвчвата 500-гІв раъара гІадырхвитхтІ, апрель а 9 намыца солдатти офицерти 200-гІв ыквырчІвакьтІ йгьи 100-гІвы гъарта йгІаркІытІ, зенит хысгата пщби цпулеметкІи гІарыквырхтІ. Апрель а 10 акапитан Хабеков Умар йбатальон й-301-хауа хысыгІвчва полк йрылата Дунай дзыгІв йырстІ. Ауаъа йакIвшаз айбащра апны абатальон акомандир йгІайыквшваз атопх дгьгІацымхатІ. Ауи айбащра хІатла ахъазла Хабеков Умар йгІванхауата «Совет Союз а-Фыр» хьзы йквнагата йгІархІватІ, ауаса «Орден Отечественной войны» йапхъахауа астепень, йара даъахымкІва, йгІайквнадыргатI. ХІхаквлагІв фыр Вена, Шварценбергплац площадь апны дыцІарцІатІ, йнышвынтара апны чвахъабага дыргылтІ. Войкин Дмитрий Хабеков Умар дызлаз айбащраква зымгІва йыла йыцІстІ, хІхаквлагІв дйыдзхъагылата дайсытІ. ЙайхІата йхІхІвапІта, айсра аналга мызкІы ахъыцІта акомандирква Хабеков йгьи Беляев датша зджьара йаныцІарцІахуазгьи далан. Асквш 1990, декабрь а 1 йнарахвыз СССР а-Президент йунашвала асквшква 1941–1945 йакІвшаз Абашта айсра Ду агІан анамыца-фашист гІакІыгІвчва дырпшІагылата хъацIара гІазырбаз Хабеков Умар ХІамид йпа, йара даъахымкІва, «Совет Союз а-Фыр» хьзы йквнадыргатІ. Умар йыман «Орден Ленина», «Орден Александра Невского», «Орден Отечественной войны» йапхъахауа астепень. Хабеков Умар йыхьыз Москва область апны Ременское город й-8-хауа апхьарта, ХІабаз йгьи Малый Зеленчук квтанай апхьартаква йырхъыпІ, йыхьыз нкъвнагитІ дъапхьуз Черкесск педагогика училища, ауи апшцIа йчвахъабага гылапI. Черкесск город, АйгІайра парк йаныргІалу Афырква р-Аллея апны хІышта йауата Совет Союз йгьи Россия Федерация йырфырхаз айсыгІвчва рчвахъабагаква гылапІ. Ауат йрылапІ Совет Союз а-Фыр Хабеков Умар ХIамид йпа йчвахъабагагьи.