«ГВЫГIВБАРА ХВЫЦКI УЫЛАМКIВА ЙГЬАУАШЫМ»

Къарча-Черкес Республика апрокуратура РФ Ащтанкъвцара комитет аорганква рпны апроцессуальна уысхара хъпшылра ахъцIарала ахъвшара унашва ахъызцIауа, аюстиция акьангьашагIв ахIба ЧКВА Владислав Хзыр йпа йъачIвагIахуш ангIалихуаз дызшIпшуашыз, швапхата йзалуашыз йыман. Ауи Къвбина кыт йбзазуз Абашта айсра Ду аветеран, апшыхвыгIвчва ррота йакомандирыз ЧкваргIа Хзыри йхъапщыла Аминати рыбжьыгIвчкIвынчви (агIвыджь пхастала йыдзтI) ргIвыхIвсси рпны дайцIбапI. Айщчва йрыуата ахабзахчара зъачIвагIахаз ахыгIв дыршIпшытI Владиславгьи. Йара йшихIвахуала, йпщбахауа акласс дапхьауата йазрыпхьуз Дагвжвей МухIадин йыръачIвагIахушла алацIара дйыргIвытI. Ауи агIан дюристхара шитахъу йгIвытI. Акласс йауата ауи аъачIвагIа гIалызхыз йаразаджвыкI йакIвын. Абараса дшхвыцыз йгвы йтайкIыз дазычIвырхъатI йгьи асквш 1989 йгIашIарышвта ареспублика апрокуратура органква дрылата ахабзанкъвгара рыбагъьара дазынхитI. Чква Владислав Ставрополь юридическа институт дапхьаркIвауата Черкесск город апрокуратура апны йынхара джвыквицIатI. Асквш 1990 агIан дщтанкъвцагIв ахIбахатI, йащтагIайуата ареспублика прокуратура апны афедеральна хабзаква рырхъйара хъпшылра ахъцIарала ахъвшара дапрокурор ахIбахатI, ареспублика апрокуратура апны дщтанкъвцагIв ахIбахатI, ареспублика апрокурор дицхърагIагIв ахIбан. Чква Владислав Черкесск город апрокурор дизаместительын, ауи амщтахь ареспублика прокуратура апны ащтанкъвцара хъвшара йнапIыцIан. Апрокуратура органква руацIала апсахраква ангIанша Къарча-Черкес Республика апрокуратура апны ачвгьахараква рыщтанкъвцара хъпшылра рхъцIарала ахъвшара йнапIыцIан, апрокуратура органква рпны йыншауа ачвгьахараква рыщтанкъвцарала ахъвшара даунашвачпагIвын. УахьчIва йъанатIала асквш 2007 йгIашIарышвта дынхитI. СквшгIважви жваба райхIа ахабзанкъвгара рыбагъьара йазынхауа Чква Владислав апрокуратура органква руацIала йыншаз апсахраква дрылан йгьи ауат бзирата йрыщтагIайыз гIаликIгIатI, ауаса дыззыразымгьи гьцIайкIуам. – Асквш 2007 агIан Россия Федерация апрокуратура апны щтанкъвцара Комитет гIандыршатI, ауи агIан акIвпI унашва зхъсцIауа ахъвшарагьи анщаквгыл, – йхIвитI аюстиция акьангьашагIв ахIба. – Асквш 2011 агIан кIьыдата РФ Ащтанкъвцара комитет шгIандыршауала Россия а-Президент й-Унашва гIацIцIтI. Апсахраква рымщтахь апрокуратура органква ащтанкъвцара уысква йыгьрылахым, хачIвыта йрыму ахъпшылра акIвпI. Йаргьи ауи тамампI, йауа ухIварыквын, йакIвымкIва зъанатIа гIазрысабапуа рыцIа ймачIгIвызлуштI, ащтанкъвцара ацIыхъвагIарбара агIворганкIгьи ргIальаматра гьалазлушым. Ауаса ауыс тазщахIауагьи хIанйитI. Чвгьахара ншата йщаквхIыргылхьазтынгьи, амаль амамкIва уголовна уыс гIахъыртIырныс ахъазла унашва гьхIзычпушым. ХIара ахабзамыгIвхъгара рыдзхра шатахъу хIхIвитI, ауаса зхъа йахвиту ащтанкъвцагIв «мыгIвхъгаракIгьи гьызбум»- хIва джьауап гIахIитырныс закIы гьазхIвам. РыцIа узымрыразуа апрокурор архъвыхра хачIвква ъаймырхъйахуа акIвпI. Архъвыхра йгIацIанакIуан ащтанкъвцара адгалра. УахьчIва йакIвхIыршауа ахъпшылра уысква ракIвпI, ащтанкъвцара хIаналалуа щаквыргылра аннарахвра, ауи ауысла ашшра гIахIадзазтын акIвпI. Ага абаргвыраква, аквымшвараква йрынйузтынгьи, апрокуратура анхагIвчва рхачIвы нардзата йшдырхъйуш, азахвара шщаквдыргылуаш йащтапI, ауысква змагIны дуу, змагIны хвыцухIва алых гьырчпум. Владислав Хзыр йпа йынхара апны рыцIа йбаргвыта йгьи хачIв хъадата йпхьадзауа азахвара щаквыргылра акIвпI. – АхабзамыгIвхъгагIвчва зымгIвагьи, йара джыпхакI йтауыргыл гьауашым, – йхIватI ауи. – Йара ауаса ачвгьахараквагьи ахъцапI. ЗымгIва йрапхъата зарар зквшваз йгIальаматраква хIхчитI, ауаса йдыркъванчауа йгIальаматраквагьи хIрызхъвыцра атахъыпI. Ауи ахIатырла агIвыджь рыуа азаджв йытланыкъва хIкIырныс гьтамамым. Ахабза зымгIвагьи йырзацапшпI, агIвытланыкъвакIгьи ахабза йгIарнат уа рхвитнагIак ва хIрымзарархауата хIуыс хIырхъйара атахъыпI. Ауаса ахабза мыгIвхъызгаз аджьауапкIра дацIцIта амаль гьамам. Датшата йсхIвапIта, ахабза апкъ йтата йквнагу хIаквым йыквцIара атахъыпI, ауи агIан азахвара щаквгылитI. Араъа угвы йгIаунахIвуа гьакIвым уызздзыргIвуа, ауи апш ншузтын, заджвы йытланыкъвала уахъуаштI, ахабза апкъ утыцIуаштI. Ажва аламкIва, ащаквыргылра нахвра апхъала агIвычIвгIвыс йныбыжь, йтгIачва аъащата йызтагылу, чвгьахара нйыршара апхъала уыста дыздкIылаз, датшагьи щарда хIырпшитI. Чква Владислав йшихIвауала, ахабзамыгIвхъгагIвчвагьи гьапшым. Асоциальна баргвыраква йгIарылцIла ймыгIвхъыцIуа аъапI. Нхарадъа йгIанхаз дбзазара ахъазла гIалцIыртакIгьи змам йамальйа? ЙаъапI йгIайхътIтIауа дбзазауата амгIва хъвахъва йыквылуа. Ауат йрапшу ажвларагьи авластьгьи гьгIатадрышвуам, рхъа йгIаташваз рчпитI, аджьауапкIра йацIцIуашта акIвпI йшхъвыцуа. Сквшщарда ахабзанкъвгара рыбагъьара йазынхауа аюстиция акьангьашагIв ахIба йшипхьадзауала, ахабзахчара органква ркъаруква зымгIва йрапхъата амыгIвхъгараква ргIашIакIра йазынадырхара атахъыпI. Ауи акIвмызтын, амыгIвхъгараква йрылдзгIузтынгьи йатарылахIахлуштI, йашвхIаусыгIву уымрыдзуата йгьауашым. Владислав Хзыр йпа асквшкъомкI руацIала ауголовна уысквала щаквыргылрата йнайахвыз рпхьадзара гьузыхIвушым. Ауат зымгIвагьи цIолата тшрыхайыргIвазатI, йауа ухIварыквын, закI йчвагIвста дгIващарныс хвитнагIа гьйымам. – ХIынхара апны йахърыкъьата ухъагвы аквызлара гьатахъым, – йхIвитI ауи. – Щаквыргылра науахвра апхъала угватшныта ауыс тшахауыргIвазара атахъыпI. Йалырныс ауыпI льажьакIгьи змам агIвычIвгIвыс хIаквым йыквырцIарныс, ауи апш ншата амаль гьамам. АйъазагIвчва агIвычIвгIвыс йызгIвадара ахъазла джьауап шыркIуа апшта, хIаргьи агIвычIвгIвыс йпхыцIахуш ахъазла хIджьауапкIра хIылахIхIвитI. Щаквыргылра аннахIахвуа гвыгIвбара, кьангьашра хвыцкI хIыламкIва йгьауашым, датшата йсхIвапIта, цкIыцкI зымгIва хIырхъвыхра атахъыпI. Ауаса «быжьны йшвата йпумкъуата йгIаныжьгьи» гьауам. Щаквыргылра назахвырныс злымшауа араъа дынхара гьатахъым. Чква Владислав йынхара «Почетный работник прокуратуры Российской Федерации» гвплацIала, РФ а-Генеральна прокурор й-ЧIахIра грамотала, «КЧР-ла гIатгара зму юрист» ЧIахIра хьзыла, датшагьи артшхъвагаквала йгIалыркIгIатI. Раба йъачIвагIа гIалырхтI йгIариква Артур, Юрий, Татьяна. Артур РФ Ащтанкъвцара комитет КЧР-ла а-Унашвачпарта апны дынхатI, дподполковникпI. Абараса ЧкваргIа Хзыри Аминати ртгIачва апны йщаквгылыз ацIас гьшIчIвум, ахIбачва ршвапхала ашIаквагьи мгIвайситI.