Актуально В ФСБ России по КЧР рассказали как распознать телефонных злоумышленников  СКФО Новый логотип курорта Эльбрус в КБР представили в студии Артемия Лебедева СКФО В Северной Осетии прошла донорская акция Актуально В КЧР родители старшеклассников сдали ЕГЭ Общество Карачаево-Черкесия наращивает объемы производства тепличных овощей

АЙКЬАНГЬАШЫРТА ГIАНДЫРШАТI

03.11.2020 115
АЙКЬАНГЬАШЫРТА ГIАНДЫРШАТI
Абаза уагIахъа хIпхьадзара мачIызтынгьи, мшигIадза апхъала йчIвырхъауа абзазара йшацымгIвайсуаш йащтапI. Швапха байа зырхIаз ахIбачва йгIадзынгылуа абанпара йрыдынхалуата уыс щарда адыргалитI. ЧкIвыныргIагьи йапшым анархараквала апроектква лырхуа йгьи абзазара йаларжьуа тшырбжьитI. УахьчIвала зуагIахъа рылахь йазгвалымсым хIыгIвычIвгIвысква йгIащтIырхуа ауысква рырхъйара апны цIагылагIв бзита дырзалитI Адуней абаза-абхаз уагIахъа конгресс ЙхIаракIу а-Со-вет аунашвачпагIв ЭГЬЗАКЬ Мусса ХIабальа йпа. Ауи йгIанйыршаз «Алашара» жвлара адкIылара хIуагIахъа культура, хIыбызшва ахчара йацыркIуата уыс щарда акIвдыршитI. Эгьзакь Мусса йхъвдаквцIарала «Алашара» дуней адкIылара айкьангьашырта (дискуссионный клуб) анхара джвыквылтI. Ауи анхара шакIвшуш «Алашара» жвлара адкIылара апрезидент йзаместитель МЫХЦ Рамазан Али йпа хIахайыргIвазатI. – ХIреспублика апны зынхара джвыквыгIжьуа айкьангьашырта Апсны апны йынхауищтара заман агIвсхьатI. Ауат ршвапхала, хIаргьи абаза уагIахъа йрысабапхуш ахъвыцраква зму ашIаква гIахIрайгвуштI, ауат рпроектква хIъарылачважвуш айкьангьашырта гIахъхIтIуаштI. Ауи лкIгIарата йамазлуш – хIызлапшуаш дара чкIвыныргIа ражванахъаква ракIвпI. Дасугьи йзаргвану анархарала йчпачIву далачважварныс, йхъвыцраква хIыцагIвишарныс йылшуштI. Айкьангьашырта йгIалалырныс зтахъу йшвъаква хIзыгIайщтира атахъыпI. Ауат йырзалху атыпква рпхьадзара ахъарыспI. Ауи йгIалцIла, айкьангьашырта йалашвуш рыцIа йджьащахъву апроектква, уыс хъадата хIуагIахъа рпахь йгылу гIалызкIгIауа ракIвпI, – йхIвитI Мыхц Рамазан. Айкьангьашырта апны Мыхц Рамазан, Гьадыгв Мурат йгьи Джьмакъвыл Стелла модераторта йынхуштI. Ауат йшгIалыркIгIазла, чкIвыныргIа йгIалырхуа анархарала апроект анлырхуа швапха байа, дырра цIола зму аъачIвагIагIвчва, йапшым аведомстваква рынхагIвчва гIазшIыртуамца ашIаква кьангьашра ддрадзуштI, руыс хъйара ахъазла йызламгIвайсуаш мгIва йыквырцIуштI. ЧкIвыныргIа апроект йъадзалачважвауа йацацхърагIауа, йайкьангьашуа, гвыпла йацынхауа йабжьуштI. – Апроект намхъаракIгьи аламкIва йлырхра ахъазла хымызкI руацIа йадынхалуаштI. Йара ауи нархаракI гIалызхыз чкIвыныргIа адхIкIылта гвыпла йдрыхIазыруаштI. ЦхърагIара кьангьашра дызрадзуш швапха байа зырхIаз ахIбачва гIахIрайгвалуштI. Апроект анхIазырхара йалапшуашта хIуагIахъа рыхъазла сабап алата йырпхьадзузтын, Эгьзакь Мусса ахча рзалихта абзазара йаларжьуаштI, – йхIвитI Мыхц Рамазан. Ауи йшгIаликIгIазла, айкьангьашырта йгIалалуаш рпхьадзара щардахузтын, йгIалырхуа анархараквала гвып-гвыпта йыршата рынхара джвыквыржьуаштI. Арыпхьара, культура, абызшва, экология нархараква ракIвымкIвагьи ан-абачва рхъвыцраква йъарылачважвуш айкьангьашыртагьи гIандыршарныс ргвыгъапI. – АжванахъакIгьи гватрадъа йыгьгIанхушым. Айкьангьашырта апны йапшым алекцияквагьи адыгIгалуаштI, психология нархарагьи гIалхIкIгIуштI. Апсны йакIвдыршауа ауысквагьи хIрылапшта видеола хIайчважварныс хIылшуштI. ХIапхьахьаква рлекцияквагьи Апсны чкIвыныргIагьи йахахIыргIвазуштI. Ауи йапшу амальква абаза йгьи абхаз чкIвыныргIа абанардыруаштI, швапха амырдуштI. Дасугьи дыздынхалуа йалапшырныс рылшуштI, – йрыбагъьитI Рамазан. Ауи йшихIвазла, хIуагIахъа рыхъазла магIын ду зму апроектква апхъахьыла Адуней абазаабхаз уагIахъа конгресс апрограмма апны йырхъйачIву ауысква йрыларцIуштI. Айкьангьашырта анхара анджвыквылра абаза уагIахъа рбзазара агъьызчIвуаш, сабап злазлуш проект джьащахъва щарда шлырхуаш йазхъарцIитI. Айкьангьашра йалалырныс зтахъу ршвъаква «Алашара» рофис апны йыргара йа Интернетла тшырзынадырхара атахъыпI.
115 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный