АЙГIАЙРА ЗКЪАРУ АЛАЗЦIАЗ ХIХАКВЛАГIВ

ри ры-Сквш 2020 ауацIа Абашта айсра Ду апны АйгIайра гIатызгаз, адуней афашизм йачвызхчаз абачва, абадучва ъагIарымгвалашвахыз тгIачвакIгьи гьаъамзапI. Ауат йгIартынхаз асуратква, асальамшвъаква, айсра ртшхъвагаква йрызсакъхауа унагIвипхьадза рпны йынкъвыргитI. ЙрымапI ауат ачвахъабагаква Абашта айсра Ду агIан фырта йайсыз адарыкъвакт УАЗ Мурат Джьамырза йпа йгIариквагьи. Мурат йпахIба Маджьид йгIахIнапIыцIайыршватI йаба дызлаз Невский Александр йорден нкъвызгауа й-2-хауа Баранович Краснознаменна зенитартиллерия дивизия айсра мгIваква гIахъызтIуа акнига. Напа 754 гIазцIазкIуа ауи акнига апхъажва йшанула, адивизия асквшква 1941–1945 руацIа йакIвшаз айбащра дуква йрылан: Сталинград, Курск айбащраква, Белоруссия апны – «Багратион», Польша йгьи Берлин рпны – Висла-Одер операцияква рагIан агъа йсамолетта 431, танкта 20 йгьи датша техника щарда ыквырчIвакьтI, летчикта 1030-гIв гъарта йгIаркIытI. Йара адивизиягьи лдзгIара щарда аман. Айбащраква акIвшауата 395-гIв рхъа щтIарцIатI, амедсанбаткви агоспиталькви йыцIашваз йрыуата 600-гIв райхIа ахвырта хIатлаква йыгьгIарх ъымш в а л т I. ЙгIвыджьхауа айсыгIвипхьадза хвыц-дууызтынгьи хвыртакI йыман. ХIатламкIва йхвхаз агоспиталь йщтIамылуата адивизия асанитарква, афельдшерква, аполкква райъазагIвчва медицина цхърагIара ддрадзунта, зынла айсра йатапшцIалхуан. ЙалкIгIата, Берлин йанталуашыз заджвгьи агоспиталь дщтIазларныс гьйымуазтI, зымгIвагьи агъа йыгIвара дтарцахра ркъару аларцIара ртахъын. Совет Союз йгIагвыквсыз афашистква раларыхъвашара далан Берлиндза йнадзаз Уаз Мурат Джьамырза йпагьи. Ауи ар къвырльыкъв йхауата айсра гIалагатI. Румыния акъральгIвына мажа адзхъа Винница область, Тульчин город апны аэродромква адызгалуаз й-415-хауа абатальон асвязь рота апны дтелефонист-линейщикын. Ауи дызлаз абатальон айбащра хIатлаква акIвдыршауа Сталинграддза йгIатхъара атахъхатI. Ауаъа Уаз Мурат апхъапхъа йгIвбахуз азенит дивизия радиуателеграфистта дырщтитI, ауи амщтахь – й-304-хуз артиллерия полк. Ауи аполк дрылата адарыкъвакт Сталинград утыцIта Берлиндза днадзатI, Рейхстаг адзхъа АйгIайра дапылтI. Й-2-хауа адивизия ателефонист, арадиуателефонист, асвязь аофицер Уаз Мурат йайсра хъвдаквцIара рхъйарала хъамайгьдзарата, ъачIвагIадыррата, хъацIарата йгIайырбаз гIарпхьадзауата йхIаракIу айсра ртшхъвагаква гIайквнадыргатI: «Отечественной войны» гIворденкI, «За отвагу», «За боевые заслуги», «За оборону Сталинграда», «За освобождение Варшавы», «За взятие Берлина», «За победу над Германией» медальква. Йшалу ртшхъвагата 20 йымапI. Ауи ахква йхъыпссгIауа йгьызным архъвква абазырдыруаз асвязь ъадзадигалуаз, ауасамца айсра мгIвата щапIыла йгIамидаз километр зыкьпхьадзара йнадзитI, йгIаншун аток йылсуа йапышвтыз айхацIаква пыцла йыма йанапищылхуаз. Уаз Мурат Сталинград йгьи Орел–Курск айбащраква, Севш город йгьи Украина ргIархвитхра, Днепр ахъысра, Бобруйск–Минск операция, Польша агIархвитхра, Висла–Одер операция, Берлин аштурм дрылан. Айсра амщтахь ауи йцри Псыжв кыт дангIахъынхIвых асквш 1945, декабрь а 3 йгIванхауата дйыта йпхьадзун. ЙшгIайгвалашвахуазла, айсра сквш хIатлаква рагIан «Полевая почта» мхIвыр зквыз ахырца сальамшвъаква афронти атыли багъьата йадыркIылуан. Ауат йырнамрадзауа йрызпшуан, йангIарнапIыцIашварыз гвщтIыхра дута йырзалуан. РахIа йщарычIвараз Сталинград айбащра агIангьи асальамшвъаква рбжьаныкъвара гьашIадымрысуазтI. Ауат андыркъварыз айсыгIвчва ауи апхъала йгIарадзата йрызсакъуа йынкъвыргуз асальамшвъаква такIв йантосынхара рджьып йгIатырхуанта йатарыпхьахуан, рцриква рхабарква ацагIвыршун. Амаль амамкІва айсра цIхъва атта, дасугьи йгІайгвалашваз, сквшпхьадзара йымбаз йан, йаба, аунагІва, йкыт дазцахра швабыжта йшитахъу акІвын айсыгІвчва къару гІарызтуаз. Уаз Мурат асквш 1943 февраль агІан Сталинград апны акыт апхьарта йарыпхьагІвыз Зизи йари шаднагалыз, йацыта Берлиндза йшацынадзаз, йара Берлин апынгьи класскІ йыцапхьаз, йыгвлаз Мыква Рамазан дшйынйаз щардала йгІайгвалашвахлун. Артшхъвагаква йылата йгІайхыз Уаз Мурат чкІвыныргІа р-Абашта йазцІабыргта, хъацІара рылата, рхъахв рдыруата ргІадзныргылра къару ду алайцІатІ. Ауи сквш 45 гІазцІазкІуаз йынхара швапха йауата сквш 36 акыт апхьарта апны физикали математикали йайрыпхьатІ. Ауи тшпсщара данчІвахгьи Псыжв ажвлара бзазара джьгарта далан: акыт арадиуа йнапІыцІан йгьи йышта хвыц йтшауа зымгІва ауагІа йдйырдыруата агІатраква адигалуан, айсри анхари рветеранква р-Совет даунашвачпагІвын. Псыжв кыт йауата Абашта айсра Ду йалаз, АйгIайра гIазраргваныз рчвахъабага гIаныршара ахъазла тширыгIапсатI. Ауи уыста йгІащтІихлакІгьи ауагІа йацыркІуан, йажва йазхъарцІун. Уаз Мурат йызнымкІва Москва йакІвшаз й-2-хауа агвардейскІа зенитна артиллерия дивизия аветеранква ранйараква дрылан. Ауи гІадырбитІ адивизия йазынархата асквш 2015 агІан йгІацІцІыз акнига йанылыз асуратква. Акнига анапаква анахъурышвтуа алейтенант ахIба, асвязь хъвшара акомандир Уаз Мурат й-304-хауа аполк арадистква дъарылагылу асуратква йызнымкІва йгІауынйитІ. Адивизия аветеранква р-Совет йгьи Плеханов Георгий йыхьыз зхъу Россия экономика университет информатикала афакультет ргІаджвыквцІарала асквш 1970 мартІ угІалагата акнига ахъазла асуратква йгьи ашвъаква йгІархъыху агІвыраква разкІкІра сквш 43 аквдрыдзтІ. Акнига суратта – 1320, гІвырата 180 аланакІтІ. Ауи хъахчарала Россия а-Министерства йгьи ауыжвгІанчІви ар къвырльыкъвхагІвчва рбжьара нхараква рыхъазла магІныта йаму хвы аквцІауачвапІ. Ауи апш книга раба йчвахъабагата йынкъвыргитІ Уаз Мурат йгІариква Маджьид, Эдвардо, Мария, ГІайщат. Акнига гІахІнапІыцІазыршваз Маджьид йшгІахІайхІвызла, з-Абашти зцри хагІагви йрызцІабыргыз, зпІатІу хІагІата йгІабзазаз раба йанакІвызлакІгьи рхъа йыладута акІвпІ дшгІаргвалашвахуа, ауи йхабар ргІариквагьи, ауат йгІарыцIагылхызгьи швапхата йрызгІаргитІ. Акыт абзазагІвчвагьи ркытлагІв цІабыргы, айсыгІв патриот Уаз Мурат йхъмаштылгата дъабзазуз аурам йыхьыз ахъырцІатІ, апхьарта амузей абльын йсурат кІыдпІ, «Абашта айсра Ду Псыжв кыт атурых апны» книга йгІайыквчважвауа гIвыра анылтІ. Арат ауысква йрапшу ракIвпI акъраль атурых гIазхчауа, ауи зджьакIы йшыртахъу йацаркIырныс рылзмыршауа. УахьчIва йгIахIгвалашвахуа Уаз Муратгьи АйгIайра йкъару шалу атурых абгъьыцква аквшахIатпI.