Асквш 1943 агIан акъарчаква адепортация йалашван, Квта Азии Къазахстани йыргатI, ауаъа
14 сквша йбзазатI. Ауат
рцри шта йангIахъынхIвых
асквш 1957, май а 3 амш
хIреспубликала йхIыртлапIитI. Ауи йадахIвуата
арат амшква адепортация йалашваз атажв-лыгажвква рсуратквала йалаз гIарбара ареспублика къральыгIва псабара
музей-заповедник апны
йакIвшатI.
«Вопреки» зхьзыз апроект згIаджвыквцIараз
Хвби Марика лакIвпI, ауи
асуратхъыхыгIвчва Урусов Ренат, Казаков Артур, Карамурзина Зухра
лыцынхатI. Къарча-Черкес
Республика йаныргIалу
къалати кытти 30 айхIа
рпны йбзазауа адепортация йалашваз ауагIа
сурат 260 рхъырхтI. Асуратква зымгIва йрыдынхалхын, гIарбара адыргалтI. Айззара йалан КЧР
культурала аминистр йзаместитель Текеева Кулистан, КЧР ауагIа руысагIв Мамчуева Дина,
КЧР Ажвлара палата йалу Хасанов Ханафий, абзазагIвчва, апхьагIвчва.
Хасанов Ханафий агIарбара гIахъитIуата акъарчаква рылахь шакIвшаз
гIарылайхIватI, адепортация йалашваз ауагIа гIазабти лдзгIарати йрадзаз,
рпсадгьыл йшгIахъынхIвыхыз даквгIашIастI.
– УахьчIва хIуагIахъа
гIащаквгылхищтара йцIуа
асквш 62 йазынарху агIарбара гIахъхIтIитI. СшвыхIвитI – зынгьи йгIахънымхIвыхквуш швхъшвымраштлын, – лхIватI Текеева Кулистан. – Ари агIарбара зкъару аду апроект
автор Хвби Марика йгьи
асуратхъыхыгIвчва сшвзыразпI.
ЙгIачважваз зымгIва
ари апроект магIныта йаму, йгIадзынгылуа абанпара рпатриот бжьара
йшацхърагIауа гIалыркIгIатI.
– Швабыжта йсгвапапI
сара уахьчIва ари агIарбара сапшырныс ъасылшауа, – йгIалылкIгIатI Мамчуева Дина. – ХIуагIахъа
рпсадгьыл йангIайхыз
амш хIара хIыхъазла магIын ду амапI. Зцри шта
зрыдзуа нцIрата йыму
ладзыла йгитI, ауи йгIалцIла, ари агвыргъьахъв хIуагIахъа рыхъазла рахIа
хвду зму амшква йрылапхьадзапI. Льажьа змамкIва йтыргаз акъарчаква
14 сквша гIазаб рбауа,
рпсадгьыл ахъазла ргвы
рыхьуа Квта Азии Къазахстани йбзазатI. УахьчIва хIадгьылква рпны
хIбзазарныс ахъазла уыс
ду зхаз хIахIбачва квырмыш рзыхIчпитI.
ЙгIадзынгылуа абанпара ртурых рдырра ахъазла нхара щарда акIвдыршитI. Ауи йаквшахIатхитI
Черкесск йаныргIалу йхвбахауа а-Гимназия апхьагIв Катчиева Милана
дгIазпхьаз Узденова ФатIима йылгIвыз ауыса.
Апроект автор Хвби
Марика ауыс шгIаджвыквылцIаз, йшакIвшаз даквгIашIастI.
– ЦIабыргыта йсхIвапIта, агIарбара ари апш
дахIвра ду амазлушта
сгьымгвыгъузтI. Сара ауи
ззысчпуз щарда мцIыхуата йгIацIцIуаш апхьага
ахъазла акIвын, – лхIватI
Хвби Марика. – Заман
тIакIв агIвсхырквын, ужвы
йгIадзынгылуа абанпара
адепортация йалашваз
хIахIбачва йрабадырхырныс лшара гьрымазлахуашым, сара ауат атурых
йгIалахарныс стахъыпI.
АгIарбара зсуратква аланакIыз ауагIаква рыцхIагIарата йырбаз рылаква
йгIауархIвитI. Йсыцынхаз
асуратхъыхыгIвчва швабыжта сырзыразпI, гIапсара рымдыруа сквшщарда цIуата сгвы йтаз ъадырхъйаз ахъазла.
АсуратхъыхыгIв Узденов Ренат йшихIвазла,
анхараква ъадзакIвдыршуз баргвыра щардагьи
йыршIашватI. АзджьакI
апхащара йгIалырхуанта сурат рхъыхIхырныс
гьрымуазтI, арахьарат
йыртахъдзата йадгылуан. УнагIвата йъанашылыз зымгIвагьи йара хьыгIакI йаднакIылтI, йхьантаз агIаншараква йгIарылстI. ХIапхъахьыла апроект рахIагьи тшауацIнадрыхырныс ргвыгъапI.
Асуратква йгIадырбауа атажв-лыгажвква зымгIвагьи йацапшыта йнашхыйапI, ажвакIгьи гьатахъым ауат гIазабта йырбаз уылаухIвара ахъазла. АуыжвгIанчIвиква ахIбачва рылахь шцаз, ауат
йырбзазащаз рдырырныс
рборчпI, азаджв йхьыгIа
зымгIвагьи йыцагIвхIшарквын, рахIа майрата абаргвыраква хIацгIархъысуаштI. ЙнымшахыргIатI
зынгьи ауи апш рыцхIагIакIгьи.
Получайте свежие новости на электронную почту
Комментарии