Бу кюнледе Къарачай-Черкес Республиканы Башчысы Темрезланы Рашид Уллу Ата джурт къазауатны ветераны Николай Александрович Антиповну 95 джыл толгъан юбилейи бла алгъышлаб, саугъалагъанды. Ол анга Эресей Федерацияны Президенти Владимир Путинни алгъышлау къагъытын да бергенди.
Темрезланы Рашид бла Черкесскени мэри Тамбиев Руслан ветеранда къонакъда талай кере болгъандыла.
«Николай Александрович, сиз джигит тёлюню келечисисиз. Биз хар ветеранны сыйын мийикде тутабыз. Биз сизни аллыгъызда хаман да борчлубуз. Джууукъларыгъыз бла, тенглеригиз бла кёб джылланы джашагъыз», - дегенди республиканы Башчысы.
Николай Александрович къазауатха 18 джылында баргъады. Ол 1943-чю джыл биринчи Украин фронтну 40-чы артиллерия полкуна тюшгенди. Ары дери шофёр усталыкъгъа окъугъаны себебли аны «Студебеккер» деб джюк ташыгъан машинагъа шофёр этедиле. Ол машинасы бла къазауатны ачы джолларын ётгенди. Бесланда, Румынияда, Польшада, Германияда болгъанды.
Къазауатда кёргюзген джигитлиги ючюн кърал берген саугъаларыны арасында Ата джурт къазауатны II-чи дараджалы ордени, 15 медалы бардыла.
Ол къазауатдан къайтыб Садовый элге келгенди. Андан Черкесск шахаргъа кёчюб НВА заводда слесарь болуб ишлегенди. Музыка инструментлени бек сюеди. Мандолинада ойнайды, къобузну иги согъады.
Кюмюш сакъаллы огъурлу къарт бусагъатда туудукъларына, аладан туугъанлагъа къууана джашайды.
Комментарии