Къарачай-Черкесияны ара шахарында къууанч халда биринчи скейт-парк ачылгъанды.
Заманны излемине джууаб этген скейт-паркда 10 тюрлю-тюрлю фигура барды, аланы юслери бла спорт усталыкъларын белгили спортчула бла бирге джангы къошулгъанла да ёсдюрлюкдюле.
Паркны ачылгъанына аталгъан къууанчда айтылыб тургъан скейтерле бла роллерле усталыкъларын кёргюзгендиле. Джыйылгъан миллетге спортчула кёб сейир затны теджегендиле, джаш спортчула да аладан артха къалмай кюрешгенлери бла бюсюреуге тыйыншлы болгъандыла. Экстремал спортчуланы бир къауум учуу трюкларына адамла кёз алмай къарагъандыла. Спортчула, джыгъылсала да, ёрге къобуб, ишлерин ахырына дери джетдиргендиле.
Къралны айтылыб тургъан спортчулары мастер-классла бергендиле. Бютюн да бютеу къралгъа белгили экстремал Григорий Сенко – XSA команданы члени - кимни да эсинде къалырча оюн кёргюзгенди. Ол скейтбординг бла кюрешгенли 10 джылдан аслам болады, халкъла арасы эришиуледе кёб кере алчы орунлагъа чыкъгъанды.
Парк ачылгъан кюн къралны джер-джеринден келген велоспортчула да эришгендиле.
Комментарии