«Б И ЗИ М КУЬШ ИМИЗ - БИРЛИКТЕ»

Туьнегуьнлерде Карашай-Шеркеш Республикасынынъ Басшысы Рашид Темрезов ямагатшылык, оьз ыркшылар, саваплык организацияларынынъ, оьз ыркшылар козгалысларынынъ катнасувшылары ман эм «Мы Вмест е» Савлайроссиялык акциясынынъ партнерлары ман йолыгысты. Пандемия шагында керексинетаган аьдемлерге ярдам эткенлери эм демевлегенлери уьшин, юртымыздынъ етекшиси республикамыздынъ отызга ювык яшавшысын савгалады. Волонтерларды эм #МыВместе акциясынынъ партнерларын торжестволы савгалав амалламасы Черкесск каласынынъ Маданият уьйинде озды. Регионнынъ Басшысынынъ Муьсиревлик хатлары ман республикамыздынъ эсли эм юруьв болымлыклары тоьмен болган яшавшыларга тегин ярдам этип турган 27 оьз ыркшы белгиленди. Олардынъ арасында ОНФ-тынъ, «Единая Россия» партиясынынъ оьз ыркшылар штабынынъ, «Мы Вместе» штабынынъ, КЧР МВД-сындагы Ямагатшылык советининъ, У.Д.Алиев атлы КЧГУ-дынъ оьз ыркшылар козгалысынынъ, «Самира» ямагатшылык организациясынынъ, «Территория милосердия 09», «Моя Карачаево-Черкесия», «Ансары» саваплык фондларынынъ, «Фонд добра», «КЧР - территория жизни», «Волонтеры-медики Карачаево-Черкесской Республики» организациялардынъ, «Сердце КЧР» эм «Прайд-09» оьз ыркшылар козгалысларынынъ аьрекетшилери бар эдилер. Торжестволы амалламада КЧР Басшысы олардынъ баьрисине ак юреклик разылык соьзлерин айтты. Баьримиз уьшин де авыр шакта оьз ыркшылар демевлеп турган яшавшылардынъ арасында Уллы Аталык кавгадынъ ветеранлары, ясы уьйкенлер, коронавирус инфекциясына ушыраганлар эм уьйде эмленуьвди оьтетаганлар бар эдилер. Юртымыздынъ коьплеген аьеллери, солардынъ арасында коьп балалы эм онъайлыклары тоьмен болган, авыр яшав аьллерине туьскен аьеллер, гуманитарлык ярдамды алдылар. Оларга онлаган мынъ продукт йыйынтыклары, дарманлар, СИЗ-лер уьлестирилдилер. «Бизим юртымыз алал эм ашык юрекли аьдемлери мен бай, олар аьр дайым да тувганларына, досларына, конъысыларына, аьле таныс болмаган аьдемлерге ярдам этпеге аьзир болып турадылар. Буьгуьн оьз ыркшылардынъ бир кесеги мен йолыгыстым. Ак юректен разылык соьзлерди айттым эм отызга ювык аьдемди пандемиядынъ авыр шагында республикадынъ яшавшыларына ярдам эткенлери эм демевлегенлери уьшин савгаладым. Аьр биримиздинъ аьрекетлиги мен аьдемлердинъ яшавлары байланыслы болган сол шакта оьз ыркшылар юртымыздынъ яшавшылары уьшин тап тувганларындай болдылар. Сол куьнлерде медицина куллыкшылары ман бирге бизим ямагатшылык организацияларынынъ, оьз ыркшылар козгалысларынынъ катнасувшылары юзлеген аьдемлер уьшин таяныш болдылар. Республикамыздынъ оьз ыркшылар ямагатшылыгы аьр куьн сайын кенъеетаганына эм янъы аьдемлер мен толыстырылатаганына куванаман. Енъил болмаган, яваплы эм айлак маьнели куллыгынъыз уьшин савболынъыз. Бизим куьшимиз бирликте экенин кезуьвли кере коьрип турыман», - деп белгиледи йолыгыстан сонъ КЧР Басшысы Рашид Темрезов оьзининъ Instagram социаллык сетиндеги официаллы бетинде. Айтып озбага тийисли, савгаланган яс аьдемлердинъ ишинде ногай кызымыз Радима Муратовна Карасова да бар эди. - Пандемия шагында мен оьз ыркшылардынъ санында дарманлар уьлестируьв мен каьр шектим. Мен Росздравнадзордынъ федераллык службасында аьрекетлеймен, соны ман биргесине эпшиллик аьрекетлиги мен де каьрлеймен. Ашыклап айтканда, сол алал ис пандемия шагында да, оннан сонъ да бек маьнели, деп билемен. Неге десенъиз арамызда ярдамнан керексинетаган болсалар да, сол зат акында билдирмейтаган аьдемлер айлак коьп. Эм бизим республикамызда аьрекетлейтаган саваплык фондлардынъ демеви мен биз солар акында билмеге амал табамыз, маьселелерди ашыклаймыз, оьткир соравларды бирлесип шешемиз. Пандемия шагында Ногай муниципал районынынъ Эркин-Шахар поселогында орынласкан КЧР аграрлык-технологиялык колледжининъ директоры Азамат Ибрагимович Матакаев пен бирге эсли аьдемлерге, онъайлыклары тоьмен болган аьеллерге ярдам эттик, - деп хабарлады Радима Карасова. Эске салайы к, #М ыВместе О ртакроссиялык акциясынынъ калыбында республикадынъ яшавшыларына ярдам этуьв бойынша КЧР-дынъ Бирлик оьз ыркшылар штабы регионнынъ Басшысы Рашид Темрезовтынъ тапшырувы ман 2020 йылдынъ 18-нши мартында уйгынланды. Бир кесек заманнан сонъ, оьз ыркшылар эм саваплык организациялардынъ баславы ман КЧР Оперативли штабында Исши куьп туьзилди. Республикада оьз ыркшылар эм саваплык козгалыслары мынълаган туьрли аьдемлерди бирлестирди. Штаб аьрекетлеген заманнынъ бойында яшавшылардан 45,5 мынъ аьризе алынды эм олар бойынша куллык юргистилди, керексинетаган аьеллерге 65 мынъ азык йыйынтыклары тегин уьлестирилдилер. Йолыгыстынъ барысында КЧР Оперштабындагы Исши куьптинъ етекшиси Расул Кубановтынъ белгилевинше, исши куьпте белсинли аьрекетлейтаган саваплык эм ямагатшылык организациялары «Во благо» деген ассоциациясына бирлеспеге токтас алдылар. Янъы ассоциация ярдамнан керексинетаган аьдемлерди демевлев бойынша саваплык проектлерди яшавга эндирип баслаган