БАМ ЙАЙТЫЗ АСКВШКВА ЙХIАЛЬ РСАЙТI

Байкал-Амур айхамгIва (БАМ) атурых й-ХХ-хауа асквшышв й-30-хауа асквшква рпны йгIалагитI. СССР а-Правительства аунашвала асквш 1932 ахъаква рагIан БайкалАмур айхамгIва щтIацIара йалагатI. Йапхъахауа алыцIыртаква «БАМ–Тында» асквш 1937 йхIазырхатI, «Волочаевка–Комсомольск-на-Амуре» – асквш 1938, «Известковая–Ургал» – асквш 1940 йалгатI. Абашта айсра Ду ангIалага айхамгIва ауыхвара гIашIадрыстI. Апхъала йщтIарцIаз амцIырххуамца асквш 1942 агIан Сталинград йазцауа мгIва щтIарцIатI. Айсра амщтахьгьи ласы БАМ айхамгIва гьгIарымгвалашвахтI. Йазалхта амгIва адынхалра анджвыквырцIах асквш 1974 агIан акIвпI. Ауи ауыс къральыгIва магIны зму комсомол уыхварата йщаквгылтI, Совет Союз йапшым ашIыпIаква йгIартыцIыз чкIвынчвата гIвмильуаныгIвкI раъара адынхалтI: айхIарагIв дара ртахъырала нхара йцатI, чкIвынчва щардагIвгьи ркъвырльыкъвхара сквшква айхамгIва шIыц аурала йгIаншуз йапшым астанцияква рпны йакIвшатI. Асквш 1984 адзын зуыхвара алдыргаз БАМ ашIыпIа аъащала швабыжта йалачпу мгIвапI. Урата километр 3819 зму амгIва йпхатшу дзыгIвта 11 йырхъыситI, ауат рпны цхIата 140 хъыпI, чIвылацIгIва мгIвата (тоннель) 8 амапI. БАМ йынхаз чкIвынчва щардагIв ауи агIамта рхIаль асайтI, рхъацIара архъвыхтI, абзазара мгIва йыквнажьтI. УахьчIва швйыхасыргIвазара стахъыпI БАМ ауыхвара апны гIвысквша зкъвырльыкъвхара акIвшваз АлбыргIан кыт абзазагIв МЕРЕМКЪВЫЛЬ Ибрагим ГIайса йпа. Ауи асквш 1964, август а 23 АлбыргIан кыт дйытI. Апхьарта жвакласскI дангIарылга сквшыкI акыт асовхоз дынхатI – алацIага, ачвахыга, акомбайн йаквчIваз ахIбачва цхърагIагIвта дрыцын. Асквш 1982, декабрь а 2 повестка йымата ХIабаз айсра комиссариат дадгылтI. Ауаъа йазыркIкIыз агвып йшацыз йджвыквыргатI. Йапхъахауата – Ставрополь, уадыргIвана – Минеральные Воды йыргатI. Ауаъа асамолет йаквдырчIватI, агIсахIаткI йанпссгIа амщтахь Хабаровск йчIватI. Ауаъа йтыргахын, ачкIвынчва гIвахъагIвымш йатамгIвайсхтI. Комсомольск-на-Амуре апны йаныргIалу астанция Дуссе-Алинь йцIыхъвахауа гIашIасыртата йырзалтI. – Ар къвырльыкъвхара съадзаныз агIвысквшагьи ауи астанция йызгатI, – йгIайгвалашвахитI Ибрагим. – Апоездква зланыкъвушыз амгIваква щтIазцIуз датша ротан. Сара сызлаз агвып йщтIарцIуз айхамгIва хIахьпшлун – амшIы йгIалху ашпалаква йрылаз аскобаква гIалцIуан, хIара ауат джьахIва дула йалахIцахуан. АцIыхъва хIангIаджвыквылхуашыз агIан акIвпI амашина дуквала абетон шпалаква щтIарцIауа йаналага. Апсабара хIпны йгьапшмызтI. Агъны швабыжта йчвгьан, хьтата градус 45 анаъаз щардан. Апахь уынха анамуаз агIан апещ ауацIа атшыбжьараква акIвшун – автомат амцIыхIхуа, йамцIахIцIахуа, противогаз ахъахIцIауа хIырбжьун. СквшыкI Май а 9 агIан сы гIасытI. РыцIа йанпхагIвыз июнь, июль, август аквтаквадза ракIвын. Йаншуарадзаз амшква рагIан апхарагьи градус 50-дза йхъалуан. Ауи азаман айхамгIвала апоезд агIвсызтын – абна йаласта мцаблыра ангIаншузгьи аъан. Йапшым ауагIахъаква йгIарылцIта Къарча-Черкес йауаз ачкIвынчва жвыгIвыгIв хIнадзун, агIвысквшагьи хIацыта йацыгIган, хIгIайхтI. Ужвы йъагIадзазгьи хIанйалитI, хIайчважвалитI, хIгьабачвымдзтI. Меремкъвыль Ибрагим йшихIвахуала, ауи атлахан ашварагIварарала Бам Афганистан амщтахь йгIвбахауа агыларта аман. Аказарма агъныла буржуйка-хIва йызпхьауа ахIаквквала йдырпхун, сахIаткIла арпхага анхара ашIадрысзарквын, зынла апещ агърашвуан. Ауи абуржуйка йгIахъыцIуаз агIваз щардагIвы ахъваратI, Зайыкъва йауата йрыцыз ачкIвын ачва дшалаз алгIва дахъваран дгIаргхтI. Асквш 1984, декабрь а 14 ар къвырльыкъвхара алзыргаз шгIауырщтхуала аунашва ангIацIцI аефрейтор Меремкъвыль Ибрагимгьи дгIауырщтхтI, жвипщымшкI амгIва дыквын, дабга-дызгIвадата йтгIачва дгIарыдгылхтI. Ибрагим къвырльыкъв бзита йъайхаз ахъазла хвмедалькI йылата дгIайхтI. Ауат йрыуапI асквш 1984 йгIайквнадыргаз «За строительство Байкало-Амурской магистрали» медальгьи. Ауи ртшхъвага тлапIапI, амгIва уыхвара йцIыхъвахауа ахъвы анщтIарцIуз агIан Ибрагим дызлаз арота йауата пщгIвы йгIарырттI. Къвырльыкъвхара дангIайх амщтахь Ибрагим трактор нкъвцара тшазибжьан, акыт асовхоз апны йынхара джвыквицIатI. Йапхъахауата дызквчIваз атрактор ажвызтынгьи, йара йгвы аквкIта дынхун, хачIвыта йгIайыртуа йнардзата йырхъйун. Ари аъара дшIата адгьылрхарджьра йадгылыз Ибрагим йынхаща ргвапхан, асовхоз трактор шIыц ангIарадза щарда йымхъвыцуата ауи даквдырчIватI. Йаргьи йуыс дазъазахан, асквш 1985 угIалагата «йайха тшы» дазцIабыргта ужвы йъагIадзазгьи адгьыл дадынхалитI. Атехника бзидздзата йдыритI, дызлазынымхуш гьаъам. Асовхоз дъадзанхуз Ибрагим чIахIра грамота щарда йшвапху нхарала йгIатигатI. Аколхозква, асовхозква йыржвыгъата йанынхуз путевка гIайквнадырган, жвыхвымшкI Ленинград тшпсщара даъан. ХIзаман акъральыгIва йачIву амлыкврхIартаква аъахмызтIхIва, щардагIвы адгьылква ндырхитI, тшыгIвра гIацIаргитI. Акыт апны ауат анхараква йырпщылу руысква Ибрагим йцхърагIара аламкIва йгьакIвшум. «Ауыс ушапшуа акIвпI йшгIаупшыхуа» – рхIвитI ауагIа. Меремкъвыль Ибрагим дшчкIвыныркIваз ауыс бзи йбауа, анхара дачвымшвауа, хвы азибауа дгIадзынгылтI. Ибрагими йхъапщыла ФатIими хгIвыпхIчви пакIи гIадзындыргылитI. Ауат рыхъазла анхара йачIву раба йанакIвызлакIгьи дшвапхапI. СынчIва БАМ ауыхвара йалагищтара (асквш 1974 йгIашIарышвта) йцIуа асквш 45 хIыртлапIуштI. Ауи айхамгIва ащтIацIара згIапсара аду, комсомол азшIытрала ауыхвара ду йалаз ачкIвынчва згIвадара багъьа рымата, рунагIваквала ргвы бжамкIва, рсабиква рыхайырква нардасуа сквшщарда адуней пшдза йыквызтI!