ДЫРРА ЗМУ ЙЫМГIВА ХЪТIЫПI

«Дырра зму дгьыдзуашым» – абазаква ажважвта йхIымапI. УъачIвагIагIв бзихара ахъазла апхьарта уъацIалуа аъачIвагIа гIацIгарта апны йгIауархIвуа йахъазымкIва, уаргьи шIыцракI шууырдыруаш уащтазлара атахъыпI. УахьчIва швлабасырдырырныс стахъыпI КъарчаЧеркес педагогика колледж йгIвбахауа акурс йапхьауа ЛАГIВЫЧВ Инна Зауаль йпхIа. Инна асквш 2003, август а 9 Къвбина кыт дйытI. АтгIачва хвгIвы йнадзун: аба Зауаль, ан Мария, айщчва Мурати Руслани йгьи лара. АпхIвыспа лан сквшщарда абухгалтер дицхърагIагIвта дынхатI. Лаща Мурат Къвбина аквтанай апхьарта апны физкультурала арыпхьагIвта дынхитI. Ауи йынхара апны асабиква аспорт бзи йырбауа йбжьарныс уыс хъадата йпхьадзитI. Муратгьи Руслангьи шIыцта йгIахъыртIыз аспорт комплекс апны хвитта абакIра йабжьагIвыпI. Асабиква раба Зауаль сквш 25 аполиция дынхатI, майор чын йымата тшпсщара дчIвахтI. Ани аби рсабиква бжьаща пшдза рырттI, ахIбачва хвы рыквырцIауата абзазара амгIва йыквыржьтI. УахьчIвала асабиква раба дгьрыцхым, дырхъышвтищтара быжьсквша цIуаштI. Инна апхьарта дъадзапхьуз йалкIгIата география йгьи обществознание рыцIа йгIалылхуан. Йапхъахауа ларыпхьагIв Бала ФатIима Рауф йпхIа лгвы пхата дтапI. – Тамамта сапхьауа, сыгIвуа сызбжьаз, апхьара бзи йсзырбаз ФатIима Рауф йпхIа лакIвпI. Ауи лбзира зынгьи йыгьсхъаштылуашым, – лхIвитI Инна. – Йхвбахауа акласс йгIашIарышвта хIкласс унашва ахъызцIуз КIвращын Елизавета Петр йпхIа лакIвпI. Ауи щарда здыруа дарыпхьагIвпI, лажва хвы амапI, швабыжта сылзыразпI. АпхIвыспа апхьарта апны спортла йгьи уыса апхьарала анкъвакъвраква дрылалуан. Йбыжьбахауа акласс угIалагата йжвабахауадза «Амара» ансамбль дрылата дгIахIвытI. Инна дъадзахвыцыз лаба йапш ахабзахчагIвчва рфаша лшвыта дынхарныс лтахъын, ауаса апхьарта дангIалгуз арыпхьагIв ъачIвагIа рыцIа лгвы йшаквкIу гIалгвынгIвытI. Асквш 2019 агIан ауи апхьарта бзита дгIалган, Къарча-Черкес педагогика колледж апычIв классква рарыпхьагIв ъачIвагIа гIацIылгарныс дыцIалтI. – Аколледж апны йсыцапхьуз ласдза срабадыртI, гIвзачва щардагьи скIытI. ХIарыпхьагIвчва зымгIва бзита зуыс здыруа йрыуапI. Ацри бызшвала апхьара сахIатква акIвзыршауа Агырба Хаджьат Амин йпхIа дгIвычIвгIвыс нардзапI, лажва хвы амапI, хIызлалцIгIалакIгьи джьауап алырга гIахIылтитI, – лхIвитI апхIвыспа. Инна йшгIалылкIгIауала, арыпхьагIвчва зымгIва рдырра цIолаква астудентква йрыцагIвыршитI. – Сара сгвгIанаграла, асабиква йуыздзыргIвырныс йгьи бзита йапхьарныс ахъазла арыпхьагIв апхьара сахIатква джьащахъвата йгьи йалыргата йакIвйыршара атахъыпI. Ауаъа йаланакIитI йапшым адидактика хъвмарраква, ауыжвгIанчIви технологияква ргIарысабапра датшагьи, – йгIалылкIгIитI астудент. Инна бзита дапхьара акIвымкIвагьи йапшым акурскви атшыбжьаракви рпны лдырраква йрылалырхIитI, анкъвакъвраква дрылалитI. Йапхъахауа акурс дапхьауата йадыргалыз «Дружба народов» анкъвакъвра лахIвара щарда гIалыланацIатI. Ауи дызлаз агвып абаза культура гIарбара хачIвыта йгIарырттI. Ауат атаца ахIбачва дшрыквнардылуа ацIас гIадырбатI. Анкъвакъвра зырхъвыхуаз ажюри арат астудентква ргIаджвыквцIара ргвапхатI. Инна лгвып «Колорит народа» номинация апны йапхъагылагIвхатI. АпхIвыспа лапхьари дызлалуа ажвлара уыскви аунагIва йгIацIанакIуа ахъвдаквцIараква рырхъйара йыгьрызарархум. Ауи йшлылшауала лан дылцхърагIитI, йапшым афачIвква лмацIауитI, Инна дпхIвыспа щаквкIыпI. Ауи збзиру лан Мария лакIвпI. Ан лгIариква апшдзара йазылбжьауата мгIва тамам йшыквылжьуаш, ауагIа рпны дшгIампхащуш дащтапI. ЛагIвычв Инна йгьи арахьарат йапшым аъачIвагIа гIацIгартаква рстудентква ргвтара пшдзаква гIардахIвырныс, йъанызлакIгьи рыхьыз пшдзата йырхIвауа, хвы рыквырцIауа, рткъвымква рхъа рыладухауа йъачIвагIагIв бзихарныс рзыхIтахъпI.