Къарачай-Черкесияны Башчысы Темрезланы Рашид Терроргъа къаршчы комиссияны джыйылыуун бардырды.
Джыйылыуда аманлыкъны тохтатыуну джангы мадарлары бла джорукъларыны эмда аланы джашауда орунлу этиуню юслеринден сёлешинди. Кенгешге Эресей Федерацияны Президентини Шимал Кавказ федерал округда Толу эркинликли келечисини болушчусу Николай Дорожко, КъЧР-ни Халкъ Джыйылыууну (Парламентини) Председатели Александр Иванов, джорукъ сакълаучу органланы тамадалары, Правительствону членлери, районлада, шахарлада терроргъа къаршчы комиссияланы келечилери келген эдиле.
Джыйылыуну КъЧР-ни Башчысы Темрезланы Рашид ачыб, Эресей Федерацияда быллай аманлыкъла аз бола баргъанларын чертди. Озгъан он джылны ичинде 997-ден былтыр тогъузгъа тюшгенин билдирди. Терроргъа къаршчы кюрешгенле ишлерин таб къурай билгенлери бла хар джыл сайын болургъа тебреген 20 аманлыкъ иш ачыкъланыб, аланы этерге излегенле тутулуб тургъанларын да айтды.
- Адамланы террорист къоркъуудан сакълар ючюн, алагъа къаршчы кюрешни джангы мадарларын, джорукъларын хайырландырыргъа керекди. Эресейни Президенти В.В. Путин да аны айтады. Бу аманлыкъ чыгъар деб ишекли болурча джерледе, артыкъ да уллу сакълыкъ керекди. Къуру джорукъ сакълаучу органла болуб къалмай, джергили властланы къуллукъчулары да профилактика ишге магъана берирге тыйыншлыдыла. Бу муратлагъа джетер ючюн кеслерини профессионал усталыкъларын ёсдюрюрге да керекдиле, - деди республиканы Башчысы.
КъЧР-де Терроргъа къаршчы комиссия эмда муниципал къуралышлада комиссияла мониторинг процесслени тамалында айгъакъланнган затланы ишлеринде, айырыб да профилактика джаны бла кюрешде, хайырландырыргъа дурус болгъаны айтылды джыйылыуда. Аны тышында да бу аманлыкъдан къоркъуу болур деб сезгенлей, алайгъа джетерге хазыр болуб турургъа керекди, деген оюмну да билдирдиле кенгешде.
Республиканы Башчысы бу джууаблы ишге дин ахлуланы къошаргъа, комиссияла джыйылгъан сагъатда аладан адамланы да чакъырыргъа дурус болгъанын ангылатды, джамагъатдан да болушлукъ чыгъарын билдирди. Джашауда эм магъаналы объектле, террордан заран джетмез ючюн къалай сакъланнганларына къарауну хакъындан да айтылды.
Сюзюлген ишлени юслеринден тыйыншлы бегимле алындыла, белгиленнген затланы джашауда бардырлыкъ организациялагъа, къуллукъчулагъа алгъындан да сакъ болургъа борч салынды.
Комментарии