ЭГЕР БОРЫШТЫ ТОЬЛЕМЕСЕНЪ...

Россия ФССП-сынынъ КЧР бойынша Управлениесининъ етекшисининъ орынбасары- бас тоьрешилик приставтынъ орынбасары Расул Ануарович Кумратов «Штрафларды тоьлевден тасаланатаганларды административлик яваплыкка тартув» деген тема бойынша соравларымызга яваплады. Тоьменде оны ман хабарласувымызды баспалаймыз. - Расул Ануарович, штрафты тоьлемевдинъ сонъалы клары кайдай кыйынлыклар эндирмеге болаяк? - Россия Федерациясынынъ тоьрешилик приставлар Федераллык службасынынъ ис орынындагы кисилери оьз аьрекетликлерин эндируьвде толтырувшы производство акында законшылыкты бузган аьдемлерге карсы административлик амалларды кулланм ага боладылар. Эгер киси борышты тоьлевден тасаланатаган болса, РФ КоАП-нынъ 20.25 статьясынынъ 1 кесеги бойынша ол административлик яваплыкка тартылады. Аьрекетлейтаган законшылык пан келисте административлик штрафты тоьлемесе, сол борышты эки кабат тоьлемеге керек болады. Яде он бес суткага дейим административлик арестке алынмага, элли саьатке дейим парызлы куллыкларды бажармага керек болады. - Сондай кыйынлыкларга ушырамас уьшин штрафты кайдай болжалдынъ ишинде тоьлемеге керек? - РФ КоАП-нынъ 32.2 статьясынынъ 1 кесеги бойынша административлик штрафты алпыс куьннен кешиктирмей тоьлемеге тийисли. Сондай административлик яваплыкка ушырамас уьшин борышты оьз ыркынъ ман тоьлемеге керек. Соны ман биргесине коьплер мундай касиетли административлик яваплыкты толтырувшы йыюв ман адастырадылар. Толтырувшы йыюв бес куьннинъ ишинде оьз ырклы кепте толтырылмага керек. - Республикамыздынъ яшавшылары арасында сондай право бузувшылар коьппе экен? - 2019 йылдынъ биринши ярым йылында Россия ФССП-сынынъ Карашай-Шеркеш Республикасы бойынша Управлениесининъ ис орындагы кисилери РФ КоАП-нынъ 20.25 статьясынынъ 1 кесеги бойынша административлик право бузувлар акында 335 ис туьзгенлер. Бу сан озган 2018 йылдынъ келисли болжалындагына коьре 119 протоколга артык. Йогарда айтылган болжалдынъ ишинде 290 исти суд тергеген. Олардынъ 36 бойынша административлик арест кепте шуьшлерине йолыктырылганлар, 40 бойынша парызлы куллыкларды бажарув акында токтаслар алынганлар. 215 борышлы кисидинъ тоьлеви эки кабатка оьскен. Суд пан салынган штрафлардынъ оьлшеми 2,3 миллион маьнет болган. - Шуьшлерине йолыктырув практикада кайтип озады? - А дм инистративл ик штраф эки кабатка оьссе, право бузувшы ога салынган тоьлевден баска онынъ эки кабатка оьскенин де тоьлемеге борышлы. Айтпага, административлик штраф 1 мынъ маьнет болса, эки кабат 2 мынъ маьнет болады. Тамамында бузувшы уьш мынъ маьнет тоьлемеге керек. Административлик арестке алынганларга тийисли учреждениелер туьзилгенлер. Онынъ туьп маьнеси-право бузувшыды ямагаттан айырым тургыстув. Парызлы куллыкларды толтырув ол административлик шуьшке йолыктырув болады. Кайдай куллыкларды толтырмага керегин Россия Федерациясынынъ аьр субъектининъ ерли оьзлик басшыланув органлары ман соьйлесилип токтастырылады. Кисидинъ парызлы куллыкларды кайтип толтыратаганын билер уьшин организацияга коьз салув эндириледи. Сондай болып тоьрешилик пристав-толтырувшыга право бузувшы неше саьат куллык эткени яде исти толтырувдан тасаланатаганы акында билдирилип турады. Сондай касиетли бузувшылар орамларды тазалав ман, йыйыстырув ман каьрлейдилер. - Эгер право бузувшы парызлы куллыкларды толтырувдан тасаланатаган болса ша? - РФ КоАП-нынъ 20.25 статьясынынъ 4 кесеги бойынша парызлы куллыкларды толтырувдан тасаланатаганлар да административлик яваплыкка тартыладылар. Бу статьядынъ санкциялары каты. Мысалга, куллыкларды толтырувдан тасаланатаганларга 150-300 мынъ маьнеттинъ оьлшеминде административлик тоьлев салынады яде он бес суткага дейим капалады. - Сондай парызлы куллыкларды республикамыз бойынша неше аьдем толтырган? - Быйылдынъ алты айынынъ ишинде регионы - мыз бойынша тоьрешилик пристав-толтырувш ылар парызлы куллыкларды толтырув акында 164 толтырувшы производстводы тамамлаганлар. Ызында тек бир борышлы излевге билдирилген эм табылган. Парызлы куллыкларды толтырув бойынша административлик яваплыктан тасаланувы ман байланыста бир аьдем излевге билдирилген. Практикада болатаганынша, бир борышлыга парызлы куллыкларды толтырув акында бир неше толтырувшы производство ашылмага болады. Суьйткенде, сол киси оларды тетесинше толтырмага тийисли. - Борышынъ бар экени акында кайтип билмеге болаяк? - Яшавшыда борышлары барма яде йокпа, тоьрешилик приставлар управлениесининъ официаллы сайтында «Борышларынъ акында бил» деген сервис аркалы карамага эм сайттан шыкпай, сол ок саьатлей тоьлемеге амал болады. Оннан да баска мобиль телефонлары уьшин бу электронлы сервиске ялгама (приложение) бар. Приложение янъы борышларынъ болса, билдируьвлер йиберип турады. Республикамыздынъ баьри яшавшыларын да сол амалларды кулланмага шакырамыз.