АЗГІВАДАРИ АПШДЗАРИ АЦЫМГІВАЙСИТІ

ДЖАНКЕЗОВА (Адикина) Анжела Чувашия апны дйытІ. Ауи лаба Валерий Афганистан къвырльыкъв йхата дангІахъынхІвых атгІачва Карелия йцахтІ. Ауаъа йгІарыртыз пещ хвыцкІ тшыгІвнадыршвауамца йынхун, йбзазун. Валерий Илья йпа мачІ-мачІымца йщапІы дгIаквгылуан, йара йапшта Афганистан апны зинтернационал борч зырхъйаз драбадыруан. АчкІвынчва азаджв азаджв йцхърагІун, тшадыркІылуан. Зкърар багъьаз, ахабзаква бзита йыздыруаз Адикин Валерий афганецква р-Совет дапредседательтагьи далырхтІ. Ауи азаман агІан ауи атренажер зал йнапІыцІата дынхун. Анжела йанакІвызлакІгьи лаба рыцІа дйаргванын. Ауи ахІатырла, аспортзал дгьгІагІвнымшвтуазтІ, дашІамсуата атшрычІвайраква лчпун, лхъа дадынхалуан. АпхІвыспа чкІвын хысквша ахІа даныртамыз 500-кІ аъара апол тшахъщтІылхылгІун, бокс, каратэ тшырзылбжьун. Анжела лан лпхІа ачкІвын хвыцква рапшта аспорт дъахънахуаз гьлымгвапхузтІ, амузыка апхьарта длырцауамца аршІыйара дхъналрыхуан. Гврыхвара злаз апхІвыспа дахІврала аршІыйара апхьартагьи дгІалгатІ, йапшым амузыка ъамапсымаква дрысуа, пшдзата ашва лхІвауа тшылбжьатІ, аспортгьи гькІалымрышвтІ. Апхьарта апны ауи лыквлагІвчвагьи арыпхьагІвчвагьи бзи дырбун, бзитагьи дапхьун. Карелия Республика ахьызла йапшым аолимпиадаква дрылалуан, йанакІвызлакІгьи агІатгараква лымата дгІахъынхІвыхуан. Ауи йагъьу астудентква рпхьадзара далата лыхьыз йазалху акнигагьи йанырцІатІ, «За заслуги перед республикой» чвахъабагагьи гІалквнадыргатІ. – Ачувашква хІхІальла КІавкІаз абзазагІвчва хІыршІырпшыпІ. Карелия апны датша уагІахъакІ йрыуу данрылалра дукІ бзи йгьырбум. Ауи йгІалцІла, сбзазарныс датша зджьара сцахра стахъын. Сара йанакІвызлакІгьи суагІахъа фаша, ацІасква бзи йызбун. Патриотра сылата сызбжьаз сани саби швабыжта сырзыразпІ. УахьчІвала ауати сари гІвагвана хІызбжьазтынгьи, мшигІадза хІабабарныс хІылымшузтынгьи, телефонла хІайчважвалитІ, – лхІвитІ лара. Анжела хъата щардала зылшараква хІаракІу агІвычІвгІвысква дрыуапІ. Ага ауаса йаъазтынгьи, акаратэ рыцІа хъгалра амапІ, аспорт дамастерпІ. Юрист ъачІвагІа йхънахуаз апхІвыспа Петербург университетгьи дыцІалтІ. Ауи спортла лгІатгараква, лдырраква рцІолара гвы азтыз арыпхьагІвчва дшапхьауамца дынхарнысла йгІалылабжьатІ. Йапхъахуз акурс амщтахь Санкт-Петербург апрокурор йзаместитель дицхърагІагІвта далагатІ. Ауи Интернетла Къарча-Черкес Республика йауаз Джанкезов Эдуард дйабадыртІ. Ауат унагІвара йалалын, йбзазарныс КІавкІаз йгІайхтІ. Цысквша цІитІ Анжела ахІвсса рпшдзари рызгІвадари дахъпшылуа дынхауищтара. Ауи йгІанлыршаз афитнес-клуб уагІа зынгьи йгьагхум. Зныбыжьла йапшым апхІвысква рхъа йахьпшырныс йлызгІайлитІ, ларгьи лкъаругьи лдыррагьи гьрагъьалщум. – Сылшараква зымгІва гІасрысабапитІта аклуб йгІайуа рызгІвадара йахъазымкІва рнашх шщтІысхуашгьи сазхъвыцитІ. АзджьакІ рнашх хъващыта, закІгьи ргвы азгІамиуата йсызгІашылитІта, сахІаткІи бжакІи руацІала йдатшахитІта йджвылцІхитІ, саргьи ауи сайгвыргъьитІ. Жвах сквша йырту рпны йгІашІарышвта сквш 87 йыртудза рызгІвадара агъьырчІвырныс йсызгІайитІ, – йгІалылкІгІитІ Анжела. ЙанакІвызлакІгьи ауагІа йрызгвапу, злакта лашару, згвы хътІу ари апхІвыс шІа йгІалхъыцІуа апхара зны йлачважваз анцІрала ргвы дгІатахитІ. АзгІвадари апшдзари шацымгІвайсуа ларгьи тамамта йылдыритІ, дыздынхалуа зымгІвагьи йхъадлырцІитІ.