«ГIВАДАХЬ РОССИЯ АШТАКВА РТШАУАЦIЫХРА ГВАТРА АЗАЛХЧIВПI»

Россия Федерация Ажвлара палата ахъпшылра йацIата Лагъь КIавкIазла йапхъахауата йадыргалыз айззара апрель а 18 Махачкала апны йгIахъыртIытI. ГIвымшкI йакIвшаз «Сообщество» форум чкIвыныргIа анхара рынок ззыбжу аъачIвагIаква йарыпхьара, анхара тыпква ргIаныршара йырзынархан. Ауи ангIахъыртIуаз йгIачважватI РФ Ажвлара палата асекретарь ФАДЕЕВ Валерий, ауи йапхъахауа йзаместитель, Россия а-Фыр БОЧАРОВ Вячеслав, ЛагъьКIавкIаз Федеральна округ апны РФ а-Президент йгIащтийыгIв йзаместитель СТАРИКОВ Сергей, Дагъстан Республика а-Хъада ВАСИЛЬЕВ Владимир, Москва городла Ажвлара палата йалу ПОЧИНОК Наталья, аэкономика наукаква ркандидат, Гайдар Е.Т. йыхьыз зхъу аэкономика политика институт апны «Политическая экономия и региональное развитие» наука проект аунашвачпагIв СТАРОДУБРОВСКАЯ Ирина, Дагъстан Республика Ажвлара палата апредседатель МАЧАЕВ Абдухалим, РФ Ажвлара палата апны йгIаныршу акомиссияква рунашвачпагIвчва. Айззара йалан СКФО асубъектква рырхъйара власть органква рынхагIвчва, агвчIагIвра фондква, аорганизацияква рунашвачпагIвчва, Кърым Республика Ажвлара палата агIащтийыгIвчва, ашвыр цIлауатраква рырхIара йадкIылу афермерква. Къарча-Черкес Республика ахьызла айззара анхара йалан КЧР Ажвлара палата апредседатель МОЛДОВАНОВА Вера, ауагIахъа уысквала, ажвлара коммуникацияквала йгьи печатьла КЧР аминистр йзаместитель ХУБИЕВ Ислам, физкультурали спортли КЧР аминистр йзаместитель АГЫР Мурат, туризмла йгьи чкIвыныргIа руысквала КЧР аминистр йзаместитель КУМУКОВ Казбек, ЭркеншахIар поселок йаныргIалу аграрна-технология колледж адиректор МАТАКАЕВ Тимур, арыпхьарали наукали КЧР а-Министерства аъачIвагIагIв МЕРЕМКЪВЫЛЬ Али, агвчIагIвра уысква йрыдкIылу ажвлара уыснкъвгагIв ХАКИРОВА Ася, акыт млыкврхIарала КЧР а-Министерства ащтийыгIвчва, «Абазашта» йгьи «День республики» газетква ржурналистква. Фадеев Валерий йшихIвазла, уахьчIва адуней къральква рпны экономика тшауацIыхрала Россия й-48-хауа агыларта акIитI, анхашала – й-76-хауа. – Россия акъральгIвчва рбзазара рыцIа йагъьхара ахъазла йчпачIвыйа? Сшазхъвыцуала, хIкъраль аштаква рпны акъральыгIва, амуниципальна власть органква ркъаруква адыркIылта ареспубликаква, акрайква, аобластьква ртшауацIыхра йазынхарквын, аштаква рынхара швапха амырдарыквын – уахьчIва хIызлачважвауа абаргвыраква йрылдзгIарныс ауаштI, – йхIватI Фадеев Валерий. Дагъстан Республика аэкономика бзита йыздыруа ажвлара уыснкъвгагIв Стародубровская Ирина йшылпхьадзауала, асоциальна институтква, азгIвадарахчартаква, агIвнабзазарта-коммунальна млыкврхIара рынхара агъьчIвымкIва, аштаква ртшауацIыхра уазынхарныс баргвызлуштI. Васильев Владимир Дагъсан Республика агIархарджьра промышленность штшауацIнахуа даквчважватI, анхара тыпква гIандыршауата абзазара йаларжьуа апроектква шынхауа гIайхIватI. Ауи унашва зхъицIауа ареспублика апны ахIаракьатчпара йадкIылу налог рымшвара ахъазла мыгIвхъгара ангIандыршауа шмачIым гIаликIгIатI. – АхIаракьатчпагIвчва авласть йазхъарцIарквын аналог ашвара тшгьацIнадыргушым. Ауи апш ацынхара щаквхIыргылра ахъазла Дагъстан апны ахIаракьатчпара хвыци аквтанайи йшрыцхIкIуаш хIащтапI. Ауи йапшта хIыздынхалра атахъу ауысква щардапI, – йхIватI Дагъстан а-Хъада. «АКЫТКВА РПНЫ АНХАРАДАРА БАРГВЫРА АЩТАГIАЙИТI» Афорум апкъ йтата йакIвшаз алачIвараква рпны аъачIвагIагIвчва чкIвыныргIа рыдынхалра, акытква ртшауацIыхра, социальна цхърагIара йазыбжу ауагIа нхарала йадгалра, анхагIвчва рхвитнагIаква хчара, акоммерция йалам аорганизацияква йрыцкIра, ажвлара рхъвыхыгIвчва рынхара агъьчIвра датшагьи ауысква йрылачважватI. АуасархIара, ацIлауатра рхIара йъаквчважвуз айззара апны млыкврхIарта зму афермерква гIачважватI, ауат ауасажьы ахв зхъалыз ашвхIаусыгIваквагьи гIалыркIгIатI. Дагъстан Республика Ажвлара палата йалу Магомедов Айгун йшихIвазла, хIкъраль йгIадырхарджьуа ауасажьы Иран щардата йъаргауа йгIалцIла ахв хъалтI. АуасархIагIвчва ауи рфайда алазтIхIва, ауагIа йтлапIахаз ажьы гьырзыхвгIахуам. Кърым Республика йгIатыцIыз Абажер Иван РФ Ажвлара палата апны йгIаныршу ашварагIварадара йгьи акоммерция йалам рыцынхарала а-Комиссия далапI, сквшщарда цIитIта виноград гIайырйитI. Ауи йшгIаликIгIазла, виноград йгIалху ажвчIвква гIазырхарджьуа ахIаракьатчпагIвчва йгIадрысабапуа апкъыгIваква рщарда Европа акъральква рпны йырхвгIитI. ЧкIвыныргIа рарыпхьари нхарала йадгалри йырзынархаз алачIвара апны Пятигорск йаныргIалу РАНХиГС Лагъь-КIавкIаз институт адиректор, РФ Ажвлара палата йалу Тльыс Азамат, ауагIахъа уысквала, ажвлара коммуникацияквала йгьи печатьла КЧР аминистр йапхъахауа йзаместитель Хубиев Ислам, чкIвыныргIа руысквала Дагъстан аминистр Саидов Камил, ауи йзаместитель Омарова Патимат, «Непрерывное образование для всех» жвлара адкIылара апрезидент Лобанов Николай ашIаква тшыззырбжьаз аъачIвагIаквала нхара рытхра магIныта йаму йаквчважватI. Хубиев Ислам йшгIаликIгIазла, асаби йгвапхауа аъачIвагIа дауымрыпхьарквын, датша закIы дхънаурыхыргьи анхара апны йдахIвраква мачIызлуштI. «Социальна хIаракьатчпара анхара экономика тшауацIназрыхуа амальпI», «Зылшараква ахъарысу ауагIа рыхъазла анхара рынок», «Акоммерция йалам аорганизацияква рынхара ауысла», «Амуниципальна жвлара палати (советква) асоциальна программакви» темаквала айчважвараквагьи джьащахъван. Афорум шакIвшазла згвгIанаграква гIахIазхIвыз КЧР Ажвлара палата апредседатель Молдованова Вера йшгIалылкIгIазла, айззара йаднакIылыз аъачIвагIагIвчва чкIвыныргIа ртшауацIыхра ахъазла згвы зхьуа, зылшараква ахъарысу йырцхърагIауа уагIапI. ГIвымшкI руацIа акъральыгIва власть органква йрылугьи аъачIвагIагIвчвагьи айззара апны йгIащтIырхыз абаргвыраквала йхътIу айчважвара акIвдыршатI. Амуниципальна гIаныршараква рпны ажвлара советква рынхара агъьызчIвуаш амальква гIархIватI, ашIыпIаква ргIащтийыгIвчва хIынхара швапха амыгIдатI. КЧР Ажвлара палата йалу йапшым анархараквала асоциальна баргвыраква хIрабакIуата уыс щарда гIащтIыхIхитI, зтахъырала агвчIагIвра уысква акIвзыршарныс зтахъу чкIвыныргIа рмурадква хъйарныс лшара рыхIтитI. КЧР Ажвлара палата аргваныта йацынхауа агвчIагIвра, апатриот организацияква РФ а-Президент йгрантква йызнымкIва йгIатыргахьатI, ауи араъа йъаквчважваз хIхъа аладупI. Апхъахьылагьи хIынхара рыцIагьи йшагъьхIчIвуаш хIазхъвыцуаштI, – лхIватI КЧР Ажвлара палата аунашвачпагIв Молдованова Вера.