БОЛЖАЛЫННАН АЛДЫН

Республикада А-155 Черкесск-Домбай автойолынынъ Муруджу сувыннан оьткеретаган 12 метрлик коьпирине капиталлык ремонт этилген сонъ, ол болжалыннан бир ай алдын кулланувга берилди. Росавт одорга бойсынувлы «Кавказ» федераллык автомобиль йоллар управлениеси» федераллык казна учреждениесининъ йолшылары ман капиталлык ремонт куллыклары ярым йылдан аз заманнынъ ишинде толтырылганлар. Капиталлык ремонттынъ барысында коьпирдинъ оьлшемлери мардалык коьрсетимлерге дейим еткерилгенлер, диреклери эм олардынъ арасындагы конструкциялар авыстырылганлар, сувдынъ ягалары беркитилгенлер. Коьпирдинъ юк коьтеруьвлик болымлыгы, «Кавказ» Упрдор ФКУ элшиси билдиргенинше, 100 тоннага дейим еткерилген. Коьпир белгили Домбай курортынынъ касында ерлескен эм юрттынъ туристлик болымлыгын оьрлендируьв уьшин йолдынъ кавыфсызлыгы эм онъайлыгы маьнели. 2018 йылда КЧР-дынъ мажаларында «Кавказ» Упрдор ФКУ ман уьш курылма мардалык аьлге келтирилген. Олар эки коьпир (Теберда эм Муруджу сувларында) эм Черкесскке кирилетаган ерде 30 метрлик сув оьткеруьвши дуьдик боладылар.