Актуально В КЧР определили лучшего учителя родного языка и литературы Актуально Глава КЧР Рашид Темрезов вручил ключи от 19 новых пассажирских автобусов Актуально «Россети Северный Кавказ» на 7,7 % улучшили платежную дисциплину потребителей электроэнергии в КЧР Актуально В ФСБ России по КЧР рассказали как распознать телефонных злоумышленников  СКФО Новый логотип курорта Эльбрус в КБР представили в студии Артемия Лебедева

Бир тилек да джууабсыз къалмайды

28.04.2020 252
Бир тилек да джууабсыз къалмайды

Бу къыйын, адамланы саулукъларына эс бёлгенлей турургъа керек заманда да Къарачай-Черкес Республиканы Башчысы Темрезланы Рашид Инстаграмда джамагъатны тилеклерине, джарсыуларына, тарыгъыуларына къарагъанын къоймайды. Бу кюнледе да терк халда бир бёлек соруугъа къаралгъанды, аланы газет окъуучуларыбызгъа теджейбиз.

Гитче Къарачай районну джамагъатындан ара межгитни тёгерегинде багуш бир да бир кёбдю деген тарыгъыу келгенди. Джазгъан адам айтхандан, ол багуш кёзге тюшюб турады.

Район администрация бу тарыгъыугъа терк халда эс бёлюб, керекли ишлени бардыргъанды, элчилени да болушдуруб, бютеу багушну джыйыб къоратханды.

 

Черкесск шахарны Парковая орамында орналгъан 11-чи номерли кёб фатарлы юйде джашагъан тиширыу Башчыгъа аланы юйге къарагъан компаниядан тарыкъгъанды. «Бизни юйге къарагъан компания джукъ этерге излемейди, бир тилегибизге да къарамайды. Биз а фатар-коммунал джумушла ючюн, тамамлы ремонт ючюн да хакъны заманында, кереклисича, тёлеб турабыз». Аны тышында да, автор чертгенден, подъездле джууулмайдыла, бусагъатда амалсыз керекли дезинфекция ишле да этилмейдиле.

КъЧР-ни Кърал мекямгъа къарагъан управлениеси бу ишге эс бёлгенди, подъездле тазаланнгандыла, дезинфекция ишле да бардырылгъандыла.

 

Черкесск шахарны Космонавтла орамында орналгъан 43-чю номерли кёб фатарлы юйде джашагъанла билдиргенден а, ол юйде лифтле ишлемейдиле. «Сиз джамагъатха болушлукъ этиуню юсюнден кёб айтасыз. Алай а бизни лифтлерибиз ишлемей тохтаб турадыла. Электросетле электрокъууат бермейдиле, айыбны да бизни юйге къарагъан компаниягъа атадыла», - деб джазылады тарыгъыуда.

КъЧР-ни Кърал мекямгъа къарагъан управлениеси бу халны тинтиб къарагъанында, ол юйде джашагъан адамла кёбден бери бютеулей юйню керекли джумушларына саналгъан (общедомовые нужды) электрокъууат ючюн хакъ тёлемей тургъанларын ачыкълагъанды. Аны бла байламлы бу объектни электрокъууат бла баджаргъан организация аны тыяргъа деген оноугъа келгенди. Юйде джашагъанла ол оноу бла шагъырей да болгъандыла.

КъЧР-ни Кърал мекямгъа къарагъан управлениесини излеми бла арттотур (апрель) айны 4-де лифтле ишлеб башлагъандыла. Алай а тинтиу ишле бардырыллыкъдыла. Бу юйде джашагъан адамла бла сёлешиннгенди, болум ангылатылгъанды. Ала бары да борчларын тёлерге разылыкъларын билдиргендиле.

 

Къарачай шахарда джашагъан тиширыу билдиргенден, шахарны Киров атлы орамы бла бешинчи кюн суу барады, алай а анга киши эс бёлмейди.

Къарачай шахар округну администрациясы болумну къолгъа алгъанды, ол орамгъа джергили Водоканалны къуллукъчулары барыб къарагъандыла. Устала джерни тюбю бла баргъан канализация быргъы тешилгенин ачыкълагъандыла. Алай а ол энчи халда къошулгъан быргъы болгъанды. Водоканалны ишчилери аны иеси ким болгъанын ачыкълаялмагъандыла, алай болса да быргъыны джамагъандыла, суу чыкъмазча этгендиле.

Башчыгъа Инстаграмда быллай, башха тюрлю да кёб соруу, тилек келеди. Ол мадар бла хар бир адам да хайырланыб, кесине энчи джазыб, кереклисин айтыргъа боллукъду.

252 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный