АЙСЫГIВ ЙБОРЧ ЙЫРХЪЙАТI

ХВЫТI Валерий Зальымхан йпа асквш 1961, июнь а 3 Къвайдан кыт дйытI. Апхьарта амщтахь Черкесск автомобиль-мгIва техникум дгIалгатI. Къвырльыкъвхара дцарныс азаман ангIадза йынбжьагIвчва дрыцта айсра комиссариат дадгылтI. Асквш 1980, май а 4 къвырльыкъвхара днардастI, Литва апны адесант рхъвква дрылашватI. Айсра тшыбжьараква йрылашваз ачкIвын ансимшы акомандирква йыззырбжьуз швабыжта йымаджьащахъван. Ауи дызлаз акъвырльыкъвхагIвчва гвып дзачIвызлакIгьи айсра ъачIвагIа дазгврыхвахара ахъазла йгIайархIвуаз аунашваква йырхъйун. ЧкIвыныргIа зымгIва рапшта, Валерийгьи амурад пшдзаква йыман – йборч йырхъйата дабга-дызгIвадата йцриква дрызгIайхырныс. Валерий ауи азаман айсра ъакIвшуз Афганистан дыргуштагьи йыгьйымдыртI, амамыр бзазара йалыржваз ачкIвын ауаъа данырга акIвпI ауи амагIындза ангIайгвынгIвы. – Ауаъа абыхъвква йгIартыхIвачвгIуз ахысбыжьква ансагIа агIан акIвпI хIъаргаз тынчра шаъамыз ангIасгвынгIвы. Сара й-56-хауа адесант бригада апшыхвыгIвчва гвып срылата Кундуз город адзхъа аэродром хIхчун. Агъачва хIсамолетква ъагIачIвуз аэродром аргван йгIамскIьара ахъазла запыт апшыхвраква акIвхIыршун, хIанхъаранагарыз адушманкви хIари хIаналакшуз гIаншун. ХIуагIагьи хIызпшIагылазгьи айбащраква йрыладзуан, – йгIайгвалашвахитI Валерий. Афган айсра йалаз ринтернационал борч шдырхъйаз йалачважварныс, йалкIгIата, айбащраква гIаргвалашвахырныс бзи йгьырбум. ГвынгIвырапI, анбжьагIвчва анучвыдз, хьшвашвара ймачIымкIва уыла йаныцIс азаман гIаугвалашвахырныс гьмайрам. – ХIреспублика йауата афган айсра йалаз щардагIвы хъацIара гIадырбатI, ауаъа зхъа щтIазцIаз хIайщчвагьи швара рымдыруата апсыхIваква, абыхъвква тшыкъазчIвахуаз адушманква рабджьар щтIаддырцIун. Ауат зынгьи йыгьхIхъаштылуашым, – йхIвитI ХвытI Валерий. Афганистан апны хIайсыгIвчва абыхъвква ангIарпшыхвуаз ауат ашIыпIаква бзита йыздыруаз адушманква мадза-мадза йгIаргвыквслун. ХвытI Валерий дызлаз агвыпгьи ауи акIвпI йрызнийыз. – АпшыхвыгIвчва гвып йхIызниуаш хIымдыруата ансимшгьи хIборч хIырхъйун. Аэродром хIтыцIуанта абыхъвква, апсыхIваква гIамыгIдун. Ауат ашIыпIаква бзита йыздыруаз адушманква йхIымдырдзакIва йгIахIгвыквслун. Зны амашинаквала айсыгIвчва шатхIрыпуз абджьарла йадгалаз агъачва хIколонна йгIайхсуа йалагатI. АхIагIартаква рпны тшыкъазчIвахыз адушманква хъатамата тшхъыларпсан, агIвжвагаква гIахIыладрышвуан. Атанк йызлайхсуа ахыхъвшв сызквчIваз амашина йангIаквшва йгIаншаз агIвжвара амцабыз мчыта йгIахъыцIтI, йсыцыз хъатамата йамцIнапсатI. Саргьи срылата щардагIвы хIхвхатI, йщхаз аэродром йадыргалхтI, – йгIайгвалашвахитI ХвытI Валерий. Ари апшIахра апны йхвхаз айсыгIвчва агоспиталь йщтIарцIатI. Ахвырта хIатлаква задзаз ХвытI Валерийгьи йщапIы дгIахвындыргылхуата йайъазатI, хъвшвы датша цхърагIарата йатахъыз зымгIва йдрадзатI. Валерий агоспиталь дангIацIырщтх йызгIвадара аъащала йъатынчмыз акъраль апны къвырльыкъв йхарныс дгьадымрыхвитхтI. – Афганистан апны адушманква йадыргалуаз агвыквсраква йгьызным хIъадзарылашваз. СангIарщтихуашыз апхъала хIызлашваз айбащра швабыжта йымчын. Ауаъа ага хIгIархвызтынгьи, хIуагIа гIарщызтынгьи хIаргьи адушманква бзита хIрылахыстI, щардагIвгьи чвхIцIатI. Йаргьи ауи алакшара амщтахь агоспиталь сыцIашван, Афганистан саъазлара ауыла йалгатI. Асквш 1981 декабрь агIан комиссовать сырчпан, хIышта сгIайхтI,– йхIвитI ХвытI Валерий. Афганецква ймахъвщахъву, рыцIа зкъару дуу хIва тшгьалырымхуазтI. Р-Псадгьыл агIальаматраква йрызгылата зымгIвагьи йацзакIыта уыскI дырхъйун. Айбащраква рпны азаджв-азаджв дгIайхчауата хъамайгьдзара гIадырбун, йгIархвуаз ласыта алгъачI дгIалыргун. ХIхаквлагIвчва йрыуата Афганистан апны хъацIара гIазырбаз щардагIвы йапшым амедальква гIарквнадыргатI. ХвытI Валерий йгвпы йгIаларцIаз Афганистан айсра аюбилей медальква йхъа рыладута йынкъвигитI. Совет Союз архъвква Афганистан йгIатырдахищтара сквш 30 агIвсхьазтынгьи ауаъа зинтернационал борч зырхъйаз ачкIвынчва йгIадырбаз ахъацIара уыжвгIандзарагьи йалачважвитI, ужвыгьи жвасквшапхьадзара агIвсыргьи ауаъа зхъа щтIазцIаз рфырра гьырхъаштылуашым. АйсыгIвчва-интернационалистква Афганистан йырбаз агIапсаракви абаргвыракви ркърар дрыбагъьатI, рыла йыцIсыз рхIаль асайтI.