«АЗАМАН ЙГIАЛНАХЫЗ ХIРЫУАПI»

«АгIвычIвгIвыс ймагIну удырра утахъызтын джькIа путкI йыцуфра атахъыпI» рхIвитI. Ауаса йгIаншитI йапхъахауата уызшIашвауа йквпшыра анубара, йылаква уаныртапшра, агвы йгIатыцIуа йажваква уанрыздзыргIвра джькIа путкI йыцуымфуатагьи кърар, гIвычIвгIвысагIара, гвчIагIвра, хъацIара шйылу уылаухIвитI. Ауи апш дгIвычIвгIвыспI зынхара-бзазара швахасыргIвазара стахъу Подкумок кыт абзазагIв ЧКВА Мусса ГIальы йпа. ЦIыпх, июнь а 23 атшын Красна Восток йтыцIын тшчва гвыпкI абаза тгIачвата 50 раъара ъабзазауа, Предгорна район йаланакIуа Подкумок кыт йшцуз хабар гIасдырдыртI. Атшква атоба хIагIартала йшгIабгъалуаз сурат, видео ахъыхра шхIтахъыз хIызрайгваз, ауи акыт ажвлара адкIылара знапIыцIу Шармат Рафик йанйасхIв, машинакI хIазйырцатI. – Йара ужвжвы атоба ащапIы швнасырдзапI, – йхIватI аруль знапIыцIаз йажваква багъьара рылата. Аруль знапIыцIаз ауат амгIваква йрыщцахьаз, швара зымдыруаз, хъацIара злаз заджвы йакIвта гIацIцIуашын. – Сара саба ГIальы Красна Восток кыт дгIадритI, Огвыз Бубакьыр йыхьыз нкъвызгауа аурам дгIадзынгылтI. Ар къвырльыкъв йхата дангIахъынхIвых, асквш 1954 агIан йпхыцIа Подкумок кыт дгIанагтI, унагIвара йчпатI, тдзы йуыхватI, хвгIвысабичва хIгIадзынйыргылтI. Араъа зымгIва йрапхъата, абазата йгIатанагаз саба йакIвпI, ужвы, АлахI йбзирала, абаза унагIвата 50 раъара хIнадзахьатI, – йхIватI ауи. Сара Чква Мусса Афганистан йинтернационал борч шйырхъйаз гIасазхIвызгьи Шармат Рафик йакIвпI. Ауи атшын хIайчважварныс заман дукI гьхIмаутI, сатайшIашвахырныс сгвы гвжважвун. ЦIыпх, декабрь а 26 Подкумок санатацах Мусса сйачважварныс сылшатI. – Сара асквш 1966, февраль а 1 Подкумок кыт сйытI, атгIачва 5-гIвы хIнадзитI. АхIбачва Тимур, Эмма, Ира срыщтагIайитI, Анжела дхIайцIбадзапI. ХIаба ГIальы йыуахъгьи йытшынгьи анхара дачIвын, хIан Царицагьи асабиква йхIтахъу налырхъун. Сара асквш 1983 агIан аквтанай апхьарта сгIалгатI. Сапхьаща гьгвымхамызтI, ауаса йхIаракIу дырра гIацIгартакIгьи сгьымцатI. Акыт амлыкврхIарта сшынхузымцара Ессентуки йтагылаз автошкола шофер ъачIвагIа гIацIызгатI. ГIвба-хпа мзы рахIа снымхауата ар къвырльыкъвхара сызшIырттI. Грозна атшыбжьара квта пщымызкI саъан, «Рота афганцев»- хIва йызпхьуз срылан. Ауаъа сыршIашватI црита йсзалыз, Псыжв йауаз Агырба Мурат йгьи Къараль Мурат, КочубеевскI йбзазуз анагIвай Сулеменов Арсен йгьи къарча чкIвынкI. ХIара унагIвакI йацгIадзынгылыз рапшта хIазаргванхатI. АцIабырг схIвапIта, агвып йрылаз ачкIвынчва «Афган швъацауа шварагIварапI, агвла къраль рмамыр бзазара ахчара швазгылуаштI, адушманква швырпшIагылуаштI, швсакъхара йахъазымкIва, швкърар швамайжьауата швборч швырхъйара, швабгашвызгIвадата швцриква шврызцахра атахъыпI»-хIва архъв акомандир йангIахIайхIв, заджвгьи хIылахь гьаквхIымцIатI. «ХIабачва, хIабадучва хI-Абашта ахчара йазгылата рхъаква щтIарцIатI, хIаргьи ауи апш азхъацIара анхIзырчпазара хъацIара гIахIырбара хIборчпI»-хIва йхIпыру хIазыхIазырта хIгылан, – йгIайгвалашвахитI Мусса. – Грозна атшыбжьараква хIанырхъыс амщтахьла квра хIкIытI, амашинаква хIрыквдырчIван, айхамгIва станция хIыргатI. Ауаъа Ташкент йцуз апоезд хIаквдырчIватI. УацIыхъван самолетла Кабул хIпссгIатI. Сара Баграм шIыпIа саквшватI, йазалхыз адесант батальон срылашватI. Архъв гвып-гвып хIагIвшата фачIвы, хыхъвшв агьиква гIазгуаз амашинаква хIырхъпшылуан, абыхъвква рпны тшыкъазчIвахуаз адушманква хIырпшIагылан, Баграм агьагьара хIхчун. ХIайсыгIвчва швабыжта йрылдзгIун, уахьчIва джькIахбаста зцуфуа уыгIвза уачIвы йпсхъа уашIашвун. ХIара адушманква рхычвгьа хIгьачвымшвузтI, ауаса хвырта чвгьа зауаз, йщхуз хIынбжьагIвчва гвыхьра ду гIахIыларцIун. ХIбатальон лдзгIарала йгIвбахауа агыларта аман. Ауаса Афганистан абзазагIвчва рхвитнагIа хIкъаругьи хIпсгьи хIырмайгьдзауата хIазабакIтI. СгIвылакI дгьрыцIцIуам хIвзвод йакомандирыз, алейтенант Фастов Анатолий. Ауи швара гьйымдыруазтI, хIапхъа дгылата айбащраква дпшцIалуан. Операция чвгьакI апны хIатлата дгIархвытI, дпсуашма-дгIанхушмахIва хIихъгвыргIвауа дгIапшцIыгIгатI. АлахI йбзирала йпсы гIащаквхатI. Ужвы Вин-сады дбзазитI, ауаса ныкъвадыкъвата дгIанхатI. Афганистан апны мшигIадза адушманква рхы гIахIызкIылпшуан. Уахъынла ачва санамгауа ауат агIаншара нашхыйаква, йсчвыдзыз сынбжьагIвчва сгIвылакI йыгьрыцIцIуам. Афганистан йызбаз сара мшигIадза сайгвыргъьауа, абзазара хвы азызбауа сазнабжьатI. Чква Мусса Афганистан йкъвырльыкъвхара борч йырхъйауата йгIайырбаз ахъацIара ахъазла «За Отвагу», «Воину-интернационалисту от благодарного афганского народа» медальква, «АйсыгIв-интернационалист» гвплацIа, йапшым артшхъвагаква гIайквнадыргатI, аюбилей медальквагьи йщардапI. Асквш 1986 июль амамыр бзазара йазгIайхыз ачкIвын унагIвара далалтI. Йхъапщыла Гульнари йари пщгIвысабичва гIадзындыргылитI. АхIба Замира Ессентуки педколледж йапхъахауа акурс дыцIапI, Аида Кисловодск й-16-хауа апхьарта й-9-хауа акласс дцитI, Темирлан йазалху ахъатачIв апхьарта й-2-хауа акласс дапхьитI, айцIбадза Амирагьи асабигIзарта дцитI. Йара Мусса афарфор пкъыгIваква ъагIацIырщтуа цех нйырхитI. Мусса йгьи ауи йапшта Афганистан апны зинтернационал борч зырхъйаз зымгIва ймамыру жвгIванд цкьа щардала йырхъадзгылазтI, рчкIвынхъа йгIадсылыз ахьшвашвара рпхызква йрылцIыргIатI.