Актуально В КЧР определили лучшего учителя родного языка и литературы Актуально Глава КЧР Рашид Темрезов вручил ключи от 19 новых пассажирских автобусов Актуально «Россети Северный Кавказ» на 7,7 % улучшили платежную дисциплину потребителей электроэнергии в КЧР Актуально В ФСБ России по КЧР рассказали как распознать телефонных злоумышленников  СКФО Новый логотип курорта Эльбрус в КБР представили в студии Артемия Лебедева

АЙГIАЙРА ГIАЗРАРГВАНЫЗ ЙЫРЧIАРХIТI

27.02.2020 163
АЙГIАЙРА ГIАЗРАРГВАНЫЗ ЙЫРЧIАРХIТI
Февраль а 21 Черкесск город акультура Дворец апны Абашта ахчагIвы йы-Мш йазынархата айззара акIвшатI. Ауи йалан КЧР а-Хъада ТЕМРЕЗОВ Рашид, КЧР АуагIа Айззара (а-Парламент) а-Председатель ИВАНОВ Александр, адепутатква, КЧР а-Правительства а-Председатель УАЗ Аслан, аминистрква, КЧР афедеральна инспектор хъада ДРАЛЬЩИКОВ Игорь, КЧР апрокурор ЖАРИКОВ Борис, ауацIа уысквала КЧР аминистр йхъвдаквцIараква зырхъйауа БОТАШЕВ Ансар, КЧР айсра комиссар ТЕМЫР Арсен, Абашта айсра Ду аветеранква, атыл анхагIвчва, Ленинград аблокада арыцхIагIа збаз ахIбачва, хIреспублика агородкви арайонкви рхъадаква. Айззара Россия Федерация йгьи КъарчаЧеркес ргимнквала йгIахъыртIытI. УадыргIвана хIкъраль, хIреспублика йгьи АйгIайра рбаракъква асцена йхъаргылтI. Айззара акIвзыршуз Россия Федерация а-Президент Путин Владимир, СКФО-ла Россия а-Президент йгIащтийыгIв Чайка Юрий хIреспублика абзазагIвчва йгьи КЧР а-Хъада йырзыгIанадырхаз ахIвахIвраква йгIарыпхьатI. «Йапшым асквшква рагIан хIкъраль ахъахвитра йазгылыз хIабадучва йгIадырбаз афырра хIхъа аладута хIаквчважвитI. Ауат ршвапхала йгIадзынгылыз, Россия ар апатриот хабзаква дымрыдзуата, зборч йазцIабыргта з-Псадгьыл къвырльыкъв азызхаз щардагIвыпI. Ауат уахьчIва йырчIахIхIитI, хIрызхIвахIвитI» – йаныпI хIкъраль а-Хъада йхIвахIвра. Темрезов Рашид хIкъраль атынчра, ауагIаква ршварагIварадара йрызгылу ахабзахчагIвчва, Абашта айсра Ду, ар акъвырльыкъвхара рветеранква агвыргъьахъвла драйхIвахIвтI. – Абашта ахчагIвы йы-Мш абагъьара, ахъацIара, хI-Псадгьыл азцIабыргра йырдамыгъата йхIыртлапIитI. ХIкъраль ар ангIанша йгIашIарышвта къвырльыкъв зхуз абанпараква хI-Псадгьыл ахъахвитра, ауагIа ртынчра рхчауата хъацIара ду гIадырбатI. Ауат рфырра атурых йгIалахатI. Къарча-Черкес йауата фырра зпщылу хI-Абашта атурых зчпаз хIабадучва йанакIвызлакIгьи хIхъа рыладупI. УыжвгIанчIви Россия апны айсра ъачIвагIа гIалызхта гвыцкьала зборч зырхъйауа акъвырльыкъвхагIвчвагьи Россия агIальаматраква йрызгылата чIахIрала рборч дырхъйитI, – йхIватI Темрезов Рашид. КЧР а-Хъада Абашта ахчагIвы йы-Мш агвыргъьахъв андыртлапIауа Абашта айсра Ду аветеранква хвду рзырбауата рфырра йшаквчважвауа гIаликIгIатI. – Абашта ахчара, акъвырльыкъвхара борч азцIабыргра, апатриотра йгIарныцIуа Абашта айсра Ду аветеранква бзидздзата йырдыритI. Айсра алгищтара сквш 75 цIхьазтынгьи хIабадучва рхъа йамайгьдзауата АйгIайра шгIатыргаз зынгьи йыгьхIхъмаштылтI йгьи йыгьхIхъаштылуашым. УыжвгIанчIви Россия ар йалу акъвырльыкъвхагIвчва акъральыгIва, ауагIа ршварагIварадара йрызгылата хъацIарала рборч дырхъйитI, тынчта хIъабзазауа ашта рхчитI. ХI-Абашта бзи йъадзагIбауа, хъацIара, чхIара злу ауагIа Россия ар йалата къвырльыкъв ъадзархауа хIкъральыгIва къагIуштI йгьи йымчхъазлуштI. Хвду ззыгIбауа Абашта айсра Ду, йапшым айсраква йрылаз аветеранква, ар акъвырльыкъвхагIвчва, акъральгIвчва ршварагIварадара хчара йазынхауа зымгIва агвыргъьахъвла пхата сшвайхIвахIвитI. ЗгIвадара багъьа, дахIвра, тгIачвала тынчра швзыстахъпI, – йхIватI Темрезов Рашид. УадыргIвана Темрезов Рашид Россия а-Президент Путин Владимир й-Унашвала йщаквдыргылыз «Асквшква 1941– 1945 рагIан Абашта айсра Ду апны АйгIайра асквш 75» юбилей медальква аветеранква, атыл анхагIвчва, Ленинград аблокада арыцхIагIа зыла йыцIсыз ахIбачва йриттI. Черкесск город апхьартаква апычIв классква йрыцIу асабиква рнапIквала йырчпаз ахIвахIвра открыткаква амедалькви аорденкви згвпы йалаз ахIбачва йрырттI. Ари атшын Абашта ахчагIвы йы-Мш йазынархата гвыргъьахъв концерт адыргалтI. Кьазу ауатыкв йгIадрайгвуз артистква айгIайра, хIабадучва рфырра, ахъацIара, апатриотра йырзынарху ашваквала йгIайззаз рнашх гIащтIырхтI.
163 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный