АЙГIАЙРА ГIАЗРАРГВАНУАЗ ТГIАЧВАКI РТУРЫХ

Айсра сквшква хIцIыхъвала йгIанхитI, хIтурых абгъьыцква йрыуахитI, Апсны апны абанпара шIыц гIадзынгылитI, ауат ймамыру акъраль апны йбзазарныс рынасып йгIанакIытI. Ауаса хI-Псадгьыл ахъахь ажвгIванд зрыхъващыз асквш 1992 агIан йгIалагаз айсра, абджьар гIазахвта агъа йпшIагылыз хIычкIвынчва рхъацIара хIгвы йыгьтыцIуашым. Ауат хIадгьыл, асквшышвква зхъыцIуа хIкультура, хIцIасква, хIтгIачваква гIархчара ахъазла рхъа йгьамайгьдзатI, йацзакIыта тшадыркIылын, АйгIайра гIатыргатI. Айсра агIан тгIачвала ахъахвитра йазгылыз гьмачIгIвым. Ауат йрыуапI Гудаута район, Къвланырхва кыт йауу ДармаваргIа ртгIачва. ТгIачвала айсра йпшцIалыз ртурых айгIайра амщтахь ййыз йырдырра, швапхата йырзалра атахъыпI. Ауи ахIатырла сгIахIвахра атгIачва раба Маджьид йпныла сгIалагуштI. ДАРМАВА Маджьид йгIариква хъацIара рылата йгIадзынгылра ахъазла йхъатачIв швапха ъанамдзауа гьаъамызтI. Ауи 18 сквша дыртата Абашта айсра Ду дызшIыртын, айсра мгIва ауыра гIамидатI. АчкIвын «йыжвуаш адзы гьгIацIымцIстI» ззырхIвауа ныбыжь дтазтынгьи, акъраль ахъахвитра хчара ахъазла джьауапкIра ду йылайхIвун, айсра дъапшцIу хъацIарата йыгьйымпхьадзузтI, йборчта акIвын дшадгылуаз. Маджьид йгIарыласу акурсква дгIарылган, Ар Къапщ дрылалтI йгьи абджьар йнапIыцIакIта Берлиндза дымгIвайстI. Ауи Абашта айсра Ду агIан хъацIарата йгIайырбаз ахъазла «Орден Красной Звезды» – гIвба, «Орден Солдатской Славы» й-3-хауа астепень, «За отвагу» гIвмедалькI гIайквнадыргатI. РтгIачва йауата агъа йпшIагылыз ауи йгьихъазым. Айщчва цгIвы йнадзунта ахвыгIвгьи афронт йпшцIалтI. АхIба Виссарион Харьков ангIадырхвитхуаз дгIархвын, агоспиталь амщтахь Украина дгIанхатI. Ауи йыщтагIайуаз Дикран уахьчIва йъагIадзазгьи йыщта йгьыквымшватI, ауи Малая Земля ахъазла айбащра далан. Гвагв афашистква йгIакIвдыршаз агвып дрылата дгъархатI. Ауи йгIалцIла айсра амщтахь дыркIын Къазахстан дтыргатI. Ауыгьи ауаъа дгIанхахтI. ЙпщыгIвхауа Василий айсра дангIахъынхIвых Гудаута аэкскурсия бюро апны дынхатI. ЙмачIыгIвпI ауи адесантникква рапхьарта дшгIалгаз здыруаз. Апсыуаква йрыуата йапхъахауата ауи апш ъачIвагIа змаз Василий йакIвпI. Ауи асквш 1937 агIан ар дрылалын адесант апхьарта дыцIалтI, ФинскIа айсрагьи далан. Йайщчва рапшта Абашта айсра Ду йауыраз амгIвала дымгIвайстI, асквш 1943 угIалагата адесантник шIаква йбжьун. АтгIачва рпны йайцIбаз Константингьи айсра алгауата дызшIырттI, ауаса афронт дпшцIалырныс дгьахамдзатI. Дармава Маджьид айсра аналга зынла йышта дгьгIахънымхIвыхтI, асквш 1947 агIан акIвпI Ар Къапщ дгIарылцIхта йкыт Къвланырхва дангIаталх. Ауаъа йгIашIарышвта акыт дгьтымцIхтI, дтгIачвахатI, хвгIвысабичва – пщыгIвпачви пхIакIи гIадзынйыргылтI. Ужвы сгIазквчважвуш раба йапшта фырра гIазырбаз йпачва Виталий, Игорь, Гулик йгьи Джьубей ракIвпI. Агрузинква зтшын Абхазия йгIагвыквсыз угIалагата айщчва абджьарта йрауыз рнапIыцIакIта раба йтдзы йджвылцIын, р-Псадгьыл ахчара йазгылтI. Маджьид йпачва бжьагажва гьыртахъымызтI, раба йгьи ауи йайщчва ршвапха рызхъун. АгIвычIвгIвыс Псадгьылта йыму закIыпI, ахъацIа ауи йхчарныс йборчпI, йатахъхузтын йхъа щтIайцIуштI. Айщчва ДармаваргIа ран дрыщтахьпшуамцара йгварцIтI. Ан агвымхара дазхъвыцра гьылтахъымызтI, ауаса лыладзква гьылзымкIуазтI. Айсра ангIалага ангьи абагьи йырдыруан рпачва тшадыркIылта радгьыл шырхчуш. Айщчва йызцгIадзынгылыз ачкIвынчва ргвып «Замостянка» йрылалын, АйгIайра йазабакIтI. ЖвахмызкIла агвыквсраква, алдзгIараква, йкъыту ахъацIа ладзква анырзымкIуаз агIаншараква йрылан. Айсра амщтахь Гудаута йаныргIалу Дбар Сергей йыхьыз зхъу Абхазия ауагIа р-Абашта айсра музей апны Дармава Виталий сйынйатI. Айщчва йрахIбу йчвхIатлан айсра гIайгвалашвахырныс, йалкIгIата, йаладзыз йайщчва дгIарыквчважварныс. ДармаваргIа рыуа дзачIвызлакIгьи бзидздза йырбауа р-Псадгьыл агIархвитхра къару щарда аларцIатI. АуагIа зламдзуа айсракIгьи гьаъам, мшигIадза айсыгIвчва йрылдзгIун, зхъа щтIазцIаз рабджьар арахьарат ачкIвынчва йгIарахвуанта АйгIайра йазычIвырхъун. Зхъа щтIазцIаз дрыуапI асквш 1993 мартI операция йаладзыз Дармава Игорь. Айбащра амщтахь Игорь йцриква дабгата дгIанхата йгвыгъун, заманкI анцIгьи дгъархата хабар гIарадзатI. Ауи агIангьи йгвыгъун – агъарква анамырпсахуаз гIаншун. Ауаса ачкIвын дгьгIахънымхIвыхтI, мартI а 30 йпа адуней дшгIаквлызгьи гьйымдыртI. Ауи атшын ййыз асаби йаба йыхьыз йхъырхIвалгIатI. Игорь ареспублика чымазагIвтара йадзхъаз айщчва нышвынтара йыцIаз ачкIвынчва дрылата дгIараухтI. АчкIвын йыцын «мартI аоперация»-хIва атурых йгIалахаз айбащра агIан зхъа йамайгьдзаз хIфырква. Апсны а-Фыр айсра амщтахь ртлапкъ нышвынтара апны йчIвылахъв йаухтI. Айсра алгун, АйгIайра йатахъыхыз мшквакI ракIвын. Сентябрь а 22 СогIвым гIадырхвитхуан, ауи атшын Джьубей хIатлата дгIархвытI. АйъазагIвчва ачкIвын йынцIра Новоафон госпиталь апны йазабакIтI, ауаса дгIащаквхарныс Анчва йыгьйымхIватI, сентябрь а 28 адуней йхIваджьтI. – Грузия апны авласть Гамсахурдия йангIайнапIыцIайкI Абхазия ахьыла айсра шварагIварата йаъаз закI шащтагIайуашыз гвынгIвырахатI, – йхIвитI ауи азаман Гудаута РОВД уголовна пшгIарала инспектор ахIбата йынхаз Дармава Виталий айсра йапхъахуз амшква гIайгвалашвахуата. – Ага ауаса йаъазтынгьи, ауи апш айсра хIыла йыцIсуашта хIгьымхъвыцуазтI. ХI-Псадгьыл шварагIвара йшалу йаквшахIату щардан. РОВД анхагIвчва хIрайон апны Грузия йазалху акъвырльыкъвхагIвчва йызнымкIва йгIаркIытI. Айсра гIалагушта мшквакI атахъыта тшпсщара сцатI, ауаса йшгIахIгвыквсыз ахабар анызгIа абджьар гIазахвыз ачкIвынчва срылалтI. ЗымгIва ъагIаджвыквлыз ацхIа Къапщы апны акIвпI, уадыргIвана Гумистадза хIгIаскIьатI, айсра командирква ауи апш щаквыргылра нарахвтI. Айсра ангIалагаз архъв аунашвахъцIара айсра ъачIвагIагIвчва, ахабзахчара органква йрылу йрызхъарцIатI. Дармава Виталийгьи Апсны йаунашвачпагIв хъадаз Ардзынба Владислав йунашвала сентябрь ацIыхъва айсра комендатура дырщтитI. Гудаута город дакомендантхатI. Асквш 1992 декабрь агIан атенгьыз тшпы хчарала абатальон адыркIылуа йалагатI. Ауи зтшын йгIандыршаз йгIашIарышвта айсра алганадзыкIьара Виталий абатальон дакомандирын. – ХIхачIвы атенгьыз тланыкъвала хIышта хчара акIвын. Эшера кыт йаргванта рыцIа йъаквыргъвгъвараз ашIыпIа апны абатальон Смыр Виталий йунашва йацIан, Гагра йаргваныз атенгьыз тшпы Язычба Гайдар йрота йырхчун. АгIвыджьгьи «Абхазия а-Фыр» хьзы гIарквнадыргатI, – йхIватI Виталий йбжьы тшапсахуата. – ХIычкIвынчва АйгIайра ахъазла рхъа щтIарцIатI. ЩардагIвы тгIачва гIандыршарныс йгьахамдзатI, заджвгьи дгьгIартнымхатI. Айсра апны рыцIа йгвъаджьыгIву йузымхчауата ачкIвынчва ъаладзуа акIвпI. Ауат срыквчважварныс счвыбаргвпI, айсра апны зхъа щтIазцIаз уахьчIва швабыжта йхIыгхитI. Леон йорден акавалер Дармава Виталий СогIвым ангIадырхвитх акIвпI йабджьар анщтIайцIа. ЙшхIхIваз апшта, айгIайра гIвымшкI ахIа атахъыхымкIва адуней зхIваджьыз йаща Джьубей данпсы амщтахь Леон йорден гIайквнадыргатI. Айсра амщтахь зымгIва йрайцIбаз Гулик йыквыз ахвыртаква дыргахтI. Ауыгьи Леон йорден йыман. Абараса Виталий йыхгIвайщчвагьи р-Псадгьыл ахъазла рхъа щтIарцIатI. Ауи акIвпI Дармава Маджьид йтгIачва ртурых шаъу йгьи ауат йрапшу гьмачIым. ЙгIадзынгылуа абанпараква ДармаваргIа ртгIачва ртурых йзызнабжьауа закIыпI – у-Псадгьыл бзи йубара, апачваква гIадзынуыргылра шатахъу. ХIгIазквчважваз атгIачва апны, Анчва йбзирала, абанпара шIаква гIадзынгылитI. Виталийи йхъапщыла Рити хыгIвпачва рымапI. АхыгIвгьи ртгIачва рцIасква гьдымрыдзтI, ахIба ауацIа уысквала аорганква дрылапI, аквтанай йхIаракIу апхьарта дгIалгитI, айцIба айсра академия дыцIапI. Виталий йычкIвынчва, ауат ргIариква данрыквчважвауа йлакта лашарахитI – ауат рынасып акIвпI абджьар гIарахвта агъа йзипшIагылыз, йайщчвагьи рылата ачкIвынчва ш