УахьчIва мамырта йбзазауа, айсра ззырхIвауа зымдыруа абанпараква Абашта айсра Ду йазынарху хабарта зъара гIахIархIвлакIгьи, ауи йалаз гIазабта йырчакьыз абгата йхIылахIхIвар
ныс гьхIылшушым. Кытипхьадза апшта, Красна Восток ахъачва айсра йпшцIалтI, 600-гIв райхIа нардастI. Ауат ръарагIвшара гьгIахънымхIвыхтI... Акыт апны унагIвакIгьи гьаъамзапI айсра арыцхIагIа гIаздымсылыз. ЙаъапI тгIачвакI йауата 3–4гIвы ъаладзыз: АйсанргIа – пщгIвы, АрргIа, ГвагвыргIа, ЛачвышргIа, ХъакъвпщргIа, ЭгьзакьргIа – хгIвыхыгIв гьгIахънымхIвыхтI. ТгIачва 25 йрыуата гIвыджь-гIвыджь аладзтI. Заджвы-заджв гIазтынхаз, унагIвара йаламылскIва айсра йаладзыз зъарагIвуда? МшкIы стелефон гIахIвачватI. «Сара ХвытI Щаща сакIвпI. Инфаркт схъыстI, счмазагIвыпI. Йауашызтын спсы ъадзату усызгIай. Щарда мцIуата йгIасаухыз, айсра йаладзыз саба ПIатIа йбагIвчи асальамшвъакви усырбуштI, ауат йырпщылу ахабарквагьи уасхIвуаштI», – лхIватI ауи. Сара сквшщарда цIуата йыздыруаз ХвытI Щаща слызцарныс дсыргвыгъатI йгьи сажва самайжьауата слынйатI. Ауи апещ снашылта сангIалба псайспадза дгIахъчIвалын, лхъчы йыцIаз лаба йбагIвча йгьи йгIважьхаз «ахырца» сальамшвъаква сызгIалраутI. – ЙшгIасархIвхызла, саба айсра данызшIыртуаз сара мызкIы акIвын йысхъыцIуаз, – лхIвитI Щаща лчварта йачвыхъарамкIва абльын йкIыду лаба йсурат дапшуата. – ДангварцIуашыз ХIвмаран йбзазауа йахща Джьгватан ФатинкIа йгIалызшIитын, араса йлайхIватI: «ФатинкIа съацауа айсрапI, спхыцIа шцуш АлахI йакIвпI йыздыруа». УадыргIвана агара сшылаз сгIащтIипгIан, ба гIасайхIвын, атдзы дджвылцIтI. Ауи йажваква йгIарныцIуаз гвынгIвырапI. Зтшын айсра днардасуаз йыцын йкытлагIвчва Джьмакъвыл Мусаби, ЭгьзакьргIа Зальымхан, КIамащ датшагьи. ЙГIВАЖЬХАЗ АСАЛЬАМШВЪАКВА Айсра йгIатыцIуаз ПIатIа йсальамшвъаква гьашIамсуазтI, ауи атгIачва йыргвырбзиган. Ауаса асквш 1942 агIан «Щтадъа дыдзтI» зныз ашвъа гIарадзатI. АтгIачва рунагIва йгIашылыз ачIвыуапхьа йарыгвмачIтI, ауаса «ГIващагIаракI ншазтын»-хIва йгвыгъун. Ауи амщтахь, асквш 1943, август а 8 йцIыхъвахауа йгIайгIвыз асальамшвъа атгIачва йангIарадза ргвыгъара йалахIатI. Хырцата йауацIаз асальамшвъа ахъахь араса йангIвылан: «Орджоникидзевский край, Карачаевская область, Малокарачаевский район, аул Красный Восток Джемакулову Мухамеду». Асальамшвъа ъагIатыцIызгьи анын: «Урал, Молотовская область, Губаховский район, ст. Баская, барак №3, 2-я секция, Джемакулов Пата Мухарбекович». Йшаъазла, ПIатIа йапшыз айсыгIвчва айхамгIва станциякI апны пщгIвыпщыгIв йнадзауата йчIапщун. Ауаъа йгIаргванхаз анамыцаква дырпшIагылата чвгьата дхвхатI. Агоспиталь дщтIата йхабар загIаз йкытлагIвчва Мартаза Джьамырза йгьи Быджь Муса йызцатI. Ауи азаман ауат ауаъа акIоп ржуан, йхабар гIазгхызгьи ауат ракIвпI. Ауи амщтахь ПIатIа Пермь агоспитальгьи хIатлата дхвыта датацIашвахтI. Ауаъа Пятигорск йауаз Зазулин
Иван дипшIашватI. ПIатIа йдыруан ахвырта дшгIацымхушыз, Иван дйыхIватI: «Санпсра мсылман хабзала сыцIацIа». Йшичпушызгьи гIайайхIвтI. ПIатIа адуней анихIваджь йынбжьагIвхаз аурышв айсыгIв
ауи йуасйат йырхъйатI, йшгIайайхIвыз апшта дагвынйыргIвын, адгьыл дайтхтI. Ауи йшинельгьи, йхъылпагьи, йбагIвчагьи, асальамшвъаквагьи атгIачва йрызгIайгхтI. Йаргьи акыт дгIатахан, йхъарамкIва йбзазуз ХвытI Румин йтыдзква рпны пещкI йзалырхын, йхъапщылагьи, йпхIа Зинагьи гIвнан. Сквшщарда руацIа аколхоз, асовхоз дынхатI, уацIыхъван йцриква ъаныз Пятигорск дцахтI.
АйсыгIв йсальамшвъаква йпхIа Щаща йгIалнапIыцIашвахын, дрызсакъуа йынкъвылгитI. ПIатIа йсальамшвъаква зымгIвагьи урышвла йгIвыпI, йгIвыща пшдзапI, дырра шйымаз гIадырбитI. Сквшщарда зхъыцIыз асальамшвъаква чвадахатI, ауаса угIапхьарныс уылшуштI. Абар асквш 1943, август а 8 атгIачва йгIарадзаз йцIыхъвахауа асальамшвъа йану: «Уымш бзита, МухIамад (йаща йпа). Июль а 16 йгIаущтийыз асальамшвъа гIасадзатI. Сцри кыт, скытлагIвчва, атгIачва сгIазлыцIыз, сгвы знымчвгIаз спхIачкIвын рхабар саурайгвыргъьатI. Сара суыс гьбаргвым, ауаса сакъра, джьауапкIра ду апщылапI. ЙгIаргванхаз анамыцаква хIпсы хIамайгьдзауата хIырпшIагылуаштI. Ауат рквнага йанхIцIапIта снахъынхIвыхпI, хIабабахпI. Бзила, зымгIвагьи сальам ду. Зынгьи швызхъмаштылуа Джьмакъвыл ПIатIа». АТУРЫХ ХIХЧАРА ХIБОРЧПI Айсра мыжда... ЗъарагIвуда ауи чвзабата, йыбата йгIаннажьыз? Щаща йшылхIвауала, лаба айсра дшаладзызла сальамшвъа ангIарадза амщтахьла лан лабаргIа дцахтI. – Сара съагIадзынгылыз саба йышта акIвпI, – лхIвитI Щаща. – АхIбачва йшырхIвахуазла, саба йаща Музакьыр швабыжта дгвыбзыгъан. Ареволюция апхъала Россия гимназиякI апны дапхьатI, уацIыхъван Лагъь Осетия апны гIарып бызшва ййырдыртI. Музакьыр быжьбызшвакIла дчважвун, дзабадыруаз щардагIвын. Агимназия апны хIисап ййырдыртI. Ауи бзи йызйырбаз йпа МухIамадгьи хIисап ъачIвагIата йгIалихтI, йкытлагIвчва рсабиква сквшщарда йайрыпхьатI. Щаща йшылхIвауала, дзыгIзахыз ланду Зурумхан лакIвпI, йанакIвызлакIгьи атгIачва райгвыгIврала дкIвыршан, йлызсакъуан. – Апхьарта санцуз тетрадь къытын, саба йаща йпа МухIамад йазикIкIуаз ашвъабыгъьква тетрадь
та йчпунта «Абар бызквгIвуаш»хIва йгIаситуан. Ауи бзидздза сибун, зымгIвалагьи дгIасцхърагIун, йсызхъайымцIауата дсхъпшылуан. Щаща йбыжьбахауа акласс данцуз акIвпI лан данылдыр. – Сара съадзачкIвыныз аныта саба йахща Нину, абатагьи саба йаща йпа МухIамад ракIвын йыздыруаз, – лхIвитI Щаща лчкIвынхъа гIалгвалашвахуата. – Йбыжьбахауа акласс сцауата акIвпI сан даныздыр. Зны Кисловодск ачымазагIвтара сыцIашватI. СъащтIаз йаргванта датша палатакI апны скыт йауаз апхIвыс Тауыж Ажвгъанигьи дщтIан. Сара ауи дукI дсымдырызтIхIва, лара дгIашылуанта дгIасызцIгIун, схьыгIа схъылраштылуан. Зны пхIвыскI сумкIакI азна рызкъы тата дсзынашылтI. Ауи сара дсанта йыгьсымдыруазтI, данызба сгвыргъьатI. ДгIасрайгван дангIачIва «Абазар сгIайын, сбызгIашылтI», – лхIватI лсумкIа аквтIу, акIанифат агьиква гIатылхуата. УадыргIвана дчIвыуа далагатI. ЙгIаншаз гIасгвнымгIвуата «АчIвыйа бызчIвыуа?»-хIва слызцIгIатI. Зыладзква ззымкIуаз апхIвыс тшгIасыкIвлыршан, дшсаныз гIасалхIвтI. Ашыра-блыра йалаз ауаъа зынла сща хъалтI, айъазагIвчва гIадзан, сан йгIалайсуа йалагатI. УацIыхъван ауи йшылхIвахызла, ачымазагIвтара дансызнай апхъапхъа Тауыж Ажвгъани дылзынашылтI. Ауыгьи «УахьчIва апш
мшы тшылбмырдырырквын, уацIыхъван йкIьасахапI, байгIваджьхпI» лхIван, длыргвышхватI. Йшаъазла, сара схвыцта санду лъахIыльчва рпны санлырцарыз «Бца Гвагва, атацаргIагьи бгваралта бара йбапшу асабиква брыцхъвмар»-хIва сан дъанашылхыз аунагIва сылщтиуан. Саргьи спсы закIы адыруата гIацIцIуашын, санцуш амш сазпшуан, санцарагьи сан шлакIву сымдыруата лхъагIара, лпшкара зынла йсыласхIвун, сайщчви сахщчви рбара сашIпссгIун. сшгваралуа сылгвыцIалхIвхIвун, лнапI пшкаквала схъапахь гIалщщуан, дгIасайгвыргъьун, йлымаз арызкъы сылрыфуан, саргьи сызхъара схъвмаруанта сгIагварцIхуан. Ауаса ацIабырг ласы йыгьсымдыртI. Щаща асквшква 1957–1958-ква рагIан акыт апхьарта жвакласскI дгIарылгатI, унагIва днашылтI. Зылахь данылыз ХвытI Назири лари жвагIвысабичва адуней йгIаквырцIатI. Лхъапщыла паса длыгхазтынгьи, Щаща ауат алрыпхьатI, рбзазара щаквлыргылтI. «Матьгероиня» орден гIазквнадыргаз Щаща асабиква мачIкI йандуха йадылкIылыз апхIвыс гвып друнашвачпагIвта «Красновосточна» совхоз апны кIартIоф лырхарджьтI. ЛдахIвраква рыхъазла «Ветеран труда» медаль, йапшым ачIахIра швъаква, асогIаква гIалквнадыргатI. АйсыгIв йпхIа хIмамыр бзазара ахъазла зхъа щтIазцIаз лаба йыхв налмыркъвуа, дызлу ауагIа лрыпшдзауа, йгIалыцIагылуа асабиква уасаражв гвыбзыгъата дырзалуа, дгIабзазатI. Айсра йпшцIалыз щардагIвы рцIыхъвала йгIанхаз асабиква ргвы рнымчвгIауата фырта рхъаква щтIарцIатI. УахьчIва адуней йыкву, йгIадзынгылуа асабиква ауат ртурых рзыхIхчапI. ХIуагIа рыцхIагIа ду рызгIазгыз айсракIгьи нымшахыргIатI, ймамырызтI хIсабиква рдуней.
Комментарии