Абашта айсра Ду агІан
агъа йпшІагылата АйгІайра гІазраргвануаз аветеранква, ага йгвасразтынгьи, рсатырква цІагъадзахатІ. Абаза районла
ауат йрыуата заджвгьи
дгьабгахым. Асквш хьантаква руацІала атажвлыгажвкви апхІвыскви
йрыцІагылата зкъару йгІанагуаз зырхъйуз айсра
асабиквагьи гьщардагІвыхым. ЙцІыхъвахауа
азаман ауацІала ауат йрапшу хІхаквлагІвчва рахьыла авласть органква гватра ду гІадырбитІ.
Абаза муниципальна
район администрация
ахъада Ныр МухІаджьыр, АлбыргІан кыт
гІаныршара аунашвачпагІв Меремкъвыль Мурат, «Алашара» адкІылара Черкесск городла
ахъвшара знапІыцІу Мыква Мурат йгьи абаза
пхІвысква ркоординационна Совет апредседатель ХвытІ Ирина атыл
анхагІвы, АлбыргIан кыт
абзазагIв ГВЫМЖАЧІА
Дана Адыльгьари йпхІа
лунагІва йлызцатІ. Ауат
Абашта айсра Ду агІан
ахІбачва йрыцта аколхоз
архъаква рпны йынхаз
Дана Адыльгьари йпхІа
йылхъыцІыз асквш 90-ла
пхата йлайхІвахІвтІ.
Абаза муниципальна
район администрация
ахъада Ныр МухІаджьыр
ауи Россия Федерация
а-Президент Путин Владимир йылзыгІайщтийыз згІвадара, мамыр,
баракьатра шылзитахъу
зну асальамшвъа длызгІапхьатІ.
Мыква Муратгьи амеценат, Къарча-Черкес Республика АуагІа Айззара
(а-Парламент) а-Председатель йзаместитель,
«Алашара» адкІылара
апрезидент Эгьзакь Мусса йхІвахІвра сальамшвъа Дана Адыльгьари
йпхІа длызгІапхьатІ.
Зсабихъа ймайрамыз
асквшква йрыквшваз,
зюбилей пшдза зыртлапІаз ГвымжачІа Дана
ауи атшын йлайхІвахІвтІ
«Абаза» жвлара организация апредседатель
Къванча Умар, абаза
пхІвысква р-Совет апредседатель Цекъва Ася.
КЧР АуагІа Айззара
(а-Парламент) уагІахъа
политикала акомитет
апредседатель йзаместитель Кубанов Расул,
промышленностьла акомитет апредседатель
Шнахов Кърым, Къвайдан кыт гІаныршара
ахъада йгьи адепутатква атыл анхагІвы, Къвайдан кыт абзазагIв ДАХІЧЫКЪВА Тлостахан дангІадрийыз амшла йлайхІвахІвтІ, РФ а-Президент йгьи КЧР а-Хъада
рсальамшвъаква йлызгІапхьатІ.
Атыл анхагІвчва ГвымжачІа Дани ДахІчыкъва
Тлостахани йрызцаз асасчва швабыжта йгІарайгвыргъьатІ, гватра рзалызхыз акъраль йгьи
ареспублика аунашвачпагІвчва разыра ажва
щарда рзынадырхатІ.
Получайте свежие новости на электронную почту
Комментарии