ДЖЬАУАПКIРАЛА АНАПIЩТIЫХРА ШВГIАЛАЛ!

Август а 25 Абхаз Республика йакIвшуш апрезидент алхраква Абхазия акъральгIвра рымата Россия йбзазауа алхраква йрылалырныс а-Конституция йгIарнатуа ахвитнагIаква рызгIарысабапра ахъазла Москва йгьи Къарча-Черкес рпны алхра участкIаква гIахъыртIытI. ХIреспублика апны йгIахъыртIыз Абхаз Республика й-6-хауа алхра округ й-5-хауа алхра участкIа акомиссия апредседатель ХЪАБЛЬАХЬ Зауыр йгьи акомиссия асекретарь ТАМ Сусана ареспублика ажвлара хабарргагаква рынхагIвчва йгIарынйатI. Ауат йшырхIвазла, йапхъахауата Абхазия апны а-Президент йъанатIа жвгIвы азабакIитI: АДЗЫНБА Шамиль Омар йпа (асквш 1970, май а 21 Аджар АССР, Самеба кыт дйытI, СогIвым дбзазитI, абхаз-грузин айсра далан, дполитика-жвлара уыснкъвгагIвпI); АНКВАБ Артур Мирод йпа (асквш 1969, сентябрь а 19 Гагра район, Бзыбь кыт дйытI, абхаз-грузин айсра далан, Абхаз къральыгIва университет апны дарыпхьагIв ахIбапI); АРШБА Олег Нури йпа (асквш 1964, май а 5 Ткъварчал город дйытI, абхаз-грузин айсра далан, йцIыхъвахауа асквшква ахъыхчарала Абхаз Республика аминистр дизаместительпI); ДЖАПУА Алмас Северьян йпа (асквш 1979, июль а 4 СогIвым дйытI, абхаз-грузин айсра далан, Абхаз Республика а-Парламент дадепутатпI); ДЗАПШБА Леонид Юрий йпа (асквш 1960, январь а 1 Гудаута район, Бармыш кыт дйытI, абхаз-грузин айсра далан, Абхаз Республика а-Президент дикьангьашагIвпI); КАКАЛИЯ Астамур Валерий йпа (асквш 1976, январь а 4 СогIвым дйытI, абхазгрузин айсра далан, дхIаракьатчпагIвпI); КВИЦИНИА Алхас Алексей йпа (асквш 1969, июнь а 23 Очамчыра район, КвтIол кыт дйытI, абхаз-грузин айсра далан, «Амцахара» политика партия дапредседательпI); ТАРБА Астамур Борис йпа (асквш 1961, январь а 16 СогIвым дйытI, абхаз-грузин айсра далан, «А-Телеком» компания адиректор дизаместительпI); ХАДЖИМБА Рауль Джумка йпа асквш 1958, мартI а 21 Ткъварчал город дйытI, абхаз-грузин айсра далан, Абхаз Республика да-ПрезидентпI). ЙауацIыхта ауат йырмагIну Абхаз Республика а-Квта Алхра Комиссия асайт апны йузыдыруаштI. – ХIреспублика апны алхра участкIа Черкесск, ПервомайскIа урам, й-26-хауа атдзы (ареспублика филармония) апны йаныргIалызлуштI, – йхIватI Хъабльахь Зауыр. – АлхыгIвчва рыхъазла ащымта асахIат а 8 угIалагата асахIат а-20-дза ашвква тIызлуштI. АсахIат а 20 амщтахь анапIщтIыхра агIарбараква гIарпхьадзауа йалагуштI. – Черкесск йаныргIалу алхра участкIа апны СКФО аштаква рпны йбзазауа Абхазия акъральгIвчва напIы щтIырхырныс рылшуштI. УахьчIвала Абхазия акъральгIвра змата ауат аштаква рпны йбзазауа гIвынзыкьыгIв йрайхIапI, – йгIалылкIгIатI Там Сусана. Алхра участкIа апредседатель йгьи асекретарь Абхазия йакъральгIвта СКФО аштаква рпны йбзазауа анапIщтIыхра джьгарта йгIалалырныс, алхрала рхвитнагIа гIадрысабапырныс тшырзынадырхатI. Ахъахвитра щала йгIатызгаз Апсны йа-Президентхуш даналырхуа ауи ареспублика йакъральгIву зымгIвагьи джьауапкIра рылархIвауата анапIщтIыхра йгIалалуашта йгвыгъитI.