АЗГIВАДАРАХЧАРА ДАГIВЫЧIВГIВЫСЫН

«АчымазагІв йыхъазла Анчва йымщтахь йгІвыджьхауата йырпхьадзауа айъазагІв бзи йакІвпІ» – рхІвалитІ щардала. ЗынцІра шабгаз айъазагІвта йынхаз АЙСАН МухІамад ХІамзат йпа чмазагІвыта азгІва йгІашІигаз, зынцІра йрауыз зъарагIву гьузыпхьадзушым. Ауи айъазагІв бергьльы Ставрополь медицина институт дгІалгата асквш 1977 агІан йапхъахауата йынхара ъаджвыквицІаз Къарча-Черкес область (ужвы ареспублика) чымазагІвтара йымпсахуата адуней йхІваджьындзыкІьа хІышта азгІвадарахчара уысква ртшауацІыхра йкъаругьи йъачІвагІадыррагьи алайцІатІ, йызлахІаз аквынцІи ащацага згІвакви райъазара цІолата йыздыруа йгьи йгІаздахІвуа неврологта йыхьыз йыргатІ. АджьахІви абгъарбыгІв аквынцІ апны пункция зланарахвуа агвыри рахІа рымамкІва йанынхуз угІалагата амедицина атехнология шІыцква ангІалал хІзамандза гвхътІыла ауагІа рызгІвадара ахчара дазабакІтІ. МухІамад ХІамзат йпа йшихІвахуазла, ъачІвагІата йгІалихызла швапхата йзалыз йащахІба ДжьагІафар йакІвпІ. Ауи айъазагІвта дынхун, йдырраква дууын, ауагІа бзи дырбун. Йаргьи ауи дйапшхара йтахъыта аобласть уагІахъа апхьарта-интернат дшгІалгуз, йабагьи йангьи йрымдыруата Ставрополь медицина институт дыцІалтІ. Арыла йауата йыцыз ачкІвынчвагьи йаргьи бзита йапхьатІ. ЙангІалга, нхара хІышта йгІарщтихтІ. Ауи азаман агІан хІмедицина апны зылшара дуу анхагаква ъанамхъуз йгІалцІла абаргвыраква шщардазгьи Айсан МухІамад йынхара апны йдырраквала йхъагвы аквыта акІвпІ йынхара шджвыквицІаз йгьи ауат зынгьи йыгьгІаймайжьатІ. Абар ауи йайъазара уысква шакІвшузла гІаншаракІ шихІвахуаз: «Трыкв дауата чкІвынкІ хІпны даъата сйайъазун. Ауи дибарныс йызгІайлуз йынбжьагІвгьи дшчмазагІву гІасайхІвтІ. «Турция апны цысквша йсайъазитІта йсыхьуа таразта йгьырзыщаквыргылуам», – дгІасыдашшылтІ ауи. АцІабырг схІвапІта, йыхьуаз азгІва апш схъатала зынгьи сгьанымйасызтІ, ауаса аинститут хІыздрыпхьазла йшаъу здыруан. АзгІва йамагІну йасхІвызтІхІва, зныкІ ахъазла йыгьсызхъайымцІатІ. СквшбжакІ анахъыцІ йшыздырхызла, ауи Германия апны йара ауи йасхІвыз азгІва йзыщаквдыргылтІ. Ауи швабыж йджьайщатІ, Трыкв йту хІъахІыльчва гІайаутІ, ауаъа сызшІыртырныс дрыхІватІ. Ауат саквдыргвышхван сцатІ. Ажва гьалам, Турция амедицина анадзара хІагІа швабыжта шсхънахыз. Съанхуз ачымазагІвтара зладгалаз анхагаква зымгІва Германия йгІацІырщтуа рахІа йхІаракІу йрыуапІ, агвы апны угІалагата агІвычІвгІвыс йуацІа йту зымгІва «пересадка» рчпитІ. Амедицина адгалща сайхІвапсауа сгІайхтІ». МухІамад ХІамзат йпа ауаъа угІалагата унашва зхъицІуз аквынцІи ащацага згІвакви йъарайъазауа аневрология хъвшара ауыжвгІанчІви нхагаква гІарадзарала амальта йаъу шнайахвуаш айрышта йхъа йтайкІытІ. Йаргьи ахъвшара унашва ъадзахъицІаз асквш 21 руацІа ауаъа анаукатехника гІатгараква гІадрысабапуата ауыжвгІанчІви диагностика амальква абзазара йаларжьырныс, йпсуа ачымазагІвква рпхьадзара йалырдзгІара йащтата айъазара уысква рагъьчІвра йащату ръачІвагІадырра шщтІырхуаш цІолата йадынхалуа йцарныс рылшатІ, медицина цхърагІара ласы драдзарала атшыбжьараква зынгьи йгьашІадымрыстІ. АйъазагІв гвымчІва йара йхъагьи дашІамсуа дадынхалуан, неврология, иглотерапия, трансурология дрызъазан. Асквш 1994 агІан ауи Бехтерев Владимир йыхьыз зхъу Санкт-Петербург наукархъыхырта институт медицина нархарала ашІыцраква рырхъвыхыгІвчва дрыларцІатІ. Айсан МухІамад асквш 1997 – кандидат диссертация, асквш 2003 агІан доктор диссертация йхчатІ. Ауи наука нхарата йгІацІищтыз рпхьадзара 40 йнаднацалитІ, ауат хІкъральла йбергьльу амедицина журналквагьи йгІарыншвалтІ. Сквш 50 анихъыцІуаз йадахІвуата «Къарча-Черкес Республикала гІатгара зму айъазагІв» ЧІахІра хьзы гІайквнадыргатІ. Йара ауи асквш «АзгІвадарахчара йагъьу агІвычІвгІвыс» чвахъабага медальла а-Дуней академия жвлара дгІалыркІгІатІ. Ауи йахъазымкІва «Россия Федерацияла азгІвадара-хчара а-Отличник» хьзы данкъвгагІвын, йхІаракІу категория зму дайъазагІвын. ХІхаквлагІв айъазагІв бзи хІкъраль амедицина жвлара руацІа хвду йыквырцІун, йшвапха тшахадыргІвазун. Ауи россия йгьи адуней форум дуква дрылазлун, Москва йакІвшалауа аконгрессква, асеминарква ддымрайгвауа йгьымцузтІ, йаргьи йапшым акафедраква йгІартыцІуаз аъачІвагІагІвчва гІайрайгвалун. Ауат зымгІва ззичпуз йгІарайгвгъьауа ауагІа чымазагІвква рызгІваква йрылырдзгІарала ужвыгьи амаль шІыцта кІара аъадзазтын гІайрыбергьльырныс, йгІайрысабапарныс ахъазла акІвын. АйъазагІв йъачІвагІа йамагІну гІазгвынгІвуаш ауи йаланхауа йакІвпІ, ауи тшынлагьи уахъынлагьи йгьапышвтуам. Айсан МухІамадгьи ансищымта ареанимация хъвшара йщтІу рыцІа йхІатлу ачымазагІвква дгІархъыкІвшун. Дасу йаъаща йалыргата йдыруата йынхара мшы джвыквицІун. Ауи агIвычIвгIвыс гвымчIва нхаралагьи бзазаралагьи йшвапхаз, йцІабыргыз, гвчІагІвра злаз, дгІазлыцІыз аткъвым, хІуагІахъа зрыпшдзуз дхъацІа нардзан. Ауи йтгІачва ргвы йалахІауа йызцІабзазуш тыдз пшдза йуыхватІ, дъагІатадрийыз, дъагІадзынгылыз АлбыргІан кыт апны цІлата 100 ъалу йхакв асабшакви амтшашакви дцарныс швабыжта бзи йбун. АйъазагІв ацІлауатрагьи дадынхалта ачымазагІвква данрызгІайхра, апсабара йгІайыланацІаз агвщтІыхра къару абгала ауат йырзынайырхахуан. Ажва аламкІва, йхъа рыладууын йхъапщыла Юти йари йгІадзындыргылыз ргІариква. БежанргІа йыртацу йпхІа Диана уахьчІвала хІреспубликала рахІа йагъьу неврологта дырпхьадзитІ, йпа Мурат дюрист ъазахан, мамыр судьята дынхитІ. ХІшІыпІала йахъазымкІва Россия ауацІала зыхьыз пшдзарала йдзырхІваз Айсан МухІамад ХІамзат йпа июнь а 1 сквш 66 йхъыцІуашын. АгІвычІвгІвыс йыхъазла ауи аныбыжь нцІра бжакІ ахІа йыгьнадзум. Айсан МухІамад ауат руацІа йылшаз щардадзапІ. Ауаса ауи дхІылахмищтара гІвымызкІ йацта йцІитІ. Анчва нцІрахъвыта йзалихыз ахъазыкІ йыгьйымрыдзтІ, пІатІу йыквта, ажвлара дрысабапта, ауагІа рызгІвадара дакъалагІвырта атурых абгъьыцква дгІарылахатІ