АЙГIАЙРА ДУ ЙАЧВАХЪАБАГАПI

АуацIа уысквала РФ а-Министерства йарыбагъьаз «Асквшква 2016–2020 руацIа акъральгIвчва рпатриот бжьара» йазалху акъральыгIва программа апкъ йтата «Лес Победы» акция абзазара йаларжьитI. Ари ауыс зыхъвдакву хIреспублика амуниципальна районква рпны Россия МВД амежмуниципальна хъвшараква рынхагIвчва акытква рхъадаква, арыпхьагIвчва рцхърагIарала апатриот акция ахачIвква дырхъйитI. ЙагIвсыз асквшква руацIа акция апкъ йтата Абашта айсра Ду афырква йырчвахъабагата апхьартаква рпны ацIла шIаква ларцIатI. СынчIва «Лес Победы» патриот акция апкъ йтата ашвыр цIлаква ларцIарныс щаквдыргылтI. Сентябрь а 24 «Хабезский» межмуниципальна хъвшара анхагIвчва Абаза йгьи ХIабаз районква рпны полиция класс ъану апхьартаква рыпшцIаква чIва, хIа гIазшIалуа цIла ларцIатI. Аполиция анхагIвчва, арыпхьагIвчва, апхьагIвчва йырхъазымкIва, ари ауыс абзазара йалажьра йацхърагIитI ахабзахчара органква рпны йгIаныршу ажвлара советква йрылу. Алибердыкъва кыт йгIвбахауа аквтанай апхьарта апшцIа ацIлаква анларцIа амщтахь Псыжв кыт йгIвбахауа аквтанай апхьарта апынгьи ари ауыс йазынархата айззара акIвшатI. «Хабезский» межмуниципальна хъвшара анхагIвчва йгьи ауаъа йгIаныршу ажвлара йгьи аветеран советква йрылу, арыпхьара нхарта аунашвачпагIвчва, арыпхьагIвчва, й-9 «а»-хауа акласс (полиция класс) йыцIу асабиква «Лес Победы» акция апкъ йтата хвцIлакI ларцIатI. – «Хабезский» межмуниципальна хъвшара анхагIвчва ари йгIванхауата цIла хIызгIаргитI. Асквш 2017 агIан Абашта айсра Ду йаладзыз афыр ШвхIагващ Тырквби ХIарун йпа йчвахъабагата хIсабиква араъа миндаль цIлакI ларцIатI. «Хабезский» межмуниципальна хъвшара анхагIвчва сынчIва апатриот акция алдыргауата ужвыгьи хвцIлакI гIахIыдыргалтI. Полиция фаша зшву асабиква ауат ъаларцIуш дрыхIазыритI, – лхIватI Псыжв кыт й-2-хауа аквтанай апхьарта й-9 «а»-хауа акласс аунашвачпагIв ШвхIагващ Юлия Урысби йпхIа. «Хабезский» межмуниципальна хъвшара апны сквшщарда ажвлара ртынчра йазынхаз аветеранква рсовет знапIыцIу Пщмахва Али «Лес Победы» патриот акция абзазара йалажьра йацхърагIауа дшырзыразу йхIватI. – Абашта айсра Ду атурых, амамыр бзазара гIазхчаз, АйгIайра гIатызгаз афырква рыхьызква хIсабиква йырдырра атахъыпI. Россия МВД аунашвачпагIвчва ргIаджвыквцIарала йакIвшауа «Лес Победы» патриот акция апкъ йтата ари апхьарта апшцIа йлахIцIауа ацIлаква ауат афырква йырчвахъабагазлуштI, – йхIватI Пщмахва Али. «Лес Победы» экология-патриот проект йгIацIанакIуа анхараква сынчIва сентябрь а 29 йалдыргитI. ХIкъраль асубъектква рпны ауи апкъ йтата мильуан 20 йайхIата цIла ларцIатI.