ЧКIВЫНЫРГIА АЧВГЬАХАРАКВА ЙЫРЧВЫРХЧИТI

Декабрь а 26 Черкесск город апны атерроризми аэкстремизми рабакIра йазынархата айззара акIвшатI. Ауи «АкъральыгIва уагIахъа, дин, хабарргага политика абзазара йалажьра» йазалху апрограмма апкъ йтата йадыргалтI. АлачIвара йалан ауагIахъа уысквала, ажвлара коммуникацияквала йгьи печатьла КЧР аминистр КУМУКОВ Альберт, атерроризм абакIрала КЧР акомиссия аунашвачпагIв СТЕПАНОВ Валерий, КЧР апрокурор йцхърагIагIв КИПКЕЕВА Айшат, юстицияла РФ а-Министерства КЧР-ла а-УнашвахъцIарта знапIыцIу йзаместитель КЛИВЕКИН Максим, туризмла, акурортквала йгьи чкIвыныргIа рполитикала КЧР-ла аминистр йзаместитель НАЙМАНОВ Расул, КЧР-ла МВД экстремизм абакIрала аквта аоперуполномоченна ПХЕШХОВА Ирина, хIреспублика агородква, арайонкв, Россия аюристква р-Ассоциация КЧР-ла ахъвшара ргIащтийыгIвчва. Аминистр Кумуков Альберт айззара гIахъитIуата атерроризми аэкстремизми рабакIрала уыста йдырхъйауа, ари йапшу анйараква радгалра магIныта йрыму дгIарыквчважватI. Ауи йшихIвазла, ауагIахъа уысквала, ажвлара коммуникацияквала йгьи печатьла КЧР а-Министерства ари анархарала акъральыгIва хачIвква архъйауата ахабзахчара органква, ажвлара, адин организацияква, чкIвыныргIа радкIылараква аргваныта йрыцынхитI. – АуагIахъаква, адинква райгвара рыбагъьара, атерроризми аэкстремизми рабакIра азынхара хIхачIв хъадаква йрыуапI. Ари ауысла акъральыгIва программа абзазара йалагIжьуата нхарата йакIвхIыршаз гьмачIым. Ажвлара, адин организацияква, ахабзахчара органква рцхърагIарала алачIвараква, чкIвыныргIа руацIала агIашIакIра нхараква акIвхIыршатI. ХIминистерства анхагIвчва ауагIахъаква ращтаныкъвара рыбагъьара, атерроризми аэкстремизми рабакIра йазынархата СКФО-ла йакIвшаз айззараква йрылан. Ауи йахъазымкIва, хIреспублика ахабарргагаква руацIала ансисквша йадыгIгалуа аршIыйара журналист анкъвакъвра дахIврала йакIвхIыршатI. Ауи апкъ йтата ажурналистква йдрыхIазырыз гIвырати программати 500 райхIа ауагIахъа газетква йгIарыквшватI, телебарала йгIадырбатI. Датшагьи хIреспубликала апхьарта 180 рпны атерроризми аэкстремизми рабакIра йырзынарху стенд 200 абуклетква рыцта йандыргIалтI, ари анархарала арыпхьара семинарква акIвхIыршатI, – йхIватI Кумуков Альберт. Кипкеева Айшат йшгIалылкIгIазла, атерроризми аэкстремизми рабакIра ауысла ажвлара, адин организацияква рацынхара рымчра магIын ду амапI. – Интернет ашIаква ртшауацIыхра йъадзасабапу апшта рдунейпшыща йшазарархауагьи гIалскIгIара стахъыпI. Ауи хIапшIагылуата чкIвыныргIа руацIала апрофилактика нхараква йгьи мурад гвымха зму чкIвыныргIа мыгIвхърымгара ахъазла хIашIамсуата ашIаква хIрыдынхалра атахъыпI. Йауа ухIварыквын, чкIвыныргIа мыгIвхъызгауа хабар щарда Интернет йгIатарцIитI. Асквш 2020 январь – ноябрь руацIа Интернет напа 81 рпны ари ауысла мыгIвхъгара ндыршата йгIахIрыбергьыльтI, ауат рынхара шгIашIадрысуашла «Роскомнадзор» тшазынахIырхатI, – лхIватI Кипкеева Айшат. Ауи датшагьи ажвлара ртынчра йазарархауа аэкстремист гвыпква йшрабакIуа, экстремист литература йахъазымкIва, агIвжвагаква шдрыхIазыруа зну шгIарыцIырхуа гIалхIватI. – ХIреспублика апны аэкстремист гвыпква рынхара чвгьахара шапщылу КъарчачкIвын район апны агIвжвара йгIанарбатI. Апхъахьылагьи хIкъаруква адхIкIылта атерроризми аэкстремизми рабакIра хIазынхуштI, – лхIватI Кипкеева Айшат. КЧР-ла МВД экстремизм абакIрала аквта анхагIвы Пхешхова Ирина апхьартаква рпны асабиква атерроризми аэкстремизми чвгьарата йырпщылу гIаргвныргIвра гватра азалхра шатахъу гIалылкIгIатI. – Аэкстремизм абакIрала агIашIакIра нхараква рымчра атахъыпI. ЙалкIгIата, атерроризм ажвлара рыхъазла йшшварагIвару асабиква йгIаргвынхIыргIвра ахъазла йапшым асоциальна видеороликква, абуклетква гIахIрысабапырквын рыцIа йагъьхуштI. Акытква йбзазауа ашIаква рыхъазла атерроризми аэкстремизми рабакIрала апхьара семинарква акIвхIырша йауаштI. Асквш 2021 апны ари ауыс КЧР-ла МВД экстремизм абакIрала аквта апны йадыгIгалырныс ажванахъа гIазгитI, – лхIватI Пхешхова Ирина. Юстицияла РФ а-Министерства КЧР-ла а-УнашвахъцIарта знапIыцIу йзаместитель Кливекин Максим ажвлара, аполитика, акоммерция йалам организацияква ашвъа йананырцIауа йымгIващара ахъазла аргваныта йшрыцынхауа гIайхIватI. Туризмла, акурортквала йгьи чкIвыныргIа рполитикала КЧР аминистр йзаместитель Найманов Расул атерроризми аэкстремизми рабакIрала акъральыгIва хачIвква дырхъйауата хIреспублика йхIаракIу апхьартаква йрыцIу астудентква йшрыдынхалуа, ршIыйара злу, абизнес проектква лызхуа йшырцхърагIауа, атгIачва шIаква йшрыцыркIуа дгIаквчважватI. – РшIыйара злу, ахIаракьатчпара тшадызкIылуа чкIвыныргIа айззараква рпны астудентква рпахь йгIачважвитI, йызщту ауысква, анхара магIныта йаму йгIарыквчважвитI. ЧкIвыныргIа ауаса йхIмыргвышхварквын ажвлараполитика бзазара датшата йазхъвыцуаштI, – йгIаликIгIатI Найманов Расул. Айззара апны йгIачважваз атерроризми аэкстремизми рпшIагылра дрымчуата йгIалыркIгIаз ахачIвква шацдырхъйушла йагвынгIвытI.