Къарачай-Черкесияны Халкъ Джыйылыууну (Парламентини) 47-чи сессиясы, 25 ишге къараб, аланы юслеринден тыйыншлы документле алгъанды. Сёзден, эки кере окъулгъандан сора «О государственном стимулировании инвестиционной деятельности в Карачаево-Черкесской Республике» деген законну проектини 6-чы статьясына кийирилген тюрлендириуню проекти къабыл этилгенди.
Анга кёре, КъЧР-ге керекли инвестицион проектле, джарашдырыб, аланы ишлетиб тургъанланы хайырларына салыннган льготалы налогла 13,5 процентден 12,5 процентге тюшюрюлгендиле. Бу джорукъ 2020-чы джылгъа дери кючюнде турлукъду.
Законнга кийирилген тюрлениуню инвесторлагъа андан башха таблыкълары да бардыла.
Сессия эки кере сюзгенден сора социал джашау бла байламлы дагъыда талай законну проектин къабыл этгенди. Аланы бири 2019-чу джыл Къарачай-Черкесияда пенсионерни джашау кечинмек ачхасын Эресей Федерацияны пенсионерини 2019-чу джылгъа белгиленнген джашау кечинмек ачхасы чакълы бир этиб белгилеуню юсюнденди.
Депутатла «Об отдельных вопросах в сфере охраны здоровья граждан Карачаево-Черкесии» деген законнга да тюрлениуле кийиргендиле. Ол закон КъЧР-ни Саулукъ сакълау министерствосу бла элледе кеслери кеслерине оноу этген джергили органлагъа къарагъанладан башха медицина учреждениелени джабыуну джорукъларыны юслеринденди.
Республиканы «Особенности регулирования земельных отношений в Карачаево-Черкесской Республике» деген законуна да тыйыншлы тюрлениуле кийиргендиле. Алагъа кёре, энди фермерлеге ишлерин бардырыргъа берилген джерлени ёлчемлерин 2 гектаргъа джетдирилликлери изленеди. Бусагъатха дери уа ол джерлени ёлчемлери 1 гектар болуб келгенди.
Депутатла «О некоторых вопросах, связанных с реализацией в Карачаево-Черкесской Республике отдельных положений Лесного кодекса Российской Федерации» деген законну 7-чи статьясына этилген тюрлениуню да къабыл этгендиле. Закон 2019-чу джыл башил (январь) айны 1-ден кючюне кирликди.
Сессия, дагъыда талай ишге къараб, аланы юслеринден да тыйыншлы бегимле алгъанды.
Комментарии