Мындан алда Къарачай-Черкес Республиканы Правительствосуну Юйюню Гитче залында кенгеш болгъанды. Анда джамагъатны цифралы эфир телевидениеге кёчюрюуге къаллай хазырлыкъ болгъаныны, алгъыннгы телевидениени тохтатыуну сорууларына къарагъандыла.
«Быйыл арттотур (апрель) айны 15-ден республиканы джеринде алгъыннгы телевидениени каналлары тохтарыкъдыла. Къарачай-Черкес Республиканы Башчысы Темрезланы Рашид аны юсюнден кенгеш бардыргъанлы бери 4 ай озду. Бу джаны бла талай иш бардырылса да, баш муратыбызны толтурур дараджагъа джетмегеннге санайма. Алай дегеним, республиканы джамагъаты цифралы телевидениеге кёчерге 100 процент хазырлыкъ джокъду», - дегенди Къарачай-Черкесияны Правительствосуну Председатели Аслан Озов.
Республиканы Премьер-министри белгилегенден, КъЧР-ни Миллет ишлерини, кёбчюлюк коммуникацияла бла басманы хакъындан министерствосу бла Промышленность бла сатыу-алыудан министерствосу адамланы араларында информация материалла джайыу джанындан, биригиб, ишлерге борчлудула.
КъЧР-ни Туризм бла курортладан эмда джаш тёлю политикадан министерствосу республиканы уллу сатыу-алыу аралыкъларында волонтёр ишле къураб, адамлагъа цифралы телевидениеге кёчюуню юсюнден толу хапар айтыргъа керекдиле.
Аны бла биргелей Аслан Озов республикада муниципал къуралышланы тамадаларына цифралы телевидениеге кёчюуде халкъны хазырлыгъын билирге аманат этгенди.
Андан сора КъЧР-ни промышленность бла сатыу-алыудан министри Мурат Аргунов республиканы цифралы телевидениеге кёчюуюню юсюнден хапар айтханды.
«Цифралы телевидениеге кёчюуню юсюнде бардырылгъан ишлени джашаугъа сингдире эмда Къарачай-Черкесияны Башчысы Темрезланы Рашидни аманатын толтура республиканы Промышленность бла сатыу-алыудан министерствосу бир талай иш бардыргъанды. Джылны аллындан «горячая линия» къуралгъанды. Республиканы адамлары сорууларына джууаб излей аны бла хайырланыргъа боллукъдула», - дегенди Мурат Аргунов.
Аргунов айтхандан, цифралы телевидение джетмеген эллени Зеленчук районда Къобу Башын, Уруп районда Загедан Рожкаону, Пхияны, Дамхурцну, Гитче Къарачай районда Схауатны аны бла баджарыр ючюн, кёб иш къуралгъанды. Сёз ючюн, «МТС», «НТВ плюс» деген компанияла бла республиканы адамларын льготалы спутник телевидение бла баджарыргъа деб кесамат этилгенди.
«Льгота бла хайырланыр ючюн эллени тамадалары кёбчюлюкню атындан тилек къагъыт джазаргъа керекдиле. Ол телевидениеге кирген сагъатда 4500 сом ачха тёленеди. Андан сора хакъсыз 20 каналгъа къараб турурча мадар болады», - деб ангылатханды Мурат Аргунов.
Аргунов айтхандан, адамланы льгота бла хайырланныкъ къауумун цифралы приставкала бла баджарыр ючюн, аланы списокларын къураргъа тыйыншлыды. Бюгюнлюкде ол списокда 1367 адам барды. Аланы 626-на болушлукъ табдырылгъанды.
Премьер-министр муниципалитетлени тамадалары юйлеге айланыб адресли болушлукъ табдырыргъа кереклилерин да айтханды. Цифралы телевидениеге кёчерге джангыз бир ай къалгъанды.
Комментарии