АЙГВАРА ГЬШІЧІВУШЫМ

Байрамыкъва Халимат лыхьыз зхъу ареспублика библиотека апны АйгІайра асквш 75, КъарчаЧеркес йгьи КъабардБалкъар республикаква культурала ращтаныкъвара асквш агІарбараква йгьи Къарча-Черкес Республика ауагІахъаква рлитератури разъазари рыгІамта агІахътра йырзынархаз стол гьагьа акІвшатІ. Ауи йалан культурала КЧР аминистр БОРОКЪВА Рамазан, ауагІахъа уысквала, ажвлара коммуникацияквала йгьи печатьла КЧР аминистр йхъвдаквцІараква зырхъйауа ХВБИ Ислам, «Историческая память» федеральна проект ашIыпІа координатор ДЗУГАЕВ Альберт, Къарча-Черкес Республика АуагІа Айззара (а-Парламент) адепутатква, ареспублика газетква рредакторква, ажвлара организацияква рунашвачпагІвчва, Черкесск й-9-хауа Гимназия апхьагІвчви арыпхьагІвчви. Къарча-Черкес йгьи Къабард-Балкъар республикаква культурала ращтаныкъвара йазынархата асквш 2019 ауацІала йакІвдыршаз ауысква дгІарыквчважватІ ареспублика къральыгІва библиотека адиректор Хапчаев СальыхІ. Ауи йшгІаликІгІазла, агІвреспубликакІ сквшщарда цІуата ащтаныкъвара пшдза рызбжьапІ. Къабард-Балкъар агІвгІвчви ауысагІвчви рыршІыйара йаквчважвауата ареспублика библиотека апны уыс щарда, зыхьыз бергьльу арежиссер Емкуж Андзор йынхара цІолата йгІахъызтІыз анйара джьащахъва, датшагьи йапшым агІарбараква акІвдыршатІ. АнцІралагьи йагвлачвата йбзазауа йгьи мамыр ащтаныкъвара зызбжьу агІвреспубликакІ асквш 2019 ауацІала уыста йакІвдыршаз йгІадзынгылуа абанпара рыхъазла магІныта йаму гІалыркІгІауата йгІачважватІ культурала аминистр Барокъва Рамазан, ауагІахъа уысквала, ажвлара коммуникацияквала йгьи печатьла КЧР аминистр йхъвдаквцІараква зырхъйауа ХВБИ Ислам, ажурналист бергьльы, ауысагІв КАКУШЕВ Хвсей, КЧР ауагІа рартист УРТЕНОВ Борис, ХІабаз район библиотека аунашвачпагІв ДАБАГЪВА ФатІима, КЧР-ла гІатгара зму арыпхьагІв УМАРОВА Кулина. Черкесск город й-9-хауа Гимназия апхьагІвчва Къарча-Черкес йгьи Къабард-Балкъар республикаквала зыхьыз бергьльу аршІыйагІвчва руысаква йгІарыпхьатІ. Къарча-Черкес ауагІахъаква рлитератури разъазари йырзынарху амыз агІахътІра апкъ йтата ауи атшын ареспублика библиотека апны «Воспевшую Великую победу» электронна книга апрезентациягьи акІвшатІ. Ауи абиблиотека адиректор Хапчаев СальыхІ йгІаджвыквцІарала йадыргалтІ. Ауаъа хІхаквлагІвчва-ршІыйагІвчва йрыуата згІвыраква аншвалыз 62-джь йнадзитІ. Апрезентация йгІадрайгватІ ажурналист, афронтовик Адамокъва МухІарби йпа Бильаль, Къарча-Черкес Республика ауагІа руысагІв, айсра аветеран ХІанфан ГІальым йпхІа Елена, ачеркес уысагІв бергьльы ГІашокъва ХІвсин йпа Иналь, абаза уысагІв, ауарадгІвоу Цекъва Пасарби йпа ХІасана, акъарча уысагІв Хвби Уасман йпа Азрет, айсра аветеран, агІвгІвы Шурдым Квчыкв йпхІа Татьяна. Абиблиотека анхагІвчва ргвымчІвара нхара йшазыразу йгьи йадыргалыз акнига амагІны хвы шаквцІауачву гІалыркІгІауата агІвгІвчва-фронтовикква ртынхаква гІачважватІ. Заджвгьи гвалымста дыгьгІанырымжьтІ Черкесск й-9-хауа Гимназия апхьагІвчва гІазпхьаз Абашта айсра ду агІан зкъальам щтІазцІата агъа йпшІагылыз хІхаквлагІвчва руысаква. Абиблиотека анхагІвчва Къарча-Черкес йгьи Къабард-Балкъар республикаква культурала рацынхара апкъ йтата асквш 2019 ауацІала уыста йадыргалыз ахъазла дшырзыразу гІаликІгІатІ Къарча-Черкес Республика АуагІа Айззара (а-Парламент) адепутат Быджь Исмель. Анйара алдыргахуата ауи йалаз резолюциягьи нарахвтІ. Ауи йшгІанахІвауала, асквш 2019 йакІвшаз агІвреспубликакІ культурала ращтаныкъвара айщчва уагІахъаква райгвара рыцІагьи йарыбагъьатІ. Асквш апкъ йтата ареспублика къральыгІва библиотека апны йадыргалыз айззараква, анйараква, агІарбараква, ауагІахъа уысквала ажвлара коммуникацияквала йгьи печатьла КЧР а-Министерства рцхърагІарала йгІацІырщтыз «Многоголосая литература Эльбруса» книга апрезентация датшагьи уыс бзи щарда йгІадзынгылуа чкІвыныргІа рыхъазла бжьара магІны рымапІ. Къарча-Черкес йгьи Къабард-Балкъар республикаква культурала ращтаныкъвара асквш ацІыхъва йнадзатІ, ауаса йрызбжьу амамыри айгвари зынгьи йыгьшІчІвушым. ХІапхъахьылагьи йдырхІаз ашвапха апкъ йтата нархара щардала рацынхари агІаджвыквцІара шІыцкви гьашІадрысуашым.