ГВАТРА ЗЗАЛХЧIВУ ГIАЛИКIГIАТI

ХIреспублика аунашвачпагIв Темрезов Рашид йгIаджвыквцIарала Къарча-Черкес апны СКФО-ла РФ а-Президент йунашваква шырхъйахауала агIарбараква йырзынархаз алачIвара акIвшатI. Ауи йалан СКФО-ла РФ а-Президент йгIащтийыгIв й-Аппарат анхагIвчва, КЧР а-Хъади а-Правительстви р-Администрация аунашвачпагIв Уаз Мурат, КЧР а-Правительства анхагIвчва, агородкви арайонкви рунашвачпагIвчва. СКФО-ла РФ а-Президент йгIащтийыгIв Матовников Александр йгIачважвара апны алачIвара згIаджвыквцIару Темрезов Рашид дшизыразу йгьи арахьарат аштаква рпынгьи йшакIвшуш гIаликIгIатI. – Йшалу йгIауахвырквын, арыпхьарала хIгIарбараква гьгвымхам, апхьарта шIыцква, аспорт уыхвараква, айъазартаква гIахъыртIитI, – йхIватI Матовников Александр. – Ауат ауысквала КъарчаЧеркес йапхъагылу йрыуапI. СКФО-ла РФ а-Президент йгIащтийыгIв алачIвара йалаз тшырзынайырхауата авласть органква ажвлара институтква рыцIа джьгарта йрыцынхара шатахъу йхIватI. – СКФО аштаквала Ажвлара палатаква ргIащтийыгIвчва, агIвычIвгIвыс йхвитнагIаквала ауполномоченнаква злаз айззара акIвхIыршатI, – йхIватI ауи. – Ауат ажвлара институтква РФ а-Президент йщаквыргылрала йгIандыршатI. АшIыпIаква рпны авласть органква ауат рыцIа аргваныта йрыцынхара атахъыпI. Ажвлара палатаква ргIащтийыгIвчва йгьи агIвычIвгIвыс йхвитнагIаквала ауполномоченнаква СКФО-ла йакIвшауа алачIвараква йгIахIрайгвалуштI. Темрезов Рашид апхьадзараква дрыквгIашIасуамцара асквш 2012 йгIашIарышвта асоциальна-экономика аъаща агъьчIврала нхарата йакIвдыршаз, ауат ргIарбараква дрыквгIашIастI. ХIреспублика апны РФ а-Президент йунашваква рырхъйара бюджет ахчата сом быжьмиллиардкI азынадырхатI. АсабигIзартаква рпны нхара тып шIыцта бжьынзкьы гIандыршатI, асквш 2015 агIан асабигIзартаква рпны акьазу дрыдзтI. УахьчIва асабигIзартаква рпны йхвыцдзакву рыхъазла атыпква ргIаныршарала анхараква джвыквырцIатI. Ареспублика апны акъральыгIва цхърагIараква рыргIапсща тшауацIнахитI, акъральгIвчва аэлектронна амаль рыцIарыцIа щардата йгIадрысабапитI. Амедицина хъвшара гIауахвырквын, хIреспублика апны ауыжвгIанчIви амальква гIазрысабапуа ащацага хирургия, онкология, Перинатальна айъазартаква нхитI. – РФ а-Президент Путин Владимир йтшазынархара апны онкология згIваква ргIашIакIрала уагIахъа программа рхъйарала ахачIвы лихтI, – йхIватI Темрезов Рашид. – ХIреспублика апны айъазара – диагностика амальква рбзирала йцIыхъвахауа ахвысквша онкология згIва йагауа 6,2 процентла йрылдзгIатI, арак згIва паса зпны йгIадрыбергьыльуа процент 60-ла йрылахIатI. Къарча-Черкес апны сынчIва онкология диспансер ауыхвара алдыргатI. Ужвы нурла айъазара йазцара атахъыпI, уахьчIвала ауи йазалху аъамапсымаква андыргIалхьатI. РФ а-Президент йщаквыргылрала агIвнабзазарта йгьи апсабара ацкьара йкIьыду уагIахъа проектта йадыркIылтI. Асквш 2012, январь а 1-ла йгIахвта зыгIвнабзазартаква шварагIварата йщаквдыргылыз акъральгIвчва зымгIвагьи хъацIакIырта рзалырхтI. РФ а-Президент ауи анархарала анхараква йапымкъьахауата йакIвдыршарныс хъвдаквцIара йчпатI. – А-Президент Путин Владимир а-Федеральна Айззара йазцауа йтшазынархара апны сквшигIадза гIвнабзазартата квадрат метрта мильуан 120 руыхварныс хачIвы лихтI. УахьчIва хIреспублика аквта апны агород алагъь тланыкъвала асаби-йыбаква, атгIачва шIаква, айсра гIаншараква йрылаз датшагьи социальна гIвнабзазартала хвитнагIа зму рыхъазла эконом-класс ззырхIвауа агIвнабзазартаква хIуыхвитI, – йгIаликIгIатI Темрезов Рашид. АлачIвара апны саби зщарду атгIачва шIаква аинфраструктура ъанардзу ашта апны адгьыл рзалхрагьи йаквчважватI. Асквш 2012 угIалагата апрограмма апкъ йтата хIреспублика апны ауат йрапшу тгIачвата 1740 адгьыл рзалырхтI. Ауаса арайонква зымгIва рпынгьи апрограмма шырхъйахауа угьарыразуам. ЙгIауахвырквын, Къарча город округ апны адгьыл къытпI, ауи йгIалцIла йаргвану арайонква рпны йырзалырхуаштI. АтгIачва шIаква йрыцкIра йазынархапI ашIыпIа ан капитал, йхыгIвхауа йгьи йащтагIайуа саби дзауа мзигIадза сом 9231 рзалхра. Асквшква 2014–2017 руацIала ауи ауыс сом миллиардкI айхIа азынадырхатI. АшIыпIа ан капитал асквш 2016 агIан тгIачвата 339 йырзалырхтI, хIызту асквш ауацIала – тгIачва 847. АлачIвара ауатыкв йгIатаргатI аэкология, адзцагаква, амгIваква датшагьи йырпщылу ауысква. РыцIа йауацIыхта ауат анархараквала йгIачважватI КЧР а-Правительства йалу. РФ а-Президент йунашваква шырхъйахауала ажва йыман СКФО-ла РФ а-Президент йгIащтийыгIв йзаместитель Владимиров Максим. Матовников Александр алачIвара алйыргауата рыцIа гватра ззалхчIву гIаликIгIатI. – Ареспублика апны РФ а-Президент йунашваква дырхъйауата нхара ду акIвдыршатI, – йхIватI СКФО-ла РФ а-Президент йгIащтийыгIв. – АгIарбараква хIанрылапш рыцIа гватра ззалхчIву бергьыльхатI. Ауи йгIалцIла асквш 2012 йчпаз аунашваквала йгIанхаз ауысква нардзахта асквш 2018 ахачIвква хIрылагара атахъыпI.