«АЗГIВА ЛАСЫ ЙГIАРЫБЕРГЬЫЛЬРА МАГIЫН ДУ АМАПI»

СПИД ашIашIкIгIара йапхъахауата асквш 1981 агIан США апны азгIваква йъархъпшылуа а-Квта анхагIвчва гIаквчважватI, ауи гIазлыцIуа авирус асквш 1980 агIан йгIахъыртIытI. Ауаъа йгIашIарышвта адунейла ВИЧашIашIкIгIара гIазахвыз мильуан 77-гIв ашвъа йанырцIатI, мильуан 37-гIв раъара агахьатI. ХIкъральла мшигIадза ари азгIва квтанайта гIвышвыгIвкI йгIарахвитI. ВИЧ-ашIашIкIгIара йапшIагылуата згIвадарахчарала Россия Федерация а-Министерства уыс щарда архъйитI. Ауат йрыуапI асквш 2020 июнь йгIашIарышвта хIкъральла йакIвшауа «Тест на ВИЧ: Экспедиция 2020» акциягьи. ЗгIвадарахчарала Россия Федерация а-Министерства агIаджвыквцIара Горький автомобиль завод йгьи «Рекитт бенкизер хэлскэр» йацыркIтI, акция цымызкI руацIа хIкъраль городти кытти 216 рпны йакIвшуштI. АбзазагIвчва ВИЧ-ашIашIкIгIара йазынарху архъвыхраква йырхъысырныс йаквгIазшIытра акIвпI ауи хачIвыта йаму. ХIреспублика апны цымшкI руацIа Учкекен, Зеленчук, Къарча, Устьджьгваты, Черкесск рбзазагIвчва йгьи хIреспублика асасчва йайтыпауа апунктква рпны хвыдъа, рыхьызква цIакIыта ВИЧ архъвыхраква йырхъысырныс рылшатI. ЗымгIва шалу хIшIыпIала 242-джь рызгIвадара дырхъвыхтI. Октябрь а 1 «Тест на ВИЧ: Экспедиция 2020» акция КЧР апны йшакIвшаз йъаквчважваз айззара Черкесск йаныргIалу амедицина колледж апны йакIвшатI. Ауи йалан «Роспотребнадзор» КЧР-ла а-Унашвачпарта аэксперт хъада ПОКРОВСКАЯ Елена Иван йпхIа, ашIашIкIгIара чымазагIвтара йгьи СПИД абакIрала а-Квта айъазагIв хъада ДЫСЕНКО Ирина Николай йпхIа, «Центр медицинской профилактики» айъазагIв хъада БАЙЧОРОВ Энвер Музафир йпа, «згIвадарахчарала КЧР а-Министерства ахъвшара» аунашвачпагIв БАТЧАЕВА Белла Азрет йпхIа, Къарча-Черкес медицина колледж аунашвачпагIв ЭРТУЕВ Рашид ТаусултIан йпа. Покровская Елена «Тест на ВИЧ: Экспедиция 2020» акция адгалагIвчвагьи ауи йалалыз хIхаквлагIвчвагьи аразыра ажваква рзыналырхатI. – Ари акция магIын ду амапI, сквшигIадза йадыргаллушта хIгвыгъитI. Ауи акIвзыршауа, цымызкI руацIа зтгIачваква зымбауа мгIва йыкву аъачIвагIагIвчва ажвлара рыхъазла уыс ду дырхъйитI. ЙцIыхъвахауа асквшква йапшым ашIашIкIгIара згIваква щардахитI. ВИЧашIашIкIгIара агIвычIвгIвыс йызгIвадара лдзгIара ду азрадзауа азгIваква йрылапхьадзапI. Ауи ахIатырла заманкI агIвспхьадза дзачIвызлакIгьи йызгIвадара йырхъвыхра атахъыпI, – йгIалылкIгIатI ауи. Дысенко Ирина йшылхIвазла, ВИЧ-ашIашIкIгIара згIва уахьчIвала йырхъаштылхыз, щардала йызшIамшвауа азгIваква йрылаупхьадза гьауашым. – АзгIва, ага алаща баргвызтынгьи, агIвычIвгIвыс йыламшскIва йгIаурыбергьльырквын, йузырбзихауа йрыуапI. ХIреспубликала СПИД гIарыбергьыльра йгьи агIашIакIра йырзынарху нхара щарда акIвшитI. Ари акциягьи азгIва ласы йгIарыбергьыльра йазынархапI, – йылрыбагъьатI ауи. «Тест на ВИЧ: Экспедиция 2020» акция йалалыз атерапевтква, апедиатрква, аэпидемиологква, датшагьи айъазагIвчва йапшым асеминарква адыргалтI, йзынйаз разцIгIараква джьауап рырттI. Батчаева Белла йшгIалылкIгIазла, ари асквш коронавирус ашIашIкIгIара апшIагылра йазынархата йакIвшауа анхараква ВИЧ-ашIашIкIгIара йазынарху рыцIа йгIадырльальатI. – ЗаманкI цапхьадза йапшым ашIашIгIара згIваква гIаншитI, ауат зымгIва хIшырпшIагылуаш, амедицина нхагIвчва рызгIвадара шырхчуш, уыста йакIвдыршуш йахагIвазарныс рылзыршуш ауысква радгалра магIын ду амапI. Арат амшква хIреспублика абзазагIвчва рызгIвадара дырхъвыхырныс рылшатI. ДзачIвызлакIгьи рхъа шырхчуш, архъвыхраква йшырхъыслуш йаквгIазшIыститI, – лхIватI ауи. ЗызгIвадара зырхъвыхырныс зтахъыз зымгIва апахь йаныргIалыз апункт апны йадгылтI. ХIреспублика амщтахь айъазагIвчва Ингвыщ Республика йцуштI.