КЪАРЧА-ЧЕРКЕС ФАЧЫГIВ ЗАВОД ГIАЩАКВГЫЛХИТI

Лагъь КIавкIаз ауысквала РФ аминистр ЧЕБОТАРЕВ Сергей йгьи КЧР а-Хъада ТЕМРЕЗОВ Рашид КъарчаЧеркес фачыгIв завод йаъан. Ари анхарта сквш 55-ла утхъахта йгIандыршатI. Азаман йгIаннаршуз апсахраква йрыламдзыз нхартапI. УахьчIвала ауи НагIвай район аквта ЭркеншахIар поселок абзазара йащатапI. Араъа сквшжвабапхьадзара руацIа афачыгIв сандрыйа йадынхалитI, хIышта афермер йгьи акыт млыкврхIартаква архъа йгIаквыргауа афачыгIв сандрыйа араъа акIвпI йъадыргалуа. ХIреспублика йаргвану аштаква йгIацIаргауа атшыгIврагьи ЭркеншахIар фачыгIв гIархарджьырта йгIаргитI. Анхараква зымгIва йырпщылу 400-гIв йрайхIапI, уахъыкIи мшкIи руацIала фачыгIв сандрыйата тонн 3500 йрыдынхалитI. УахьчIвала КъарчаЧеркес фачыгIв завод капитальна рчIаджьра йазыбжапI. АъачIвагIагIвчва йшырпхьадзауала, агIаршIыцхра нхараква рымщтахь агIархарджьра гIванла йщтIыцIуаштI. Ари анхарта агIащаквыжьри агIаршIыцхри ашIыпа экономика ахъазлагьи, ЭркеншахIар поселок ахъазлагьи, анхагIвчва рыхъазлагьи магIын дудздза зму уыспI. Лагъь КIавкIаз ауысквала РФ аминистр Чеботарев Сергей азавод агIаршIыцхрала йрылшахьаз дадырпшытI – араъа фачыгIв кIьана ъарчпауа цех гIандыршахьатI. Апхъахьыла тшауацIыхра ахъазла азавод «Корпорация развития Северного Кавказа» йгьи Лагъь КIавкIаз ауысквала а-Министерства рцхърагIара йайгвгъитI. – УыжвгIанчIви Россия апны фачыгIв завод шIыцкIгьи гьрымуыхвастI, – йхIватI Чеботарев Сергей. – Азавод шIыц ауыхвара сом 14 миллиардкI атахъыпI, йынхауа ари азавод акапитальна рчIаджьра йгьи агIаршIыцхра йаквыдзуаш агалагьи ймачIпI. ХIшIыпIа йгьи хIкъраль рыхъазла ари азавод гIахчара йгьи тшауацIнарыхра йхъаду ахачIвква йрыуата йспхьадзитI, – йхIватI «Корпорация развития КЧР» аинвестиция проектквала а-Департамент знапIыцIу Байрамкулов Науруз. Чеботарев Сергей ари агIархарджьырта атшауацIыхра анхара тыпква шгIаннаршуш, атехнологияква ргIарысабапра Къарча-Черкес фачыгIв завод йагъьу йрыуахарныс йшацхърагIуш гIаликIгIатI.