АЙСРА ЙАЛАДЗЫЗ ГIАРГВАЛАШВАХТI

Июнь а 22 хIреспублика апны Абашта айсра Ду агIан хI-Псадгьыл гIазхчауата зхъа щтIазцIаз гIаргвалашвахтI. Черкесск, АйгIайра Парк апны йакIвшаз ахъмаштылри аджьабари ры-Мш йадахIвуата йадыргалыз амитинг йалан ареспублика йгьи агород власть органква рунашвачпагIвчви рынхагIвчви, адиннкъвгагIвчва, ахабзахчара органква, ажвлара адкIылараква ргIащтийыгIвчва, Абашта айсра Ду аветеранква, Черкесск город абзазагIвчви асасчви. Амсылман йгьи аправослав диннкъвгагIвчва айсра йаладзыз рыхъазла ауагIа духIа гIаддрахвтI. ХIреспублика а-Хъада Темрезов Рашид йгIайззаз тшырзынайырхауата асквш 1941, июнь а 22 агIан йгIалагаз айсра мильуанпхьадзарала ауагIа рылахьква шпнатшыз, унагIвипхьадза рыцхIагIа, джьабагIа, лдзгIара шнанагылыз даквгIашIастI. – ХIкъраль ахъазла рахIа йхьантаз айсра сквшква атурых йгIалахатI. Ауи лдзгIарата йгIанагыз, хIкъраль ахъахвитра йазгылата зхъа щтIазцIаз анцIрала хIхъмаштылра йалазлуштI, йгIадзынгылуа абанпарагьи ауи рзынахIырдзуштI. АйгIайра гIатызгаз айсыгIвчва, атыл апны амайчра нхарала амамыр бзазара гIащаквыжьра йазабакIуаз, айсра амщтахьгьи хIкъраль агIащаквыргылхра зкъару йамайгьдзауата йалазцIаз заджвипхьадза квырмыш рзыхIчпитI, йхIатлаз айсра мгIваква гIамыздаз уахьчIва йхIылу аветеранква рпахь хIхъа нахIыркъвитI. Швара алгъачI швгIалсын агIвычIвгIвара шабгаз руачIвымш гIашвхчатI. Швфырри швхъамайгьдзари ракIвпI уахьчIва хIбзазара апны швапхата йхIзалуа, – йгIаликIгIатI Темрезов Рашид. Айззара йалаз айсра йгIахънымхIвыхыз рыхъазла дзыргIвра дакъикъа йгылтI. – Асквш 1941, июнь а 22 агIан йгIалагаз Абашта айсра Ду хIкъраль абзазагIвчва рыхъазла рахIа йымчыз рхъвыхрахатI, – йгIаликIгIатI Абашта айсра Ду аветеран Мареев Евгений. – СквшыкIгьи ахъымпауата ауи амш агIан йауыраз, щарычIварала йырчвыз айсра сквшква руацIала йхIчвыдзыз хIынбжьагIвчва-айсыгIвчва, аконцлагерьква джьабагIа рбауа йтапсыз ауагIа, атыл апны ахьти амли йыргаз атажв-лыгажвква, апхIвысква, асабиква гIахIгвалашвахитI. Ауат уанрызхъвыцуа агIан амамыр ахв рахIагьи йгIаугвынгIвитI. Ауи зынгьи йхIыгымхаргIатI, зымгIвагьи насыпла йырчву бзазара швзыстахъпI, швсабиква руачIвымш лашаразтI. «Асолдат йфырра хвы злаквырцIауа закIыпI: йгIайырхвитхыз Абаштала» – рхIвитI. ХI-Абашта ахъазла айсыгIвчва мильуанпхьадзара рынцIра йшамайгьдзаз гIазгвынгIвуа ашIаква йшрылахIауа кьангьаш гьалам. – Ахъмаштылри аджьабари ры-Мш йалазларныс айщчва нышвынтара адзхъа йгIайззаз йрылапI чкIвыныргIагьи, – лхIватI Черкесск йбзазауа апатриот шIа КIьылдза Аида. – ХIабадучва рабачва Абашта айсра Ду агIан хъацIарата йгIадырбаз уыжвгIандзарагьи йызшIуырпшуаш гьаъам. Ауат йхIзыгIархчаз амамыр анцIрала йшщаквгылазлуш хIара айцIбачвагьи хIазабакIуаштI. Амитинг апны йшгIархIвазла, Абашта айсра Ду агIан АйгIайра асквш 75 артлапIара тшазрыхIазырра апкъ йтата ужвы йакIвшауа «Горсть Памяти» Россия акция Къарча-Черкесгьи йацнакIтI. Белоруссия апны хIхаквлагIвчва-айсыгIвчва ъацIу айщчва нышвынтара йгIарахвыз анышв йазалху атараква – асолдат кисетква йыртата аюнармеецква КЧР айсра комиссар Темыр Арсен йдрадзатI. Ауи уацIыхъван агильзаква йыртарцIахта Подмосковье йаъу «Патриот» парк апны йыруыхвауа РФ Абджьар Къаруква ркьльиса хъада йыгIвнарцIахуаштI. Ахъмаштылра Мшы йалаз АйгIайра Парк йаныргIалу совет солдат йчвахъабага ащапIы ахIврапшдзаква щтIарцIатI, хынхысрала айсра йаладзыз рфырра чIахI аквырцIатI.