Уруп районда бютеу социал учреждениеле джылны сууукъ заманында газ бла джылынныкъдыла. Сёз ючюн, Преградна станседе 1-чи номерли школда джангы газ котельная ишлене турады. Къач сууукълагъа дери аны ишлеб бошар мурат барды. Быйылгъа дери школну кёмюр от бла джылытыб тургъандыла. Ол джумуш кёб заманны алгъанды. Отун келтирген, кёмюр бла баджаргъан тынч болмагъанды. Энди аллай джарсыула боллукъ тюлдюле.
Уруп районнга газ тартылгъанлы кёб зат иги джанына тюрленнгенине ишек да джокъду. Бу ашхылыкъгъа джол ачылгъаны, айхай да, Къарачай-Черкес Республиканы Башчысы Темрезланы Рашид бла байламлыды. Ол, «Газпром» ПАО-ну правлениесини председатели Алексей Миллерге тюбеб, районнга газ тартдырыргъа кесамат этгенди.
Миллетни джашауун тынч да, таб да этген затланы бири газды, ол себебден районнга газ быргъыла баргъанлары бек магъаналы ишди.
Айтыргъа 2011-чи джылдан 2016-чы джылгъа дери республикада, ал джылла бла тенглешдирсенг, эки къатха аслам газ тартылгъанды.
Комментарии