Бизни республика сют чыгъарыу бла Россия Федерацияны регионларыны арасында алтынчы орунну алгъанды.
Бу рейтингни бардыргъан аралыкъ бегитгеннге кёре, Къарачай-Черкес Республикада сют чыгъарыу бла кюрешген 900 элчи фермер мюлк саналады.
Бизни республика хауа, табигъат болумуна кёре асламысына малчылыкъ бла кюрешеди – ол эртделеден келген затды. Аны ангылаб, малчылыкъ продукцияны ёсдюрюуге уллу эс бёлюннгени бла байламлыды бу тукъум джетишим да. Устала чертгеннге кёре, КъЧР-ни рейтингде мийик тапхагъа ёрлегенине талай фактор себеблик этгенди. Аланы бири, сёзсюз да, рынокну конъюнктурасында сютню азлыгъы бла байламлыды. Аны ангылагъан фермерле, заманларын бошуна джоймай, сютню асламыракъ чыгъарыуну джолуна тургъандыла. Алай бла, арт 3-4 джылда республиканы мюлклеринде этли эмда сютлю малланы джайыугъа бютюн да уллу эс бёлюнеди. Аны бла бирге аз джоюм этиб, кёб хайыр алыргъа да тюзеле барадыла. Мындан ары да бу затны файдалы болгъанын ангылаб, ишни андан да къурамлы бардырыргъа учунубдула эл мюлкчюле. Республиканы Эл мюлк министерствосу регионда болгъан малны 40 процентин сют берген мал этерге кёлленибди.
Комментарии